29 იანვარს, ჩეხეთის საგარეო საქმეთა მინისტრმა იან ლიპავსკიმ საქართველოს შინაგან საქმეთა სამინისტროს სამ მაღალჩინოსანს სანქციები დაუწესა. ამის შესახებ ლიპავსკიმ სოციალურ პლატფორმა X-ზე დაწერა.
„დღეს ჩემი წინადადებით მთავრობამ საქართველოს შინაგან საქმეთა სამინისტროს სამ თანამშრომელს სანქციები დაუწესა. მიზეზი მათი პირდაპირი პასუხისმგებლობაა გასულ წელს საქართველოში საპროტესტო აქციების სასტიკ ჩახშობაზე,“ – განაცხადა მან.
ამავე შინაარსის განცხადება X-ზე ჩეხეთის ელჩმა საქართველოში, პეტრ კუბერნატმაც გაავრცელა.
ჩეხურ მედიაში გავრცელებული ინფორმაციით, სანქცირებულთა სიაში არიან: ზვიად ხარაზიშვილი (ხარება) – შინაგან საქმეთა სამინისტროს განსაკუთრებულ დავალებათა დეპარტამენტის (გდდ) უფროსი; ვაჟა სირაძე – საპატრულო პოლიციის უფროსი; მირზა კეზევაძე – შინაგან საქმეთა სამინისტროს განსაკუთრებულ დავალებათა დეპარტამენტის უფროსის მოადგილე.
