ფოტო: Getty Images
Mercedes-ის იტალიელმა პილოტმა, კიმი ანტონელიმ, ფორმულა 1-ის ისტორიაში ყველაზე ახალგაზრდა მსოფლიო ჩემპიონის ტიტული მოიპოვა. 20 წლის მრბოლელმა მექსიკის გრან-პრი მესამე პოზიციაზე დაასრულა, რბოლა კი მაქს ფერსტაპენმა მოიგო, მეორე ადგილი ლუის ჰემილტონს ერგო.
ანტონელი პირველი იტალიელია ალბერტო ასკარის შემდეგ, რომელმაც ფორმულა 1-ის მსოფლიო ჩემპიონის ტიტული მოიპოვა. ასკარი ჩემპიონი ბოლოს 1953 წელს გახდა. ამასთან, ანტონელიმ სებასტიან ფეტელის რეკორდიც გააუმჯობესა: გერმანელი პილოტი ჩემპიონი 2010 წელს, 23 წლის ასაკში გახდა.
„ეს დაუჯერებელი სეზონი იყო. მაქსთან და ლუისთან ერთად პოდიუმზე ყოფნა მართლაც განსაკუთრებულია. მომავალშიც არაერთ საინტერესო ბრძოლას ველოდები“, – განაცხადა ანტონელიმ.
Mercedes-ის პილოტმა ტიტულის მოპოვება რთული სარბოლო უქმეების მიუხედავად შეძლო. რბოლის დაწყებამდე ანტონელი შეუძლოდ გახდა და ხუთშაბათს დაგეგმილი მედიის დღე გამოტოვა.
მექსიკის გრან-პრის გამარჯვებული კი, როგორც აღვნიშნეთ, ოთხგზის მსოფლიო ჩემპიონი მაქს ფერსტაპენი გახდა. ნიდერლანდელმა პილოტმა ამ ტრასაზე გამარჯვება მეექვსედ იზეიმა.
ლუის ჰემილტონმა, რომელმაც შაბათს კვალიფიკაციაში პირველი ადგილი დაიკავა, რბოლის ლიდერობა მეოთხე წრეზე თანაგუნდელ შარლ ლეკლერთან ბრძოლაში დაკარგა.
შარლ ლეკლერმა რბოლა მეოთხე პოზიციაზე დაასრულა, McLaren-ის მოქმედმა ჩემპიონმა ლანდო ნორისმა კი მეხუთე ადგილი დაიკავა. ანტონელის თანაგუნდელი ჯორჯ რასელი მეექვსეზე გავიდა.
მექსიკის გრან-პრის შემდეგ ფორმულა 1-ის კალენდარში ბრაზილიისა და ლას-ვეგასის ეტაპებია დარჩენილი. სეზონის ბოლო რბოლები კატარსა და აბუ-დაბიში უნდა გაიმართოს, თუმცა რეგიონში არსებული არასტაბილური ვითარების გამო ჯერჯერობით უცნობია, ჩატარდება თუ არა ორივე ეტაპი დაგეგმილი განრიგით.
Forbes Georgia-ს აღმასრულებელი რედაქტორი
