BGA-ის დამფუძნებლები, ნათია ჯანაშია და დავით ცეცხლაძე ბიძინა ივანიშვილს მიმართავენ — რა წერია მიმართვაში

BGA-ის დამფუძნებლები, ნათია ჯანაშია და დავით ცეცხლაძე ბიძინა ივანიშვილს მიმართავენ —  რა წერია მიმართვაში

ბრიტანულ-ქართული აკადემიის დამფუძნებლები და 30%-ის მფლობელები, ნათია ჯანაშია და დავით ცეცხლაძე საჯარო მიმართვას უგზავნიან ქართული ოცნების თავმჯდომარეს ბიძინა ივანიშვილს, რომელშიც მას ბრიტანულ-ქართული აკადემიის მენეჯმენტის ცვლილების საკითხით დაინტერესებას სთხოვენ და ინვესტორ კომპანიას, რომელმაც სკოლის წილის 70% საინვესტიციო პირობებით შეისყიდა, და მის ხელმძღვანელს, ირაკლი გილაურს სკოლის მენეჯმენტიდან უკანონოდ, “გავლენების დახმარებით“ ჩამოშორებაში ადანაშაულებენ.

“მოგმართავთ თხოვნით, გულთან ახლოს მიიტანოთ ჩვენი, სკოლის ათასობით მოსწავლის, მასწავლებლისა და თანამშრომლის ინტერესები. ჩვენ მტკიცედ გვჯერა, რომ 2012 წლის მონაპოვარი – ბიზნესის ხელშეუხებლობა და სამართლიანი სასამართლოს უფლება – ჩვენზეც გავრცელდება“, – წერენ ნათია ჯანაშია და დავით ცეცხლაძე ბიძინა ივანიშვილისადმი საჯარო მიმართვაში.

ნათია ჯანაშია და დავით ცეცხლაძე წარსულზე საუბრისას აღნიშნავენ, რომ მათი ოჯახი “ნაციონალური მოძრაობის მმართველობის დროს რეპრესირებულია” ოჯახია: “2011 წელს სააკაშვილის მართლმსაჯულებამ, როგორც ასიათასობით სხვა უდანაშაულო ადამიანი, გამოგონილი ბრალდებით გამასამართლა მე, დავით ცეცხლაძე და ჯოჯოხეთურ ციხეში მამყოფა ერთი წლის განმავლობაში. ციხეში გაუსაძლის პირობებში ყოფნის გამო შემექმნა ჯანმრთელობის პრობლემები. გარდა ამისა, სააკაშვილის რეჟიმმა ჩვენს ოჯახს წაართვა დიდძალი თანხა და 15 წლის განმავლობაში ნაშენები სამი ბიზნესი. ხელისუფლებაში ქართული ოცნების მოსვლამ კი გაგვიჩინა იმედები, რომ ნაციონალური მოძრაობის წარმომადგენლები ვეღარასდროს გაბედავდნენ ბიზნესის რეკეტს, ადამიანთა წამებასა და მკვლელობას”

ბრიტანულ-ქართული აკადემია დავით ცეცხლაძემ 2006 წელს დააფუძნა. სკოლას მალევე შეუერთდა ნათია ჯანაშია: “19 წლის განმავლობაში, ჩვენი თავდაუზოგავი შრომის შედეგად სკოლა გახდა საუკეთესო რეპუტაციის, საერთაშორისო პროგრამების განმახორციელებელი ზოგადსაგანმანათლებლო დაწესებულება. აქ განათლების მისაღებად ჩვენს მოქალაქეებთან და ჩვენს 5 შვილთან ერთად მოდიან დიპლომატიური კორპუსისა და საერთაშორისო ორგანიზაციების წარმომადგენელთა შვილები”


გაიგეთ მეტი: 


განცხადებაში ნათია ჯანაშია და დავით ცეცხლაძე იხსენებენ საქართველოს კაპიტალის მიერ სკოლის 70%-ის შესყიდვის ეპიზოდს და აღნიშნავენ, რომ “ღრმად სწამდათ, რომ ქართული ოცნების მმართველობის პირობებში ნაციონალი ირაკლი გილაური ქონების მიტაცებას ვეღარ შეძლებდა”

ნახეთ მიმართვის ტექსტი სრულად

“2018 წლის ოქტომბერში, როგორც სკოლის დირექტორსა და დამფუძნებლებს, დაგვიკავშირდა ირაკლი გილაურის მიერ მართული კომპანიის, სს საქართველოს კაპიტალის წარმომადგენელი, ჩვენი სკოლის კურსდამთავრებული გიორგი კეთილაძე. საქართველოს კაპიტალმა შემოგვთავაზა ინვესტიციების განხორციელება სკოლაში, ახალი კამპუსების მშენებლობისა და მათ საკუთრებაში არსებული მიწის სკოლისათვის უსასყიდლოდ გადმოცემის გზით. საქართველოს კაპიტალის მიმართ სკეპტიკურად ვიყავით განწყობილი, იმის გამო, რომ მისი გენერალური დირექტორი ნაციონალური მოძრაობის მხარდამჭერი ირაკლი გილაური იყო. გიორგი კეთილაძე სწორედ იმიტომ შეირჩა ჩვენთან საკომუნიკაციოდ, რომ ჩვენი სკოლის კურსდამთავრებული იყო და მას შეეძლო, ჩვენი ნდობა მოეპოვებინა. არაერთი მცდელობის შემდეგ გიორგი კეთილაძემ დაგვარწმუნა, რომ კომპანია ლონდონის საფონდო ბირჟაზეა წარმოდგენილი და რომ თითქოს ეს ინვესტორის საუკეთესო რეპუტაციაზე მიანიშნებდა. ამით მან შეძლო ჩვენი დარწმუნება, რომ ინვესტიციის განხორციელება ორივე მხარისათვის სასარგებლო იქნებოდა: სკოლას ექნებოდა ახალი სასწავლო კამპუსები, ხოლო საქართველოს კაპიტალი შევიდოდა ზოგადი განათლების ბაზარზე, პრემიუმ-სეგმენტის სკოლაში. ამასთან, ინვესტორის პირობა იყო, რომ სკოლის მენეჯმენტში არ ჩაერეოდა, არ ჰქონდა რა ზოგადი განათლების სფეროსთვის საჭირო სპეციფიკური ცოდნა. მენეჯმენტი ჩვენ უნდა ვყოფილიყავით. საბოლოოდ, გადაწყვეტილება არა ემოციებზე დაყრდნობით, არამედ სკოლისა და მისი მოსწავლეების საუკეთესო ინტერესების გათვალისწინებით მივიღეთ. ინვესტიცია საშუალებას მოგვცემდა, სკოლის მოსწავლეების მზარდი რაოდენობის საპასუხოდ მეტი და უფრო კეთილმოწყობილი კამპუსები აგვეშენებინა”

განმცხადებლების სიტყვებით,  “5 წლის განმავლობაში საქართველოს კაპიტალს 1 თეთრის ინვესტიციაც კი არ განუხორციელებია, უარი თქვა სკოლისათვის მიწის ნაკვეთის უსასყიდლო გადმოცემაზე და დაარღვია მენეჯმენტში ჩაურევლობის პრინციპი. ბიზნესის მიტაცების გეგმის განხორციელება გილაურმა მენეჯმენტიდან ჩვენი ჩამოშორების მცდელობით დაიწყო. 2024 წლის გაზაფხულიდან მოყოლებული გილაურმა არაერთხელ სცადა დირექტორობიდან ნათია ჯანაშიას გადაყენება და მის ნაცვლად სამხრეთ აფრიკის რესპუბლიკის მოქალაქის, იოჰანეს ვან ლილის დანიშვნა”.

მიმართვაში ასევე აღნიშნულია, რომ ნათია ჯანაშია და დავით ცეცხლაძე დღეის მდგომარეობით სკოლაში შესვლას ვერ ახერხებენ: “მიუხედავად იმისა, რომ აკადემიის წილის 30% ჩვენი საკუთრებაა, გილაურის დავალებით დღეს ჩვენ მიერ დაფუძნებულ და აშენებულ სკოლაში შესვლა გვეკრძალება. ძალის გამოყენებითა და პოლიციის უკანონო ჩარევით მოახდინეს სკოლის უსაფრთხოების სამსახურის თანამშრომლების, ადვოკატისა და სხვა თანამშრომლების სკოლიდან ფიზიკური გაძევება. ამასთან, სამართალდამცავი ორგანოების მიერ უფლებამოსილების გადამეტებითა და სამოქალაქო დავაში ჩართვით განახორციელეს უსაფრთხოების სამსახურის თანამშრომლების საცხოვრებელი სახლებიდან გატაცება და პოლიციის განყოფილებაში დაშინება. დღეის მდგომარეობით, „ნაციონალური მოძრაობის“ მხარდამჭერსა და მსხვილ შემომწირველს, ირაკლი გილაურს, ოკუპირებული აქვს სკოლის შენობა, სადაც გადაადგილდებიან ცეცხლსასროლი იარაღით აღჭურვილი მათი უსაფრთხოების სამსახურის თანამშრომლები, რაც ეწინააღმდეგება კანონს და რეალურ საფრთხეს უქმნის არასრულწლოვანთა ფიზიკურ და ფსიქიკურ ჯანმრთელობას”.

მიმართვა თხოვნით სრულდება: “მოგმართავთ თხოვნით, გულთან ახლოს მიიტანოთ ჩვენი, სკოლის ათასობით მოსწავლის, მასწავლებლისა და თანამშრომლის ინტერესები. ჩვენ მტკიცედ გვჯერა, რომ 2012 წლის მონაპოვარი – ბიზნესის ხელშეუხებლობა და სამართლიანი სასამართლოს უფლება – ჩვენზეც გავრცელდება. ჩვენი ერთადერთი სურვილია, მოგვეცეს შესაძლებლობა, მართლმსაჯულება განხორციელდეს სამართლიანად და ნაციონალ გილაურს არ მიეცეს ჩვენი სკოლისა და ბიზნესის საბოლოოდ მიტაცების საშუალება. ამასთან, ღრმად გვწამს, რომ გილაურის გავლენის ქვეშ მოქცეული, სხვადასხვა სახელმწიფო სტრუქტურის თანამშრომლები მხოლოდ ერთეულები არიან და გილაურის გავლენების აღკვეთის შემთხვევაში, ყველა შესაბამისი უწყება, ვისაც ჩვენს საქმეზე
გადაწყვეტილების მიღების უფლებამოსილება აქვს, ჩვენი უფლებების დაცვის საკითხს მაღალპროფესიონალურად და კანონის უზენაესობის პრინციპის დაცვით გადაწყვეტს“ – ნათქვამია ნათია ჯანაშიასა და დავით ცეცხლაძის საჯარო მიმართვაში.


ნათია ჯანაშია სკოლას ბოლო 16 წლის განმავლობაში უძღვებოდა, ხოლო მისი მეუღლე დავით ცეცხლაძე სკოლაში მენეჯმენტის ცვლილებამდე მაღალი რგოლის მენეჯერის პოზიციას იკავებდა.