Associated Press
აზერბაიჯანმა უარყო ინფორმაცია, რომ გერმანიის დაზვერვის ყოფილი ხელმძღვანელი აუგუსტ ჰანინგი, რომელსაც საიდუმლო დოკუმენტების შეძენასა და მათი უცხოური სადაზვერვო სამსახურისთვის გამოყენებას ედავებიან, აზერბაიჯანელ აგენტთან კონტაქტში იმყოფებოდა.
აზერბაიჯანის მედიისა და მაუწყებლობის საბჭომ განცხადებაში აღნიშნა, რომ ბრალდებები საქმეში აზერბაიჯანის კავშირის შესახებ უსაფუძვლოა. „ამ დეზინფორმაციული ოპერაციის უკან მდგომი ძალების ბოროტი განზრახვა აზერბაიჯანსა და გერმანიას შორის ურთიერთობების შელახვის მცდელობაა,“ – ნათქვამია საბჭოს განცხადებაში.
გერმანიის საგარეო დაზვერვის სამსახურის (BND) ყოფილი ხელმძღვანელი ჰანინგი სამშაბათს სახელმწიფო ღალატის და ჯაშუშობის ბრალდებით დააკავეს. ეს გერმანიაში უსაფრთხოების სფეროში „ცივი ომის“ პერიოდის შემდეგ მომხდარი ერთ-ერთი ყველაზე მასშტაბური სკანდალია.
პროკურატურის განცხადებით, აუგუსტ ჰანინგმა BND-ის ოფისის მენეჯერისგან საიდუმლო დოკუმენტები ფულადი ანაზღაურების სანაცვლოდ მიიღო და ისინი უცხოური სადაზვერვო სამსახურის ოფიცრისთვის ანალიტიკური მასალის მოსამზადებლად გამოიყენა.
გერმანიის უსაფრთხოების საკითხებზე მომუშავე მაღალი რანგის კანონმდებლის განცხადებით, საგარეო დაზვერვის ყოფილი ხელმძღვანელის დაკავება უპრეცედენტო შემთხვევაა და შესაძლოა ზიანი მიაყენოს ქვეყნის სადაზვერვო კავშირებს მოკავშირე სახელმწიფოებთან.
საქმესთან აზერბაიჯანის კავშირის შესახებ ინფორმაცია პირველად ჟურნალმა „შპიგელმა“ სამშაბათს გაავრცელა.
პროკურატურის მონაცემებით, მას შემდეგ, რაც 2005 წელს გერმანიის საგარეო დაზვერვის სამსახურის ხელმძღვანელის პოსტზე მისი შვიდწლიანი მუშაობა დასრულდა, ჰანინგმა BND-ის ოფისის მენეჯერთან შეთანხმება დადო, რომლის მიხედვითაც, ფულადი ანაზღაურების სანაცვლოდ, კონფიდენციალურ სადაზვერვო ინფორმაციას მიიღებდა.
ოფისის მენეჯერი, რომელიც კონფიდენციალურობის დაცვის მიზნით „მანფრედ დ.“-ს სახელით არის მოხსენიებული, ასევე დააკავეს. „მანფრედ დ.“ BND-ის ხელმძღვანელთა ოფისის მენეჯერად 2026 წლის მარტამდე მუშაობდა. შესაბამისად, მას შესაძლოა წვდომა ჰქონოდა გერმანიის უახლეს სადაზვერვო მონაცემებზე იმ პერიოდში, როდესაც, პროკურატურის მტკიცებით, სამსახურიდან დოკუმენტების გაჟონვა ხდებოდა.
