NYT: შესაძლოა Forbes Media ამერიკულმა Yahoo-მ შეიძინოს

NYT: შესაძლოა Forbes Media ამერიკულმა Yahoo-მ შეიძინოს

შესაძლოა, ამერიკული Forbes Media, რომელიც ჟურნალ Forbes-ის 45 ლიცენზირებულ გამოცემას მსოფლიოს 76 ქვეყანაში გამოსცემს, ამერიკული Yahoo-ს საკუთრებაში გადავიდეს, – ამის შესახებ The New York Times-ი წერს. გამოცემა იუწყება, რომ უკანასკნელ კვირებში, Forbes-ის ფინანსურ ანგარიშგებაზე დაფუძნებული დოკუმენტი, რომელზეც Citigroup-მა იმუშავა, რამდენიმე მედიაგიგანტს გადაეგზავნა, მათ შორის Yahoo-ს. ამ დოკუმენტის თანახმად, გასულ წელს, Forbes Media-მ შემოსავლის სახით $200 მილიონზე მეტი მიიღო და $40 მილიონის მოგება ნახა.

როგორც The New York Times-ს არაერთმა წყარომ დაუდასტურა, Forbes Media-ს საკონტროლო პაკეტის ამჟამინდელ მფლობელს, ჰონგ-კონგში დაფუძნებულ Integrated Whale Media Investment-ს, მედიაბიზნესის გაყიდვა, სულ მცირე $630 მილიონად სურს. შეგახსენებთ, რომ ეს ის შეფასებაა, რომელიც კომპანიამ შარშან გამოაცხადა, როცა SPAC-გარიგების შედეგად საფონდო ბირჟაზე განთავსებას გეგმავდა. ცნობისთვის გეტყვით, რომ ჰონგ-კონგურმა კომპანიამ Forbes Media-ს საკონტროლო პაკეტი ჯერ კიდევ 2014 წელს შეიძინა – ამ გარიგებისას Forbes Media-ს ღირებულება $475 მილიონად განისაზღვრა. აღსანიშნავია, რომ კომპანიის არასაკონტროლო პაკეტს ჯერ კიდევ ფლობს ფორბსების ოჯახი.

შეგახსენებთ, რომ Yahoo, რომელიც ფინანსური თემატიკის გამოცემა Yahoo Finance-ს ფლობს, გასული წლის მაისში კერძო კაპიტალის ამერიკულმა კომპანიამ, Apollo-მ $5 მილიარდად შეიძინა. მას მერე, Yahoo საკუთარი პროდუქტების, მათ შორის Yahoo Mail-ისა და Yahoo Sports-ის განვითარებაზე იყო გადართული.

ჟურნალი Forbes-ი ბერტი ჩარლზ ფორბსმა დააარსა, 1917 წელს. მოგვიანებით, კომპანია ჯერ მისმა შვილმა, მალკოლმმა გადაიბარა, ხოლო შემდგომ მისმა შვილიშვილმა, სტივმა.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *