ფოტო: Shutterstock
ევროპის ნომინალური მთლიანი შიდა პროდუქტი, 2026 წლის პროგნოზებით, $32.2 ტრილიონს მიაღწევს. თუმცა, შესამჩნევი ზრდის მიუხედავად, საერთაშორისო სავალუტო ფონდის (IMF) „მსოფლიო ეკონომიკური პერსპექტივის” აპრილის მონაცემები ცხადყოფს, რომ ეს მაჩვენებელი რეალურად მხოლოდ რამდენიმე მსხვილ მოთამაშეზეა გადანაწილებული. 2026 წლისთვის რეგიონში უდიდესი ეკონომიკის მქონე ქვეყანა კვლავ გერმანიაა, რომელსაც გაერთიანებული სამეფო და საფრანგეთი მოჰყვებიან.
ჩამოთვლილ ქვეყნებთან ერთად, რეგიონის ექვსი უმსხვილესი ეკონომიკის მქონე ქვეყნებს შორისაა იტალია, რუსეთი და ესპანეთი. საერთო ჯამში კი, ევროპის ეკონომიკური ბირთვი კვლავ მყარად დასავლეთშია მოქცეული — მათ შორის, გერმანია, გაერთიანებული სამეფო და საფრანგეთი ჯამში ევროპის $32.2-ტრილიონიანი მშპ-ის თითქმის ნახევარს, $13 ტრილიონს იკავებენ.
ამ ქვეყნების ეკონომიკური ლიდერობა ადრეული ინდუსტრიალიზაციითა და ათწლეულების განმავლობაში წარმოების, ფინანსებისა და სერვისების სწორი დივერსიფიკაციითაა გამოწვეული. გაერთიანებული სამეფოს ეკონომიკური ტრანსფორმაციის გავლენა დასავლეთ ევროპის მეზობელ სახელმწიფოებზეც გავრცელდა, რამაც ისინი დამოუკიდებელ ინდუსტრიულ გიგანტებად აქცია. ბენილუქსის ქვეყნები — ბელგია, ლუქსემბურგი და ნიდერლანდები — რომელთა კომბინირებული მთლიანი შიდა პროდუქტი $2.2 ტრილიონს აღემატება, ამის ნათელი მაგალითია.
გაერთიანებული სამეფოსა და გერმანიის ინდუსტრიული სიმძლავრისა ან საფრანგეთის სოფლის მეურნეობისგან განსხვავებით, რუსეთის $2.7-ტრილიონიანი ეკონომიკის მთავარი საყრდენი ენერგოწარმოებაა. ქვეყნის ექსპორტის ნახევარზე მეტი ნახშირწყალბადებზე, მათ შორის ნავთობსა და ბუნებრივ აირზე ნაწილდება. მიუხედავად იმისა, რომ მოსკოვი ნავთობექსპორტიორი ქვეყნების ორგანიზაციის (OPEC) წევრი არაა, ქვეყანა აქტიურად მონაწილეობს ნავთობის გლობალური ბაზრის ფორმირების პროცესში.
ჩრდილოეთ ევროპის მეორე უმსხვილესი ეკონომიკის მქონე ქვეყანა, ნორვეგია, ნავთობისა და ბუნებრივი აირის ერთ-ერთი წამყვანი მწარმოებელია. მიუხედავად იმისა, რომ ქვეყნის მოსახლეობა დაახლოებით ხუთი მილიონია, ნორვეგიის მთლიანი შიდა პროდუქტი თითქმის $600 მილიარდია, რაც სწორედ ენერგორესურსების დამსახურებაა.
აღსანიშნავია სამხრეთით მდებარე ქვეყნების ეკონომიკის დინამიკური ზრდაც, მათ შორის ესპანეთისა ($2.1 ტრილიონი) და პორტუგალიის ($381 მილიარდი), რომლებიც 2026 წლისთვის, სავარაუდოდ, მშპ-ის 2%-იან მატებას დააფიქსირებენ. სამხრეთ ევროპის ქვეყნების ძლიერი ეკონომიკის მიღმა კი, პანდემიის შემდგომ ტურიზმის აღდგენა, გაზრდილი საჯარო ინვესტიციები და ენერგეტიკული თვითმყოფადობის მაღალი დონე დგას.
ევროპის $32-ტრილიონიანი ეკონომიკა ქვეყნების მიხედვით შემდეგნაირად ნაწილდება:
| ქვეყანა | ნომინალური მშპ |
| გერმანია | $5 453 მლრდ |
| გაერთიანებული სამეფო | $4 265 მლრდ |
| საფრანგეთი | $3 596 მლრდ |
| იტალია | $2 738 მლრდ |
| რუსეთი | $2 656 მლრდ |
| ესპანეთი | $2 091 მლრდ |
| ნიდერლანდები | $1 450 მლრდ |
| შვეიცარია | $1 147 მლრდ |
| პოლონეთი | $1 134 მლრდ |
| ირლანდია | $779 მლრდ |
| ბელგია | $777 მლრდ |
| შვედეთი | $760 მლრდ |
| ავსტრია | $624 მლრდ |
| ნორვეგია | $599 მლრდ |
| დანია | $504 მლრდ |
| რუმინეთი | $481 მლრდ |
| ჩეხეთი | $433 მლრდ |
| პორტუგალია | $381 მლრდ |
| ფინეთი | $338 მლრდ |
| საბერძნეთი | $308 მლრდ |
| უნგრეთი | $271 მლრდ |
| უკრაინა | $225 მლრდ |
| სლოვაკეთი | $169 მლრდ |
| ბულგარეთი | $148 მლრდ |
| ხორვატია | $117 მლრდ |
| სერბეთი | $112 მლრდ |
| ლუქსემბურგი | $110 მლრდ |
| ლიეტუვა | $106 მლრდ |
| ბელარუსი | $102 მლრდ |
| სლოვენია | $87 მლრდ |
| ლატვია | $54 მლრდ |
| ესტონეთი | $52 მლრდ |
| კვიპროსი | $45 მლრდ |
| ისლანდია | $44 მლრდ |
| ბოსნია და ჰერცეგოვინა | $37 მლრდ |
| ალბანეთი | $33 მლრდ |
| მალტა | $31 მლრდ |
| მოლდოვა | $22 მლრდ |
| ჩრდილოეთ მაკედონია | $22 მლრდ |
| კოსოვო | $14 მლრდ |
| მონტენეგრო | $10 მლრდ |
