ფოტო: ჯოელ სეჯეტი / AFP / GETTY IMAGES
მთელი კარიერის განმავლობაში სალაროებიდან $10 მილიარდის შემოსავლის მიღების შემდეგ, ჯეიმს კამერონი დღეს ჰოლივუდის ყველაზე ექსკლუზიურ კლუბშია.
კინობიზნესში 40-წლიანი მოღვაწეობის განმავლობაში, რეჟისორი ჯეიმს კამერონი თავის პროექტებზე სულ უფრო დიდ ფსონებს დებდა, და ამავდროულად, ელოდა, რომ ბილეთების გაყიდვებით ყოველთვის ოქროს მთებს დააგროვებდა. 1980-იანი წლებიდან დაწყებული Terminator-ით, Aliens-ით, Titanic-ითა და Avatar-ის პირველი ორი ფილმით, 71 წლის ოსკაროსანმა რეჟისორმა გლობალურ სალაროებში დაახლოებით $10 მილიარდი გამოიმუშავა; აქედან მოდის მისი პირადი წმინდა ქონების დიდი ნაწილი, რომელიც, Forbes-ის შეფასებით, ამჟამად $1.1 მილიარდია.
ეს კამერონს მილიარდერის სტატუსის მქონე კინორეჟისორების შორტლისტში ათავსებს, სადაც ასევე არიან ჯორჯ ლუკასი, სტივენ სპილბერგი, პიტერ ჯექსონი და ტაილერ პერი. განსხვავებით მათგან, ვისაც ჰოლივუდს გარეთ მნიშვნელოვანი გარიგებები ან შემოსავლის წყაროები ჰქონდათ, კამერონმა ამ ნიშნულს თითქმის მთლიანად თავისი ფილმების წყალობით მიაღწია. მიუხედავად ამისა, ინტერვიუებში ის თავს იკავებს თავისი სიმდიდრის ხსენებისგან (წარმომადგენლის მეშვეობით მან უარი თქვა ამ სტატიისთვის ინტერვიუს მიცემაზე).
„მინდა მილიარდერი ვიყო“, – თქვა კამერონმა Puck-ის ჟურნალისტ მეტ ბელონისთან ცოტა ხნის წინ მიცემულ პოდკასტ-ინტერვიუში. „მილიარდერად გახდომა გულისხმობს გარკვეულ გარიგებებს, რომლებიც მანამდე არ არსებობდა, ეს ერთი, და მეორე, რომ 30 წლის განმავლობაში ერთი ცენტიც კი არ დამიხარჯავს“.
უახლოეს თვეებში ის კიდევ უფრო გამდიდრდება. Forbes-ის შეფასებით, კამერონი მინიმუმ $150 მილიონს გამოიმუშავებს (გადასახადებისა და მოსაკრებლების გარეშე) Avatar: Fire and Ash-იდან, იმ პირობით, რომ ფილმი გაამართლებს მაღალი გაყიდვების მოლოდინს. იანვრის დასაწყისისთვის მან უკვე გადააჭარბა $1 მილიარდს, მაგრამ, სავარაუდოდ, ის ჩამორჩება მის ორ წინამორბედ ფილმში მოპოვებულ $2 მილიარდს.
კამერონი კატეგორიულად ამტკიცებდა, რომ მას აქვს გეგმები მეოთხე და მეხუთე Avatar-ის გადასაღებად, მაგრამ მიანიშნა, რომ შემდეგომ სიქველებზე თანხმობისთვის ამ ფილმს კიდევ ერთხელ მოუწევს სალაროში საკუთარი შესაძლებლობების დამტკიცება.
„ეს ცოტა სიგიჟეა, არა? – თქვა მან ცოტა ხნის წინ თავისი მაქსიმალისტური წარმოების სტილის შესახებ. – პირველი ფილმით ამდენი ფული რომ არ გვეშოვა, ამას ვერასდროს გავაკეთებდით – ანუ, სრული სიგიჟეა“.
