ფოტო: Muhammed Selim Korkutata/Anadolu via Getty Images
ილონ მასკმა აღიარა, რომ SpaceX-ის ხელოვნური ინტელექტის აგენტის, Grok Bot-ის მომსახურების ხარჯები მისგან მიღებულ შემოსავალთან შედარებით „შეუსაბამოდ მაღალი“ იყო. ამის შესახებ მილიარდერმა კვირას, X-ზე მომხმარებლების საჩივრების საპასუხოდ განაცხადა. აღსანიშნავია, რომ განცხადება მას შემდეგ გაკეთდა, რაც მასკმა დაახლოებით ორი კვირის წინ Grok Bot-ს ყველაზე სწრაფად მზარდი პროდუქტი უწოდა.
მასკმა აღნიშნული კომენტარი მას შემდეგ გააკეთა, რაც ერთ-ერთმა მომხმარებელმა Grok Bot-ის გამოყენების ლიმიტების სწრაფად ამოწურვაზე დაწერა. სხვა მომხმარებელთან საუბრისას კი, რომელიც ლიმიტის განახლებას რამდენიმე დღე ელოდებოდა, მასკმა იკითხა, ხომ არ იყო უფრო მაღალი მოხმარების ლიმიტის მქონე გამოწერის საფასური ზედმეტად მაღალი.
მილიარდერს არ დაუკონკრეტებია, რა უჯდება კომპანიას Grok Bot-ის მუშაობა ან შეამცირა თუ არა SpaceX-მა მომხმარებლებისთვის დაწესებული ლიმიტები.
Grok Bot-ი ხელოვნური ინტელექტის აგენტია, რომელიც Meta-ს Muse-ის მსგავსად მუშაობს და კომპანიის ჩატბოტ Grok-ისგან დამოუკიდებელი პროდუქტია. სერვისით სარგებლობა შეუძლიათ მომხმარებლებს, რომლებსაც ყოველთვიურად $30-იანი Premium-გამოწერა ან უფრო მაღალი ღირებულების პაკეტი აქვთ. ასევე ხელმისაწვდომია $100-იანი Super- და $200-იანი Ultra-პაკეტები, რომლებიც გამოყენების მნიშვნელოვნად მაღალ ლიმიტებს ითვალისწინებს. თუმცა უცნობია, გამოწერის რომელ პაკეტს იყენებდნენ მომხმარებლები, რომლებიც ლიმიტების სწრაფად ამოწურვას უჩიოდნენ.
ორი კვირის წინ, SpaceX-ის მესამე კვარტლის ფინანსური შედეგების წარდგენისას, მასკმა განაცხადა, რომ Grok Bot-ი მის მიერ ოდესმე ნანახ პროდუქტებს შორის ყველაზე სწრაფად იზრდება. „არასდროს მინახავს, რამე ასე სწრაფად გაზრდილიყო“, – აღნიშნა მან. მასკის თქმით, მომხმარებლები დროთა განმავლობაში სერვისს სულ უფრო ინტენსიურად იყენებენ. მისი განმარტებით, Grok Bot-ის შესაძლებლობების გაუმჯობესებასთან ერთად, მომხმარებლები მას კვირაში უფრო ხშირად მიმართავენ და არა პირიქით.
მასკმა ასევე განაცხადა, რომ კომპანია Grok Bot-ის კორპორაციული კლიენტებისთვის მასშტაბურად დანერგვას გეგმავს. მისივე თქმით, SpaceX-ი უკვე აწარმოებს მოლაპარაკებებს და სერვისის ფართო დანერგვისთვის რამდენიმე კვირაში ემზადება. მილიარდერის პროგნოზით, Grok Bot-ი საბოლოოდ შესაძლოა კომპანიის SI-გამოთვლითი რესურსების ყველაზე მსხვილი მომხმარებელიც გახდეს.
SpaceX-ის პრეზიდენტის, გვინ შოთველის განცხადებით, ოქტომბრის დასაწყისში Grok Bot-ს კვირაში 800 000 ფასიანი მომხმარებელი ჰყავდა. კომპანიის ფინანსური შედეგების წარდგენისას შოთველმა აღნიშნა, რომ წინა თვესთან შედარებით ეს მაჩვენებელი გაორმაგებულზე მეტად იყო გაზრდილი. მისივე თქმით, კომპანიები Grok Bot-ს გაყიდვების, მარკეტინგის, IT-ისა და ინჟინერიის მიმართულებებში იყენებენ, როგორც მუდმივად ხელმისაწვდომ ციფრულ თანამშრომელს, რომელსაც რთული სამუშაო პროცესების მართვა შეუძლია.
Forbes Georgia-ს აღმასრულებელი რედაქტორი
