ბაზარზე გამოჩენიდან მალევე, „ველიმ“ მომხმარებელს ქართული ელექტრონული კომერციისთვის, იმ დროს, ერთი შეხედვით, შეუფერებელი სამომხმარებლო გამოცდილება შესთავაზა, რითაც ყველაზე ძვირფასი რესურსი – დრო დაუზოგა. როგორც კომპანიაში განმარტავენ, ამ შედეგს ტექნოლოგიური ცოდნისა და მომხმარებლებისაგან მიღებული უკუკავშირის ოპერაციულ მოწყობაში სწრაფი ასახვა და ტექნოლოგიური მოქნილობა განაპირობებს. ამასთან, მნიშვნელოვან როლს ასრულებს კორპორაციული კულტურა, რომელიც ადამიანზე, მის საჭიროებებსა და ინტერესებზე დგას – ამას „ველიში“ „ადამიანოცენტრულობას“ უწოდებენ.
რა პროცესს გადის იდეა წარმოსახვიდან ხორცშესხმამდე და როგორ ახერხებს „ველის“ გუნდი ტექნოლოგიური სიახლეების სულ რაღაც რამდენიმე დღეში დანერგვას? რა პრინციპებს ეფუძნება „ველის“ კორპორაციული კულტურა და როგორია კომპანიის ახალი, კორპორაციული მიმართულება – „ველი ბიზნესი“? ეს ის თემებია, რომლებზეც „ველის“ აღმასრულებელ დირექტორს, არჩილ ფირიაშვილს ვესაუბრეთ. ცხადია, არჩილთან კომპანიის გასული წელიც შევაჯამეთ და 2023 წლის გეგმები მიმოვიხილეთ.
არჩილ, როგორი იყო გასული წელი „ველისთვის“? შეასრულეთ თუ არა გეგმა, რომელიც წლის დასაწყისში გქონდათ?
გასული წელი „ველისთვის“ ძალიან წარმატებული იყო. ჩვენთვის წარმატების ყველაზე ნათელი გამოვლინება ისაა, მომხმარებლები ონლაინვაჭრობაში, ე.წ. „იქომერსში“ რომ დავაბრუნეთ. „ველი“ ამ ბიზნესში რომ შევიდა, ბაზარზე დიდი უნდობლობა იყო, როგორც მომწოდებლების, ასევე მომხმარებლების მხრიდან. უნდობლობა იმ დალექილი მეხსიერების ნაყოფი იყო, ჩვენს საზოგადოებაში რომ არსებობდა და ყველას ერთხელ მაინც რომ გაგვიგია, ამ ფრაზით: „საქართველოში იქომერსი არ მუშაობს“. ჩვენს მთავარ მიღწევად სწორედ იმას მივიჩნევთ, რომ „ველის“ გამოჩენის შემდეგ ამ ფრაზამ აქტუალობა დაკარგა და დღეს სულ უფრო და უფრო ხშირად გვესმის, რომ „ონლაინვაჭრობა ამუშავდა“.
ასე რომ დიახ, ვფიქრობ, რომ წლის დასაწყისში დასახული გეგმა შესანიშნავად შევასრულეთ.
როგორც ჩემთვის, ანუ უცხო თვალისთვის ჩანს, „ველიმ“ ბაზარზე საკუთარი ადგილი მალე იპოვა, რასაც, ცხადია, უმეტესწილად, თქვენ მიერ შემოთავაზებული სამომხმარებლო გამოცდილება უზრუნველყოფს. რა მდგენელებსეფუძნება „ველის“ სამომხმარებლო გამოცდილება?
როგორც ვთქვი, ბაზარზე „ველის“ გამოჩენამდე მომხმარებლებს ონლაინვაჭრობაზე გული ჰქონდათ აცრუებული, ასე რომ ერთ-ერთ სტრატეგიულ მიმართულებად თავიდანვე საუკეთესო სამომხმარებლო გამოცდილების შექმნა ავირჩიეთ – ამ არჩევანმა, თავის წილ, დიდი გავლენა მოახდინა „ველის“ კორპორაციულ სტრუქტურაზე. ამ მხრივ, ერთი ან ორი მიმართულების, ან როგორც თქვენ ამბობთ, მდგენელების, გამორჩევა რთულია, რადგან საუბარია კომპანიის ფილოსოფიაზე, რომელიც ყველა პატარა თუ დიდ გადაწყვეტილებაში ითარგმნება. ყველაფერს, რასაც კომპანიაში ვაკეთებთ, პირველ რიგში, მომხმარებლის გამოცდილების ფილტრში ვატარებთ.
ამ ყველაფერში, ცხადია, დიდი მნიშვნელობა აქვს ტექნოლოგიებსაც, რომლებიც ყველა ჩანაფიქრს რეალობად აქცევს. უშუალოდ ტექნოლოგიური გუნდის, ანუ კომპანიის გონებრივი კაპიტალის გარდა, განსაკუთრებულ ყურადღებას ვაქცევთ იმ ტექნოლოგიურ ცოდნასა და უკუკავშირს, რომელსაც მუდმივად ვაგროვებთ.
არჩილ, ეს მიდგომა არახალია – მას მსოფლიოს წამყვანი კომპანიები წლებია, რაც იყენებენ. თუმცა, ცხადია,თითოეული კომპანიის გზა მაინც უნიკალურია. რა არის ის მთავარი პრინციპები, რომლებიც „ველის“ ყოველდღიურსაქმიანობაში გადააქვს?
იცით რა, არ არის ერთი კონკრეტული პრინციპი, რომელსაც ვიყენებთ – პროცესი პრინციპების ერთობლიობას, მათ მრავალფეროვნებას მოიაზრებს. თუმცა რამდენიმეს მაინც გამოვყოფდი.
ტექნოლოგიურ ან თუნდაც ონლაინბიზნესში ინოვაციები, ხშირად, ინოვაციებისთვის კეთდება, მაგრამ ჩვენ ცენტრში ყოველთვის ადამიანს ვაყენებთ და ვფიქრობთ, ჩვენი გადაწყვეტილებები მასზე რა გავლენას მოახდენს. საკუთარ თავს ვეკითხებით, მომხმარებლებს დროს თუ ვუზოგავთ, საყიდლებს თუ ვუიაფებთ, პროდუქტის მოძებნის პროცესს თუ ვუმარტივებთ, მათ ყოველდღიურობას უფრო საინტერესოს თუ ვხდით და საერთოდ, ვანიჭებთ კი მათ სიხარულს? გადაწყვეტილებების მიღებისას სწორედ ამ შეკითხვებს ვეყრდნობით, რადგან ვცდილობთ, მომხმარებლებთან ბმა შევინარჩუნოთ და ყოველთვის გვახსოვდეს, რომ ტექნოლოგიები ადამიანებისთვის გვჭირდება. ამგვარად, ჩვენს პრინციპებს შორის უმთავრესი – ადამიანოცენტრულობაა.
ჩვენი ტექნოლოგიური არქიტექტურა საფუძველშივე მოქნილობას ეფუძნება – მარტივად რომ გითხრათ, ვაღიარებთ, რომ არ ვიცით, მომხმარებელს რა სურს. მთავარია, არასდროს ჩავარდე საკუთარი მოსაზრებებისა და წარმოდგენების ტყვეობაში და თუ მიხვდი, რომ ბაზარი სხვა მიმართულებით ვითარდება, შესაბამისად გადაეწყო. ჩვენს შემთხვევაში, გადაწყობა ტექნოლოგიის შეცვლას შეიძლება ნიშნავდეს და თუ თავიდანვე მოდულარულ სისტემას არ ააგებ, რაც მიკროსერვისულ არქიტექტურას გულისხმობს, დროთა განმავლობაში მოქნილობას დაკარგავ. დღევანდელ სამყაროში, მით უმეტეს ტექნოლოგიურ ბიზნესსა და ელექტრონულ კომერციაში, მოქნილობა გადამწყვეტია.
უფრო ზოგადი შეკითხვა მინდა დაგისვათ: „ველიში“ სიახლეებს როგორ ნერგავთ? რა პროცესს გადიხართ იდეიდანმის ხორცშესხმამდე?
გამომდინარე იქიდან, რომ „ველი“ ადამიანოცენტრული კომპანიაა, ამ პრინციპს სიახლეების დანერგვის პროცესშიც ვეყრდნობით. აღნიშნული პროცესი, შემდეგ ფაზებს გადის:
- მონაცემთა ანალიზისა და კვლევების სინთეზით მომხმარებელთა ქცევას ვაკვირდებით და მათ საჭიროებებსა და ყველაზე მტკივნეულ წერტილებს, ე.წ. „ფეინ ფოინთებს“ ვპოულობთ.
- მიღებული სიიდან გამოვყოფთ იმ ყველაზე მნიშვნელოვან საკითხებს, რომლებიც მომხმარებელს ყოველდღიური შოპინგის გამარტივებაში ყველაზე მეტად წაადგება.
- მას შემდეგ, რაც სიახლეების საბოლოო სიას ვადგენთ, სერვისისა თუ პროდუქტის პროტოტიპზე მუშაობას ვიწყებთ და მას გარკვეული ტიპის მომხმარებლებზე ვტესტავთ, უკუკავშირი რომ მივიღოთ.
- უკუკავშირის საფუძველზე პროდუქტის მოდიფიცირებას ვახდენთ და შემდეგ, სიახლეს ვნერგავთ.
ეს პროცესი მომხმარებელზე მორგებული და სწორად შექმნილი სიახლეების დანერგვის საშუალებას გვაძლევს. თანაც, ეს პროცესი სტრუქტურირებულია, რაც ძალიან მნიშვნელოვანი და სასარგებლოა. თუმცა ხშირად საკუთარ ინტუიციასაც ვენდობით და თუ რაღაცის გვჯერა, რისკს ვიღებთ და პროდუქტს ვქმნით.
არჩილ, ის პროცესი, რომელიც ახლა დაახასიათეთ, მრავალსაფეხურიანია და, წესით, დიდი დროც უნდა წაიღოს, მაგრამ „ველი“ მაინც ახერხებს, რომ ახალი გადაწყვეტები ერთ-ორ დღეში დანერგოს. როგორ?
სიახლის ბაზარზე დასანერგად საჭირო დრო, ე.წ „თაიმ თუ მარკეტი“ მართლაც მცირეა და სისწრაფეში შემდეგი ფაქტორები გვეხმარება:
ორგანიზაციული კულტურა – ჩვენი გუნდის თითოეული წევრის ყოველდღიური საფიქრალი და საზრუნავი მომხმარებლებზე ორიენტირებული სერვისის შექმნაა და, შესაბამისად, ყველა გადაწყვეტილებას და მიზანს ორგანიზაციული კულტურის ფილტრში ვატარებთ. ჩვენი გუნდის თითოეული წევრისთვის „ველიში“ მუშაობა სასიამოვნო და სახალისოა, რადგან ყველა აკეთებს იმას, რისი გაკეთებაც მოსწონს.
გადაწყვეტილების მიღების თავისუფლება – ჩვენი გუნდები გადაწყვეტილებას დამოუკიდებლად იღებენ და თითოეულ პროექტს ისე უდგებიან, როგორც საკუთარ მინი-სტარტაპს.
შეცდომების დაშვების არ გვეშინია – ჩვენი შიდა კულტურა კოლაბორაციულია, რადგან პრობლემებს, რომელთაც ერთად ვქმნით, ერთადვე ვაგვარებთ. თუ შეგვეშალა, პრობლემის გადაჭრის გზას მალევე ვპოულობთ, რადგან შეცდომების დაშვების არ გვეშინია.
კიდევ ერთი მიმართულება, რომელზეც აუცილებლად უნდა ვილაპარაკოთ – „ველი ბიზნესია“, ანუ B2B-მიმართულება,რომელიც კომპანიამ ახლახან გაუშვა. რა შესაძლებლობა დაინახეთ ბიზნესებთან ურთიერთობაში და რა შედეგებსელოდებით?
ბაზარზე დაკვირვების შემდეგ აღმოვაჩინეთ, რომ ბიზნესის მხარეს ელექტრონულ კომერციაში დიდი წინაღობებია, მათ შორის არის ბიუროკრატიული პროცესები, რომლებიც დროსთან და ხარჯებთან არის დაკავშირებული. ამის ფონზე გაგვიჩნდა სურვილი, ჩვენი ფენომენალური სამომხმარებლო გამოცდილება რიტეილის ბიზნესში გადაგვეტანა და ამ სეგმენტისთვის ონლაინშოპინგი გაგვემარტივებინა. მარტივად რომ ვთქვათ, „ველი ბიზნესი“ მომხმარებლებს ონლაინშოპინგს სთავაზობს – ერთ სივრცეში და ზედმეტი ბიუროკრატიის გარეშე. ჩვენი მისიაა, ბიზნესს საუკეთესო სამომხმარებლო გამოცდილება შევუქმნათ და ამ მხრივ ბაზრის ლიდერებად ვიქცეთ.
არჩილ, რა სიახლეებს შესთავაზებთ მომხმარებლებს 2023 წელს?
წელს ჩვენი კალენდარი ინოვაციებითა და სიახლეებით დატვირთული იქნება. იანვარი და თებერვალი ორი მნიშვნელოვანი სიახლით დავიწყეთ: პირველი „ველი ბიზნესია“ და მეორე – ჩვენი პლატფორმის ინგლისურენოვანი ვერსია. დანარჩენ გეგმებს წინასწარ არ ვახმოვანებთ, მაგრამ გეტყვით, რომ წელს ტემპს კიდევ უფრო ავუჩქარებთ. ბაზრის ლიდერები ვართ, მაგრამ არ ვჩერდებით – პირიქით, განვითარებას უფრო და უფრო სწრაფი ტემპით ვაგრძელებთ.
S
