ამსტერდამში მსოფლიოში პირველი 3D პრინტერით დამზადებული ლითონის ხიდი აიგო

ამსტერდამში მსოფლიოში პირველი 3D პრინტერით დამზადებული ლითონის ხიდი აიგო

მსოფლიოში პირველი სრულად 3D პრინტერის დახმარებით დამზადებული მეტალის დეტალებით აგებული ხიდი ამსტერდამში გაიხსნა. ხიდი სპეციალური სენსორებითაა აღჭურვილი, რომლებიც ფეხით მოსიარულეთა გადაადგილების სიმჭიდროვეს აკონტროლებს.

ხიდი წითელი ჩირაღდნების უბანში, ერთ-ერთ უძველეს არხზე აიგო და მის გახსნას დედოფალი მაქსიმაც დაესწრო. ხიდი ჰოლანდიელი დიზაინერის, იორის ლაარმანის დაპროექტებულია. მისი სიგრძე 12 მეტრია და კონცეპტი ფუტურისტულ მოტივებზეა დაფუძნებული.

ხიდის ამგები კომპანიის, MX3D-ის განცხადებით, ხიდის დიზაინი არქიტექტურაში 3D რობოტიკის ტექნოლოგიების გამოყენების შესაძლებლობებსა და პერსპექტივებს ასახავს. კომპანიის CTO-ს განცხადებით, ახალი ტექნოლოგია დიზაინერებსა და არქიტექტორებს ახალ შემოქმედებით იარაღსა და ინსტრუმენტს აწვდის.

ხიდში ჩამონტაჟებული სენსორები მეცნიერებს ტექნოლოგიის გამართულობის დადგენაში დაეხმარება. ლონდონის Imperial College-ის მკვლევრები ხიდის სტრუქტურულ ცვლილებებს რეალურ დროში დააკვირდებიან და ზეწოლის შემთხვევაში მისი ცვლილების შემთხვევებს შეისწავლიან.

გარდა ამისა, დაკვირვებით შეგროვებული ინფორმაცია დიზაინერებსა და არქიტექტორებს 3D ტექნოლოგიის გრძელვადიანი გამოყენების შესაძლებლობებსაც გააცნობს და ~ამგვარი ტექნოლოგიით დამზადებული ფოლადის სამომავლო გამოყენების პერსპექტივებსაც დასახავს.

ადგილობრივი ოფიციალური პირები იმედოვნებენ, რომ ხიდი სულ მალე ახალ ტურისტულ ცენტრად იქცევა და წითელი ჩირაღდნების უბანს ახალ სიცოცხლეს შესძენს.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

This site is protected by reCAPTCHA and the Google Privacy Policy and Terms of Service apply.