ფოტო: EFE/Carlos Ortega
კოლუმბიაში გასულ კვირას მომხდარი ძლიერი მიწისძვრის შედეგად გამოწვეული ეკონომიკური ზარალი, წინასწარი შეფასებით, $9.58 მილიარდს აღწევს. ამის შესახებ ქვეყნის პრეზიდენტმა, აბელარდო დე ლა ესპრიეიამ, ორშაბათს განაცხადა.
კოლუმბიის პრეზიდენტის თქმით, დაახლოებით $7.83 მილიარდი დანგრეულ შენობებზე, ხოლო $1.76 მილიარდი განადგურებულ ინფრასტრუქტურაზე მოდის. „უბრალოდ წარმოიდგინეთ, თუ რა მასშტაბის კატასტროფასთან გვაქვს საქმე“, — განაცხადა დე ლა ესპრიეიამ და დასძინა, რომ ზარალის არსებული შეფასება სამომავლოდ შესაძლოა კვლავ შეიცვალოს. ესპრიეიას თქმით, მონაცემები მიწისძვრის შედეგად სხვადასხვა რეგიონში მიყენებული ზიანის დეტალური შეფასების შემდეგ განახლდება.
გასულ კვირას, კოლუმბიაში მომხდარი 7.4 მაგნიტუდის სიმძლავრის მიწისძვრის შედეგად, ქვეყნის დასავლეთ ნაწილში, მათ შორის დიდ ქალაქებში, კალისა და პერეირაში, არაერთი შენობა დაინგრა და დაზიანდა. სტიქიას 280 ადამიანი ემსხვერპლა, 4,000-ზე მეტი დაშავდა, ხოლო 143 ადამიანი ამ დრომდე დაკარგულად მიიჩნევა.
კოლუმბიაში მომხდარი დამანგრეველი მიწისძვრის შედეგად ყველაზე მეტად დაზარალებული რეგიონებისთვის ევროკავშირი სამხრეთ ამერიკის ქვეყანას €2.1 მილიონს გამოუყოფს.
შედარებისთვის, მეზობელ ვენესუელაში 24 ივნისის მიწისძვრის შედეგად მიყენებული ეკონომიკური ზარალი, წინასწარი შეფასებით, $37 მილიარდს შეადგენს. მონაცემები გაეროს კატასტროფების რისკის შემცირების ოფისმა გასულ თვეში გამოაქვეყნა.
