სამი პრინციპი | ინტერვიუ ლაშა ტაბიძესთან

სამი პრინციპი | ინტერვიუ ლაშა ტაბიძესთან

1.3 მილიონი მომხმარებელი და პანდემიის მიუხედავად გაზრდილი ბიზნესი – „ვიონი საქართველო“ ახალ გამოწვევებს და შესაძლებლობებს ახალ გენერალურ დირექტორთან, ლაშა ტაბიძესთან ერთად ხვდება.

ლაშა ტაბიძე, „ვიონი საქართველოს“ გენერალური დირექტორი

ლაშა ტაბიძე „ვიონი საქართველოს“ გენერალურ დირექტორად 2021 წლის 15 მარტს დაინიშნა. გენერალური დირექტორის პოსტის დაკავებამდე, 2018 – 2021 წლებში, ამავე კომპანიაში ბიზნესოპერაციების დირექტორის პოზიციაზე მუშაობდა, რომელზეც ის კომერციული დირექტორის პოსტიდან დაწინაურდა. საერთო ჯამში მისი გამოცდილება ტელეკომუნიკაციების სექტორში ათ წელს ითვლის.

ლაშა ტაბიძეს აქვს მრავალი წლის წარმატებული გამოცდილება ბიზნესის მართვაში, აღმასრულებელ პოზიციებზე. 2011 წელს, „ვიონი საქართველოში“ კომერციული დირექტორის პოსტზე გადმოსვლამდე, იგი მუშაობდა ისეთ კომპანიებში, როგორიცაა სს “სარაჯიშვილი” – კომერციული დირექტორის პოზიციაზე და Vellagio Ltd. ( „ვისოლი ჯგუფი”) – ბიზნესის განვითარების დირექტორად.

ლაშა ტაბიძეს განათლება მიღებული აქვს გერმანიაში, ჰაიდელბერგის რუპრეხტ-კარლს უნივერსიტეტში ეკონომიკის განხრით და თბილისის სახელმწიფო უნივერსიტეტში საერთაშორისო ბიზნესის მიმართულებით. ფლობს სამ უცხო ენას: ინგლისურს, გერმანულსა და რუსულს.

 

ლაშა ტაბიძე. 38 წლის. „ვიონი საქართველოს“ (ბრენდი ბილაინი) გენერალური დირექტორი – ერთმანეთს ზუმით ვესაუბრებით. არაფერი ისე არ მახსენებს, რომ ისევ პანდემიის რეალობაში გვიწევს ცხოვრება, – უკვე პირბადეც კი – ვიდრე ის ფაქტი, რომ საყდე ინტერვიუ და თან საერთოდ ახალ რესპონდენტთან, ონლაინპლატფორმაზე უნდა შედგეს. მოცემულობას ვერგები, ჩამწერს თითს ვაჭერ და ვიწყებთ.

ლაშა ტაბიძე უკვე 10 წელია, რაც „ვიონი საქართველოს“ თა­ნამშრომელია. ოთხი გენერალური დირექტორი გამოიცვალა, მულტინაციონალური კომპანიის ყველა თავისებურება გაიაზრა და პრაქტიკაში კარგად გაწვრთნილი უნარების დანერგვამ გე­ნერალური დირექტორის სტატუსიც მოუტანა.

მულტინაციონალური კომპანიის მთავარი გამოწვევა მისთ­­ვის, საკუთარი უნარების არა მხოლოდ ადგილობრივ დონეზე, არამედ უფრო ფართოდ – ჯგუფის დონეზე წარმოჩენა იყო. „ამას სრულიად სხვა უნარები სჭირდება“, – ამბობს ლაშა ტაბიძე, თუმცა იქვე ამატებს განვითარების მისთვის მთავარ ფილო­სოფიას, რომ მედალს ყოველთვის ორი მხარე აქვს და სადაც გამოწვევაა, იქ აუცილებლად არის შესაძლებლობაც.

ამ მიდგომით დღეს ის კავშირგაბმულობისა და ინტერნე­ტით მომსახურების პროვაიდერ წამყვან საერთაშორისო ჯგუფ VEON-ში შემავალ კომპანიას – „ვიონი საქართველოს“ მარ­­თავს.

თავად VEON-ის სათავო ოფისი ამსტერდამშია და 212 მილიონ მომხმარებელს, მსოფლიოს 9 სხვადასხვა ქვეყანაში – მათ შორის, საქართველოშიც, აწვდის ძირითად კომუნიკაცი­ებსა და ციფრულ მომსახურებას. VEON-ის აქციები NASDAQ-ისა (ნიუ-იორკი) და Euronext-ის (ამსტერდამი) საფონდო ბირჟებზეა განთავსებული.

2021 წლის თებერვლის მონაცემებით, პანდემიის მიუხედა­ვად, „ვიონი საქართველოს“ ბაზრის წილი გაზრდილია.

ლაშა ტაბიძეს პანდემიის არ ეშინია. კრიზისმენეჯმენტის გამოცდილებაც აქვს – მართალია, სხვა სექტორსა და სხვა კომ­­პანიაში, მაგრამ ჩვენი ინტერვიუს ფონზე, ერთი გამოკვეთილი შთაბეჭდილება მრჩება – მისთვის განყენებული გამოცდილება არ არსებობს: ყველა ცოდნასა და უნარს აერთიანებს და შემ­­დეგ პრაქტიკაში თანამიმდევრულად ნერგავს.

„ძალიან კმაყოფილი ვარ, სადაც ვარ და სადამდეც მოვე­დი, – ასე მეუბნება. – ვფიქრობ, ამას დიდი შრომის, საკუთარი და ჩემი გუნდის ძალისხმევით მივაღწიე და ვთვლი, რომ ეს მიღწევა უფრო ჩემმა შესაძლებლობებმა მომიტანა, ვიდრე გა­მართლებამ“.

გამართლებაზე მეტად, აშკარად, სტრატეგიული ხედვის იმედი აქვს. როგორც ამბობს, არა აქვს მნიშვნელობა, რა პრო­დუქტზე მუშაობს – ალკოჰოლს ყიდის, დაზღვევას, რეკლამას თუ საბოლოოდ, სიმბარათს – მთავარია მენეჯმენტის სამი პრინცი­პის დაცვა: „პირველი – ხედვა, საით გინდა, რომ კომპანია მივი­დეს; მეორე – ვინ არის შენი მომხმარებელი და რას აკეთებ ამ მომხმარებლისთვის და მესამე – ვინ უნდა იყოს ამაში შენთან ერთად ჩართული, რომ ეს ორი კომპონენტი შესრულდეს“.

თითქმის ერთსაათიან ინტერვიუსაც მის ამ სქემაზე ვაგებ.

თქვენს თა­მაშს ავ­ყ­ვე­ბი მა­შინ. დე­ტა­ლუ­რად გა­ვი­ა­როთ ეს სა­მი კომ­პო­ნენ­ტი. და­ვიწყოთ ხედ­ვით – რა იქ­ნე­ბა თქვე­ნი ხელ­წე­რა და რით გა­ზო­მავთ, რამ­დე­ნად წარ­მა­ტე­ბუ­ლი იყო თქვე­ნი საქ­მი­ა­ნო­ბა ამ პო­ზი­ცი­ა­ზე?

ყველაზე მთავარი, რასაც გავაკეთებ, მედლის ორი მხარე აქაც მემახსოვრება. პირველი – გუნდს შიგნით ექნება მაქსიმალური თავისუფლება და განვითარების შესაძლებლობა – ეს მოხდება არა მხოლოდ ერთად მუშაობის, ქოუჩინგის, კოლაბორაციის გზით, არამედ ყველა იმ რესურსით, რაც კომპანიას აქვს და არაერთი აქვს – საგანმანათლებლო პროექტები, სხვადასხვა კურსის დაფინანსება, ლიცენზიები და სწავლება და ამასთან ერთად, თავისუფლება, რის შენებასაც წლები მოვანდომეთ და რაც მუშაობს.

პან­დე­მი­ის მი­უ­ხე­და­ვად?

2020 წელი ჩვენთვის ძალიან კარგი ტესტი იყო. ის, რასაც დიდი ხნით ადრე ვამბობდით, რომ იმუშა­ვე, საიდანაც გინდა, გქონდეს თავისუფალი გრაფი­კი, მთავარია, საქმე შეასრულო – 2020 წელმა პრაქ­­ტიკულად დაგვიმტკიცა, რომ წინა წლებშიც ძალიან სწორი მიდგომა გვქონდა. დღეს ეს დიდი უპირატე­სობაა და ეს უპირატესობა მხოლოდ გაძლიერდება.

ეჯა­ილ­ზე ვსა­უბ­რობთ? დღეს ეს ტერ­მი­ნი სულ უფ­რო ხში­რად ხვდე­ბა ამ ფურ­ც­ლებ­ზეც…

ეჯაილი ჩვენს კომპანიაში 2014 წლიდან დავნერ­­გეთ. დიდი გამოცდილება იყო. მეც შიდა წარმატებას შევაფასებ იმით, რამდენად კმაყოფილი იქნება ჩემი გუნდი, რამდენად კმაყოფილები იქნებიან ჩვენი თანამშრომლები და ასევე – რამდენად მრავალფე­როვანია ის გამოცდილება, რასაც გუნდის წევრები ამ სამუშაო სივრცეში იღებენ. მაგალითად, რამდენ საგანმანათლებლო პროგრამაში ჩაერთვებიან, რამდენ როტაციას გაივლიან და ასე შემდეგ. არ არსებობს ცუდი გუნდი. არსებობს გუნდი, რომელიც ვითარდება და რომელიც ვერ ვითარდება.

და ეს მე­ნე­ჯერ­ზეა და­მო­კი­დე­ბუ­ლი?

დიახ. ვთვლი, რომ მენეჯერის სისუსტეცაა, როდესაც გუნდის ცვლას იწყებს, ხოლო სიძლიე­რე, როცა მენეჯერი თავისი გუნდის განვითარებას მაქსიმალურ ენერგიას და რესურსს უთმობს და საკ­­მარის თავისუფლებას უტოვებს მას, რომ გაიზარდოს და გაძლიერდეს. 21-ე საუკუნეში ვერავინ იტყვის, რომ რომელიმე პროფესიას ბოლომდე ფლობს – ყველაფერი ძალიან დინამიურად იცვლება, ამიტომ მუდმივად ინფორმირებული უნდა იყო, მუდმივად უნდა ვითარდებოდე – წინააღმდეგ შემთხვევაში, კონკურენტულობას მარტივად კარგავ.

მედ­ლის მე­ო­რე მხა­რე რა არის?

მედლის მეორე მხარე გარე მხარეა – კომპანიის გარე განვითარება. 2011 წელი რომ ავიღოთ, როცა მე მოვედი კომპანიაში, მაშინ ინტერნეტტექნოლოგიები საერთოდ არ გვქონდა – მხოლოდ 2G. 2015 წელს დავ­­წერეთ 4G-ზე გადასვლის სტრატეგია – პირველები ვიყავით, ვინც ქვეყანაში ლიცენზიაც შეიძინა და ეს ტექნოლოგიაც შემოიტანა.

თქვე­ნი რო­ლი რა იყო ამ ყვე­ლა­ფერ­ში?

ჩემი პასუხისმგებლობა იყო, რომ ბიზნესი ამ ინოვაციას დასწეოდა. წარმოიდგინეთ, ჯგუფი ათეუ­ლობით მილიონის ინვესტიციას აბანდებს ამ ქსელის გამართვაში და გარეთ, მოხმარებაში ძალიან ცოტა 4G მობილურია. მაგრამ ჩვენ სტრატეგია ოთხ წელ­­ზე გავწერეთ და 2018 წელს ჩადებული ინვესტიცია სრულად ამოვიღეთ. ამ დროს 4G მომხმარებლების რაოდენობა უკვე აღემატებოდა სხვა ტექნოლოგიე­ბის მომხმარებელთა რაოდენობას.

ამით რის თქმა გინ­დათ?

სტრატეგია ძალიან მნიშვნელოვანია. დღეს ამ კომპანიის რეალობა ის არის, რომ პანდემია სულ რომ არ მომხდარიყო, 2018 წლიდან ის ციფრულ რელსებზე უკვე იდგა. ციფრული მიმართულება ჩვენს შემთხვევაში მხოლოდ სიტყვები არ არის. 2016 წელს გავუშვით პირველი აპლიკაცია. შემდეგ უკვე e-commerce-ის განვითარებაზე ავიღეთ აქცენტი – მიუხედავად იმისა, რომ მაშინ ამ ბაზარს მხოლოდ ორიოდე ათეული მომხმარებელი თუ ჰყავდა. დღეს ნახევარი მილიონი ყოველთვიური აქტიური მომხმა­რებელი გვყავს მხოლოდ ერთი არხის – მაგალითად, აპლიკაციის.

მა­შინ ისიც მითხა­რით, რით ზო­მავთ კომ­პა­ნი­ის წარ­მა­ტე­ბას – ესეც ხედ­ვის ნა­წი­ლი­ა, არა?

პირადად ჩემთვის კომპანიის წარმატება ორად იყოფა – პირველი: ეს არის, რა თქმა უნდა, ფინანსური და კომერციული მაჩვენებლები, რომლებიც საშუა­ლებას გვიქმნის, გავაგრძელოთ ინვესტირება, რომ კომპანია კიდევ უფრო გაიზარდოს. და მეორე – ეს არის მომხმარებლების მოთხოვნის დაკმაყოფილე­ბა ანუ მათი კეთილდღეობა. აი, ეს ორი მაჩვენებე­ლია, რითაც ვზომავ არა მხოლოდ საკუთარ, არამედ მთელი ჩემი გუნდის და, შესაბამისად, კომპანიის წარმატებას.

მო­დი, ახ­ლა ეს ხედ­ვა კონ­კ­რე­ტულ პრო­დუქ­ტებ­ში ვთარ­გ­მ­ნოთ…

ჩვენი მთავარი აქცენტი რაც შეიძლება მეტი ინო­ვაციის დანერგვაა. ჩვენ გვაქვს ჩეტბოტი, გვაქვს აპლიკაცია, გვაქვს ვებსაიტი, გვაქვს ონლაინმომსა­ხურების ცენტრები, გვაქვს ციფრული ტერმინალები მაღაზიებში. ინოვაციური კომპანია ვართ და ეს წლების განმავლობაში უკვე დავამტკიცეთ. ცნე­ბა – ტარიფი ქვეყანაში ჩვენ შემოვიტანეთ, მანამდე ასეთი ცნება აქ საერთოდ არ არსებობდა და ამას გარდა, ჩვენ ფიზიკური არხებიც კი გავაციფრულეთ ისეთი ტერმინალებით, რომელთა მეშვეობით ადა­მიანს სრულად თვითმომსახურება შეუძლია. აქ ჩანს სწორედ ჩვენი ხედვა – ჩვენ ვემსახურებით 1.3 მილი­ონ მომხმარებელს, ეს არის ძალიან დიდი პასუხისმ­­გებლობა და პასუხისმგებლობასთან ერთად, დიდი სტიმულიც, რომ ჩვენ ამ ადამიანებს შევთავაზოთ ის, რაც მათ დღეს სჭირდებათ.

სა­ი­დან იცით, მათ რა სჭირ­დე­ბათ?

ჩვენს მომხმარებელს კარგად ვიცნობთ. ვაკვირ­­დებით და ყურადღებით ვუსმენთ. კარგი მაგალითი შემიძლია მოგიყვანოთ. ჩვენი ერთ-ერთი ბოლო პროდუქტი – იცით, რომ ამ ქვეყანაში ლიცენზირე­ბული მუსიკის აპლიკაცია პრაქტიკულად არ არსე­ბობდა – მუსიკა ან უნდა მოგეპარა, ან ძალიან ბევრი ინტერნეტი დაგეხარჯა მის მოსასმენად. ჩვენ ამ ბაზრის შესწავლით და მომხმარებლის თხოვნით, შევთავაზეთ აპლიკაცია. ჩვენ მომხმარებლებს მუდ­­მივად ვუსვამთ კითხვებს არა მხოლოდ არსებულ პროდუქტებზე, არამედ იმაზეც, თუ რა სჭირდებათ, რა მოეწონებოდათ. ამ უკუკავშირის საფუძველზე, რამდენიმე თვის წინ მსოფლიოში ცნობილი აპლიკა­ცია გავუშვით და დღეს უკვე სამგიგაბაიტიან პაკეტში აქვთ ბილაინის მომხმარებლებს ეს app-ი ინტეგრი­რებული. კმაყოფილები არიან. აქვე, კიდევ ერთი მაგალითი შემიძლია გავიხსენო – 2020 წელს ძალიან დიდი საჭიროება დავინახეთ e-learning-ის – ონლა­ინსწავლისა და სწავლების – მიმართულებით. ჩვენს კომპანიას აქვს იმის შესაძლებლობა, რომ მსოფ­­ლიოში ცნობილ დიდ კომპანიებს და პლატფორმებს პირდაპირ დავუკავშირდეთ და ვუთხრათ – ჩვენს ქვეყანაში, ჩვენს მომხმარებლებს ამ ტიპის პროდუქ­­ტი ან სერვისი სჭირდებათ და მოდი, გვესაუბრე, რო­გორ შეგვიძლია ამ საჭიროებას ვუპასუხოთ და რაც სჭირდებათ, ზუსტად ის მივაწოდოთ. როცა ასეთი სტრატეგია გაქვს არჩეული, შემდეგ CSR აქტივობებიც უფრო თანამიმდევრულია – მთელი წლის განმავ­­ლობაში მოსწავლეებს ხან უფასოდ ვთავაზობდით ინტერნეტს, ხან შეღავათიანი ტარიფებით. ჩვენი მომხმარებლების ინტერესები და ჩვენი ინტერესები მჭიდროდაა გადაჯაჭვული – ერთმანეთის გარეშე, პრაქტიკულად არც არსებობს.

ფოტო: ხათუნა ხუციშვილი

შე­ვა­ჯა­მოთ ხედ­ვის ნა­წი­ლი – თქვენ, რო­გორც საკ­მა­ოდ ახა­ლი გე­ნე­რა­ლუ­რი დი­რექ­ტო­რი, რო­გო­რი კომ­პა­ნი­ის მშე­ნებ­ლო­ბას თუ გაძ­ლი­ე­რე­ბას ჰპირ­დე­ბით დღეს მომ­ხ­მა­რე­ბელს?

ეს კომპანია იქნება ერთგვარი ეკოსისტემა და ჰაბი, რომელიც მაქსიმუმს გააკეთებს იმ დიდი გა­მოცდილებით, იმ პროფესიონალებით, რომლებიც ამ კომპანიაში არიან თავმოყრილი და იმ უდიდესი რესურსით, რომელიც ჩვენ როგორც კომპანიას, ჩვენ როგორც ჯგუფს გვაქვს – შევეცდებით, რომ მომხმა­რებლებს შევუქმნათ კომფორტი, ქვეყანას შევუქმ­­ნათ ეკონომიკური დოვლათი და, რა თქმა უნდა, გან­­ვავითაროთ ჩვენი ბიზნესი ისე, რომ მაქსიმალურად იყოს ჯგუფის მასშტაბით ეს კომპანია და ეს ქვეყანა წარმოჩენილი.

თქვენს უნი­ვერ­სა­ლურ მე­ნე­ჯე­რულ პრინ­ცი­პებ­ში – ხედ­ვას მომ­ხ­მა­რე­ბე­ლი მოს­დევს. ვინ არის „ვიონი სა­ქარ­თ­ვე­ლოს“ მომ­ხ­მა­რე­ბე­ლი?

21-ე საუკუნეში მომხმარებელი ბიზნესის ნაწილია. ადრე მარკეტინგში იყო მიდგომა, რომ კომპანიას წინმსწრებად უნდა გამოეცნო, რა შეიძლება ნდო­მოდა მომხმარებელს. შემდეგ – რეკლამით უნდა მიგეპყრო მისი ყურადღება. შემდეგ კი წარმატებულმა კომპანიებმა – არსებობენ კარგი კომპანიები და არსებობენ წარმატებული კომპანიები – მომხმარებ­­ლის მოსმენა დაიწყეს. მათ შორის ვიყავით ჩვენც.

რით გან­ს­ხ­ვავ­დე­ბა ეს მიდ­გო­მა თქვენ მი­ერ ჩა­მოთ­ვ­ლი­ლი სხვა მიდ­გო­მე­ბის­გან?

თუ მომხმარებლის მოსმენა და მისი ინტერესების გათვალისწინება ხდება კომპანიისთვის პრიორიტე­ტული, მაშინ მოგების მარჟა, შემოსავლიანობა უკანა პლანზე გადადის. ამოსავალი ხდება მომხმარებლის ლოიალურობის მოპოვება და შენარჩუნება. ხედვაც იცვლება – მთავარი ხდება, რაც შეიძლება დიდხანს შეინარჩუნო მომხმარებელი და მისი კმაყოფილება. როცა მომხმარებელი კმაყოფილია, ახალ სერვი­სებსაც ითვისებს, რადგან უკვე ბრენდს ენდობა. გრძელ ვადაში ეს გაცილებით მეტი და სტაბილური შემოსავალია, ვიდრე იმ მიდგომით, როცა ფასის მომატებით მოკლე ვადაში მეტი მოგების ნახვაა შესაძლებელი.

თვი­თონ მომ­ხ­მა­რე­ბე­ლი თუ იც­ვ­ლე­ბა?

დღეს მომხმარებელი ბევრად უფრო მომთხოვნი გახდა. ის არა მხოლოდ იმით გახდა ბიზნესის ნაწი­ლი, რომ მუდმივად გვესაუბრება, არამედ იმითაც, რომ კომპანიის მომავალ გეზს განსაზღვრავს – სად უნდა წავიდეს კომპანია ხვალ – ამ კითხვაზე პასუხი მათ შორის მომხმარებელსაც აქვს. ეს ძალიან მნიშვ­­ნელოვანი საკითხია.

კონ­კუ­რენ­ცია თუ იც­ვ­ლე­ბა? ამას იმი­ტომ გეკითხე­ბით, რომ ბო­ლო პე­რი­ოდ­ში რამ­დე­ნი ასე­თი საყ­დე ბიზ­ნე­სინ­ტერ­ვი­უც მქო­ნია და გარ­წ­მუ­ნებთ, ბევ­რია – ჩემ­თ­ვის ერ­თი რამ აშ­კა­რა­ა: ფო­კუ­სი მომ­ხ­მა­რე­ბელ­ზე იზ­რ­დე­ბა – ვთქვათ, თუ ად­რე, მა­გა­ლი­თად, ბან­კე­ბი კონ­კუ­რენ­ცი­ა­ში შე­დი­ოდ­ნენ უფ­რო ფარ­თოდ სა­ფი­ნან­სო სექ­ტორ­თან, ახ­ლა მთელ რი­ტე­ილ­-­სექ­ტორ­თან კონ­კუ­რენ­ცი­ა­ში არი­ან. რას ცვლის კონ­კუ­რენ­ცი­ის საზღ­ვ­რე­ბის ასე­თი გა­ფარ­თო­ე­ბა თქვე­ნი ბიზ­ნე­სის­თ­ვის?

როგორც თავის დროზე ინტერნეტმა გააერთიანა მსოფლიო და ერთმანეთთან ურთიერთობა შეუქმნა, დღესაც ზუსტად იგივე ხდება. დღეს ეკოსისტემების ერა მოდის – მომხმარებელს საერთოდ არ სჭირდება ასობით აპლიკაციაში გარკვევა ან ასობით ვებსაი­ტის გახსნა და ყველგან სათითაოდ რეგისტრირება. ის გვკარნახობს მთელ ეკოსისტემას, თუ რა უნდა გა­მოიყენოს რისთვის, ოღონდ მარტივად და სწრაფად. ამიტომ ისიც, რაც თქვენ ახსენეთ, რომ სხვადასხვა ინდუსტრია სხვადასხვა ბიზნესსფეროში შედის, სწორედ მომხმარებლიდან გამომდინარეობს. თუ მომხმარებელს ადრე მხოლოდ ზარი სჭირდებოდა, ტელეკომუნიკატორებიც ვისხედით და მხოლოდ ზა­რის სერვისს ვაწვდიდით. დღეს უკვე სხვა რეალობაა – მომხმარებელი ყველა კომპანიას გვთხოვს იმას, რომ ვიყოთ იქ, სადაც ის არის, მაშინ, როცა ის იქ არის და მივაწოდოთ ის, რაც მას იმ მომენტში უნდა.

„თუ მომხმარებლის მოსმენა და მისი ინტერესების გათვალისწინება ხდება კომპანიისთვის პრიორიტეტული, მაშინ მოგების მარჟა, შემოსავლიანობა უკანა პლანზე გადადის. ამოსავალი ხდება მომხმარებლის ლოიალურობის მოპოვება და შენარჩუნება“.

ამ ფორ­მით გაზ­რ­დი­ლი კონ­კუ­რენ­ცია თქვენ­თ­ვის გა­მოწ­ვე­ვა უფ­როა თუ შე­საძ­ლებ­ლო­ბა?

თუ შემდგომში ჩვენ კიდევ გამოვიცნობთ, ისევ მომხმარებლის ხმის გაგონების შედეგად, თუ რა შე­იძლება მისთვის კიდევ უფრო კომფორტული გახდეს – დრო დაუზოგოს და კიდევ უფრო მეტი სინერგია შექმნას სხვადასხვა კომპანიას შორის და ამ მომხ­­მარებელმა ადვილად შეძლოს რამდენიმე ნაბიჯით ამ ყველაფრის გაკეთება, ეს იქნება ძალიან კარგი შედეგი. დღეს ეს რეალობაა. ვფიქრობ, მსოფლიო იქით მიდის – კომპანიები ეკოსისტემებში ერთიან­დებიან, ინფორმაციას ცვლიან და, ჯამში, მომხმა­რებელიც უკეთეს პროდუქტს ან სერვისს იღებს. ეს პროცესი არ შეჩერდება. წინაღობაც არ უნდა შეხვ­­დეს, ჩემი აზრით.

რე­გუ­ლი­რე­ბა წი­ნა­ღო­ბა­ა?

ერთი მხრივ, რეგულირება საჭიროა, რომ ბაზარ­­ზე მონოპოლისტი არ გაჩნდეს, მაგრამ სხვა მხრი­ვაც შევხედოთ: ჩვენს 1.3 მილიონ მომხმარებელს დღეს შეუძლია მინიმალური, მაგრამ რაღაც თანხის ერთმანეთთან გადარიცხვა, ბალანსის შევსება, ერთმანეთისთვის პროდუქტის შეძენა; ახლა უკვე შეუძლიათ, ერთმანეთს მუსიკა აჩუქონ, გაუგზავნონ. ყველაფერი ერთიანდება. ამიტომ ვამბობ, რომ ეკო­სისტემების ერა მოდის და ამას ვეღარაფერი შეა­ჩერებს. თუ ეს კეთდება სწორად, ეთიკური ბიზნესის ნორმების დაცვით, მომხმარებლის ინფორმაციის უსაფრთხოების დაცვით და ამასთან, მომხმარებ­­ლისთვის ახალი დოვლათი იქმნება, ეს მხოლოდ მოსაწონია. ეს დინამიკა სულ უფრო თვალსაჩინო და ხელშესახები გახდება. ჩვენი თავი გავიხსენოთ, თუნდაც სულ რაღაც 3-4 წლის წინ, პროდუქტის თუ სერვისის ონლაინ შესაძენად 6-7 ნაბიჯის გავლა გვჭირდებოდა, დღეს ნაბიჯების რაოდენობა, სულ მცირე, განახლებულია და ვფიქრობ, სულ უფრო ვუახლოვდებით იმ მომენტს, როცა ამისთვის ერთი ან ორი ნაბიჯიც საკმარისი იქნება. ეს კი მომხმარებ­­ლის კმაყოფილებას მხოლოდ გაზრდის.

თუმ­ცა საკ­ვან­ძო სიტყ­ვა ახ­სე­ნეთ – უსაფ­რ­თხო­ე­ბა, რაც ზოგ­ჯერ ზღვარ­ზეა სი­მარ­ტი­ვეს­თან და, შე­სა­ბა­მი­სად, მომ­ხ­მა­რებ­ლის კმა­ყო­ფი­ლებასთა­ნაც. რა ევო­ლუ­ცია გა­ნი­ცა­და ამ ბა­ზარ­მა თუნ­დაც იმ 10 წლის გან­მავ­ლო­ბა­ში, რა­საც კონ­კ­რე­ტუ­ლად თქვე­ნი გა­მოც­დი­ლე­ბა ით­ვ­ლის?

ბოლო 4-5 წელია, ეს ბაზარი საოცრად დინამიური გახდა. 10 წლის წინ, როცა მე შემოვუერთდი ტელე­კომს, ის მთლიანად იყო მიბმული ტექნოლოგიაზე. დღეს ტექნოლოგიასთან ერთად, თანაბრად მნიშვ­­ნელოვანია სერვისიც. ახალი გამოწვევაც გვიახლოვ­­დება – ელექტრონული სიმბარათი – ანუ სულ მალე ფიზიკური სიმბარათიც არ იქნება საჭირო და ამას საით მივყავართ, განვითარების თვალსაზრისით, აქ ნუ გამოვიცნობთ. რაც შეგვიძლია გავთვალოთ, ის არის, რომ ტექნოლოგიასა და სერვისთან ერთად, შემდეგი საფეხური თვითმომსახურება იქნება. ეს საკმაოდ ახალი ცნებაა, რომელსაც ჩვენ უკვე წლე­ბია, ვავითარებთ. თვითმომსახურება იმდენად მარტივი უნდა იყოს, რომ მომხმარებელს ფიზიკური შეხების წერტილები აღარ დასჭირდეს – ქოლცენტრი, მაღაზია – ეს ყველაფერი, რა თქმა უნდა, არ გაქრება, რადგან დღეს ყველა ბიზნესი განვითარების ჰიბრი­დულ მოდელზე იმყოფება – არც მხოლოდ ონლაინ ვარგა, არც მხოლოდ ფიზიკური სივრცე. ეს ალბათ, კიდევ კარგა ხანს, ასეც დარჩება. მთლიანად საქარ­­თველოს ბაზარს რაც შეეხება, ტელეკომი სწრაფად და კონკურენტულ გარემოში ვითარდებოდა მთელი ამ ხნის განმავლობაში – სულ რამდენიმე წელი გავიდა, რაც ბაზარზე დიდი გაერთიანებები მოხდა, „მაგთიკომისა“ და „კავკასუს ონლაინის“, შემდგომ „სილქნეტის“ მიერ „ჯეოსელის“ შეძენა – ეს ყველაფე­რი ცვლის ბაზარზე სიტუაციას.

ფოტო: ხათუნა ხუციშვილი

მე მგო­ნი, ბუ­ნებ­რი­ვად მი­ვა­დე­ქით თქვენს მე­ნეჯ­მენ­ტის უნი­ვერ­სა­ლურ პრინ­ცი­პებ­ში ბო­ლო და მე­სა­მე კომ­პო­ნენ­ტ­საც – გუნდს. გუნ­დიც არის ერ­თი მი­ზე­ზი, რა­ტო­მაც დღემ­დე, ამ დი­დი გა­და­ლა­გე­ბის მი­უ­ხე­და­ვად, მა­ინც ინარ­ჩუ­ნებთ ბა­ზარ­ზე თქვენს ნი­შას?

„ვიონი საქართველოს“ გუნდი გამორჩეულია თა­ვისი ინოვაციურობის ხარისხით. ასეთ ადამიანებ­­თან ერთად ვაკეთებ საქმეს. ჩვენ თავიდანვე, პირ­­ველი წლებიდან გვქონდა გაცხადებული, რომ ჩვენ ვიქნებით ინოვაციური კომპანია – ჩვენ ყოველთვის შემოვიტანთ და დავნერგავთ იმ სიახლეებს, რაზეც შეიძლება მოთხოვნა ბუნებრივად კიდევ 3-4 წელი არ გაჩნდეს და რაც, პირველ ეტაპზე, შეიძლება მხოლოდ დასავლურ ბაზრებზე იყოს განვითარებული. და ჩვენ ამას ვაკეთებთ – იმ ადამიანებთან, იმ გუნდთან ერ­­თად, ვინც აქ მუშაობს. როდესაც ტარიფები შემოგ­­ვაქვს, როდესაც პაკეტები შემოგვაქვს, როდესაც ახალ მომსახურებაზე ვმუშაობთ, – იქნება ეს მუსიკის სთრიმინგი თუ ტელევიზია – ამით მობილურ სერვი­სებს ვავითარებთ. ეს არის ჩვენი დინამიკა. წლების წინ, როდესაც ვახსენებდით, რომ ჩვენ ვითვლით მომხმარებლის კმაყოფილებას – გაკვირვებულები გვეკითხებოდნენ, რას ითვლითო. თუმცა სწორედ ეს გვეხმარება საბოლოო ჯამში იმაში, რაც ყველაზე ღირებულია ამ გუნდისთვის – ბიზნესის ეთიკურად წარმოება. ჩვენი მთავარი პრინციპია, რომ ნების­­მიერი ინფორმაციის დამუშავებასა და სიახლის გამოტანამდე ვეკითხებით მომხმარებელს – უნდა თუ არა, რომ ეს გაკეთდეს. ჩვენს ქვეყანაში, ჩვენდა საბედნიეროდ, მონაცემების დაცულობის კუთხით, ძალიან განვითარებულები ვართ – პერსონალური მონაცემების დაცვის ინსპექტორის ინსტიტუტის არ­­სებობაც ამის დასტურია. ჩვენს გუნდს და კომპანიას რაც შეეხება, ეს ჩვენს დეენემშია. ინვესტიციების დიდ წილს სწორედ უსაფრთხოებისა და მონიტო­რინგის ნაწილში ვაბანდებთ – მხოლოდ უახლეს და თანამედროვე სისტემებს ვანდობთ ჩვენი მომხმა­რებლების პერსონალურ ინფორმაციას. ადრე ამბობ­­დნენ, ქეში მეფეაო – დღეს საუბარია, რომ კონტენტი გახდა მეფე. თუ კონტენტი კარგად არის შექმნილი და შენ შეგიძლია, ეს ყველაფერი მომხმარებელს მი­აწოდო მაშინ, როცა ეს მას სჭირდება, ეს უკვე დიდი შესაძლებლობაა, რომლის გამოყენების შემთხვევა­ში მომხმარებელიც კმაყოფილია და, რა თქმა უნდა, კომპანიაში დოვლათი იქმნება, რაც შემდგომ ისევ განვითარებას ხმარდება.

შე­ვა­ჯა­მოთ ჩვე­ნი სა­უ­ბა­რი: რა არის დღეს თქვე­ნი მთა­ვა­რი გზავ­ნი­ლი თქვე­ნი მომ­ხ­მა­რებ­ლე­ბი­სად­მი?

პირველი – დაიცავით უსაფრთხოება, ჰიგიენის წესები, ვისაც ჯანმრთელობა და ასაკი ხელს გიწყობთ, აიცერით და ასე გამოავლინეთ თქვენი პასუხისმ­­გებლობა როგორც საკუთარი თავის, ისე სხვების მიმართაც.

მეორე – ჩვენ მაქსიმალურად შეგიქმნით კომ­­ფორტს, რომ ამ ახალ რეალობასთან ადაპტირება გაგიმარტივდეთ. აქ იმას ვგულისხმობ, რომ ყველა ონლაინსერვისის შეუფერხებელ მიწოდებას გპირდებით, განვითარებასაც გავაგრძელებთ და კიდევ უფრო ინტენსიურადაც. ჩვენთვის მთავარია, დის­­კომფორტი არ შეგექმნათ და თავი უსაფრთხოდ იგრძნოთ.

და მესამე და ყველაზე მნიშვნელოვანი – ჩვენ ვზრუნავთ თქვენზე. გვესმის თქვენი და ყველაფერს გავაკეთებთ, რომ სერვისები იყოს სწრაფი და ხელ­­მისაწვდომი.

სულ ბო­ლო: რა მო­დის ხვალ?

მეტი ციფრულობა – ეს გარდაუვალი იქნება. რაც უფრო მალე ავუწყობთ ამ ტენდენციას ფეხს, რაც უფრო მეტად განვივითარებთ ციფრულ უნარებს, რაც უფრო მეტად ვადაპტირდებით ონლაინსივ­­რცესთან, მით მეტი დრო დაგვრჩება სხვა ურთი­ერთობებისთვის და, რაც მთავარია, უფრო მზად დავხვდებით ახალ, დიდ გამოწვევებს, რაც ასევე აუცილებლად იქნება.

დატოვე კომენტარი

1 კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

This site is protected by reCAPTCHA and the Google Privacy Policy and Terms of Service apply.