როგორია მინიმალური ხელფასები ევროკავშირის ქვეყნებში?

Euronews-მა ევროკავშირის მასშტაბით მინიმალური თვიური ხელფასები შეადარა. თუმცა, ვიდრე უშუალოდ შედარებაზე გადავალთ, უნდა აღინიშნოს, რომ ევროკავშირის წევრი 27 ქვეყნიდან ეროვნული მინიმალური ხელფასი 22-ს აქვს დაწესებული. ამ უკანასკნელთა შორის არ არის დანია, იტალია, ავსტრია, ფინეთი და შვედეთი. კვიპროსმა კი ეროვნული მინიმალური ხელფასი გასული წლის დასაწყისში შემოიღო.

გარდა ამისა, ეროვნული მინიმალური ხელფასი აქვს ევროკავშირის 10 კანდიდატ და პოტენციურ კანდიდატ ქვეყანას შორის რვას – ესენია მონტენეგრო, მოლდოვა, ჩრდილოეთი მაკედონია, საქართველო, ალბანეთი, სერბეთი, თურქეთი და უკრაინა. ამ სიაში არ არის ბოსნია და ჰერცეგოვინა და კოსოვო.

ევროკავშირის ქვეყნებში მინიმალური თვიური ხელფასი ერთმანეთისგან ძალიან განსხვავდება. ის ყველაზე დაბალი, €477 ბულგარეთშია, ყველაზე მაღალი კი, €2,571 ლუქსემბურგში.

მინიმალური ხელფასი 2,000 ევროზე მეტია უკვე ნახსენებ ლუქსემბურგში და ევროკავშირის წევრ კიდევ სამ ქვეყანაში – ირლანდიაში, ნიდერლანდებსა და გერმანიაში. ხოლო საფრანგეთში ის 1,767 ევროს, ესპანეთში კი 1,323 ევროს შეადგენს.

აღსანიშნავია, რომ ევროკავშირის წევრი 22 ქვეყნიდან 13-ში მინიმალური თვიური ხელფასი 1,000 ევროზე ნაკლებია. ზუსტად 1,000 ევროს შეადგენს კვიპროსის მინიმალური თვიური ხელფასი.

ეს მაჩვენებელი მერყეობს 360 ევროდან (ჩრდილოეთ მაკედონია) 613 ევრომდე (თურქეთი) კანდიდატ და პოტენციურ კანდიდატ ქვეყნებს შორის. აღსანიშნავია, რომ ევროკავშირის წევრ ბულგარეთში (€477) უფრო დაბალი მინიმალური ხელფასია, ვიდრე თურქეთში, სერბეთსა და მონტენეგროში, რომლებიც EU-ს კანდიდატი ქვეყნები არიან.

მინიმალური თვიური ხელფასი (2024 წლის იანვარი)

ლუქსემბურგი €2571
ირლანდია €2146
ნიდერლანდები €2070
გერმანია €2054
ბელგია €1994
საფრანგეთი €1767
ესპანეთი €1323
სლოვენია €1254
კვიპროსი €1000
პოლონეთი €978
პორტუგალია €957
მალტა €925
ლიეტუვა €924
საბერძნეთი €910
ხორვატია €840
ესტონეთი €820
ჩეხეთი €764
სლოვაკეთი €750
ლატვია €700
უნგრეთი €697
რუმინეთი €663
ბულგარეთი €477

სიის წევრთა რიგითობა იცვლება, როდესაც მინიმალური ხელფასის მსყიდველობითი უნარის სტანდარტში (PPS) განხილვას ვიწყებთ, რაც, Euronews-ის განმარტებით, უფრო სამართლიან შედარებას იძლევა.

PPS არის Eurostat-ის მიერ განსაზღვრული „ხელოვნური ვალუტის ერთეული“, რომელიც ეფუძნება ქვეყნებს შორის ფასების დონის განსხვავებას. PPS-ის ერთ ერთეულს, თეორიულად, შეუძლია შეიძინოს ერთი და იგივე რაოდენობის საქონელი და მომსახურება თითოეულ ქვეყანაში.

მინიმალური ხელფასი, რომელიც მორგებულია PPS-ზე, ევროკავშირის ქვეყნებში ამჟამად მერყეობს ბულგარეთის 816 ევროდან, გერმანიის 1,883 ევრომდე.

მინიმალური თვიური ხელფასი მსყიდველობითი უნარის სტანდარტებში (2024 წლის იანვარი)