ფოტო: PA Media
აშშ-ის პრეზიდენტმა, დონალდ ტრამპმა, განაცხადა, რომ ირანთან ცეცხლის შეწყვეტის დროებით შეთანხმებას გაახანგრძლივებს, მიუხედავად იმისა, რომ მოლაპარაკებები შეწყვეტილია. ცნობისთვის, დროებითი შეთანხმების ვადა დღეს, 22 აპრილს იწურებოდა.
„ჩვენ გვთხოვეს, ირანის ქვეყანაზე თავდასხმა შევაჩეროთ მანამ, სანამ მათი ლიდერები და წარმომადგენლები ერთიან წინადადებას არ შეიმუშავებენ“, – დაწერა ტრამპმა სოციალურ პლატფორმა Truth Social-ზე და დასძინა, რომ მან სამხედროებს ირანის პორტებისა და გემების ბლოკადის გაგრძელების მითითება მისცა.
აშშ-ის ხაზინის მდივანმა სკოტ ბესენტმა კიდევ ერთხელ დაადასტურა, რომ ვაშინგტონი თეირანზე ზეწოლას გააგრძელებს. მისი თქმით, აშშ ეტაპობრივად შეამცირებს ირანის შესაძლებლობას, მიიღოს, გადაადგილოს და დააბრუნოს ფინანსური რესურსები, ხოლო ნებისმიერი პირი ან გემი, რომელიც ბლოკადის გვერდის ავლას შეეცდება, სანქციების რისკის წინაშე დადგება.
ამავე დროს, აშშ-ის ვიცე-პრეზიდენტმა ჯეი დი ვენსმა პაკისტანში სამშვიდობო მოლაპარაკებებისთვის დაგეგმილი ვიზიტი გააუქმა, რადგან ირანმა ამერიკელთა წინადადება უპასუხოდ დატოვა.
ვიდრე ცეცხლის შეწყვეტის რეჟიმის გახანგრძლივებაზე განაცხადებდა, ტრამპმა ადრე თქვა, რომ შეთანხმების არმიღწევის შემთხვევაში აშშ-ის სამხედროები დარტყმების განახლებისთვის მზად იყვნენ.
პრეზიდენტის თქმით, აშშ-ის სამხედროებმა დააკავეს ირანისკენ მიმავალი გემი, რომელიც, მისი განცხადებით, „ჩინეთიდან გაგზავნილი საჩუქარი“ იყო. თუმცა უცნობია, ეხებოდა თუ არა ეს განცხადება იმ გემს, რომლის შესახებაც მედია წერდა, რომ მას შესაძლოა სამხედრო ტვირთი გადაჰქონდა.
ირანის საგარეო საქმეთა სამინისტროს წარმომადგენელმა აშშ-ის ბლოკადა „ომის დანაშაულად“ შეაფასა და განაცხადა, რომ ის ირანის მოქალაქეების კოლექტიურ დასჯას ემსახურება.
ირანსა და აშშ-ს შორის ცეცხლის შეწყვეტა 8 აპრილს შეთანხმდა, მას შემდეგ რაც ტრამპი თეირანს მასშტაბური დარტყმებით დაემუქრა. შეთანხმება არაერთი დარღვევის ბრალდებით მიმდინარეობს. პროცესში ჩართულია ისრაელის, რომლის სამხედრო მოქმედებებმა რეგიონში დამატებითი დაძაბულობა შექმნა.
მოლაპარაკებების მთავარი საკითხი ირანის მიერ ურანის გამდიდრებაა. ვაშინგტონი ითხოვს მის 20-წლიანი შეჩერებას, მაშინ როცა თეირანმა მხოლოდ ხუთწლიანი პაუზისთვის მზაობა გამოთქვა.
