ფოტო: REUTERS/Yves Herman
ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკავშირი მზად არის, კანადას ბლოკის პირველი „ასოცირებული წევრის“ სტატუსის მიღების შესაძლებლობა შესთავაზოს. ამასთან დაკავშირებით მან ევროპარლამენტში ევროკავშირის მდგომარეობის შესახებ ყოველწლიურ მიმართვაში განაცხადა.
ფონ დერ ლაიენის თქმით, ევროკავშირისა და კანადის თანამშრომლობა უკვე მოიცავს ისეთ მიმართულებებს, როგორიცაა უკრაინის მხარდაჭერა, თავდაცვა, ნედლეული და მიწოდების ჯაჭვები. მისი განცხადებით, მხარეებს ასევე აქვთ საერთო ხედვა ხელოვნურ ინტელექტზე, კლიმატის ცვლილებასა და არქტიკის საკითხებზე.
„მინდა, თქვენთან ერთად ვიმუშაო, რათა კანადას გავუხსნათ კარი და ის ევროკავშირის პირველი ასოცირებული წევრი გახდეს“, – განაცხადა ფონ დერ ლაიენმა.
მისივე თქმით, ევროკავშირი და კანადა თანამშრომლობის გაღრმავებას რამდენიმე მიმართულებით გეგმავენ, მათ შორის წარმოებაში, ხელოვნურ ინტელექტში, კრიტიკულ მინერალებსა და ენერგეტიკაში. ფონ დერ ლაიენმა ასევე ისაუბრა თავდაცვის ინდუსტრიული ბაზების დაახლოებასა და არქტიკის ერთობლივ პროექტად ქცევაზე.
კანადის პრემიერ-მინისტრმა მარკ კარნიმ მიმდინარე კვირაში განაცხადა, რომ ქვეყანა ევროკავშირთან „უნიკალური ალიანსის“ შესაძლებლობას ეძებს, თუმცა ევროკავშირის წევრობას არ განიხილავს. კარნის ევროპული ვიზიტი კანადასა და აშშ-ს შორის სავაჭრო ურთიერთობების გაუარესებას მოჰყვა, მათ შორის ტარიფებთან დაკავშირებული დაპირისპირების ფონზე.
ფონ დერ ლაიენმა ხაზი გაუსვა, რომ შემოთავაზებული თანამშრომლობა სხვა ქვეყნების წინააღმდეგ არ არის მიმართული. ევროკავშირის ხელშეკრულებები ამ ეტაპზე „ასოცირებული წევრის“ ფორმალურ სტატუსს არ ითვალისწინებს.
