FIFA-ს მიერ ოთხშაბათს გაკეთებული განცხადებით, ორგანიზაციამ წევრ ასოციაციებს მსოფლიო ჩემპიონატთან დაკავშირებული კომერციული უფლებების გაყიდვის შესახებ მის მიერ შეთავაზებულ წინადადებასთან დაკავშირებით დაშვებული შეცდომების გამო ბოდიში მოუხადა, ხოლო მმართველი ორგანოს ხელმძღვანელობამ კიდევ ერთხელ დაადასტურა მხარდაჭერა პრეზიდენტ ჯანი ინფანტინოს მიმართ.
ცნობისათვის, FIFA-ს ხელმძღვანელობამ და მმართველმა რგოლმა მაროკოში, FIFA-ს აფრიკულ ოფისში კრიზისთან დაკავშირებული შეხვედრა ჩაატარეს, რომლის საბაბიც მსოფლიო ჩემპიონატის წილის გაყიდვის თაობაზე კრიტიკა იყო.
რაბათში გამართული შეხვედრის შემდეგ, რომელსაც FIFA-ს პრეზიდენტი ჯანი ინფანტინო, გენერალური მდივანი მატიას გრაფსტრომი და FIFA-ს მმართველი საბჭოს წევრები ესწრებოდნენ, FIFA-მ პრეზიდენტს სრული მხარდაჭერა კიდევ ერთხელ დაუდასტურა, ამავდროულად კი აღიარა, რომ FIFA-ს Forward Enterprise-ის გაუქმებული წინადადების განხილვა სხვაგვარად უნდა მომხდარიყო.
განცხადებაში აღნიშნულია, რომ FIFA-ს საბჭოს წევრებს და 211 წევრ ასოციაციას ცალკე წერილი გაეგზავნა, რომელშიც შეცდომებისთვის ბოდიშს იხდიდნენ.
FIFA-ს მიერ გავრცელებულ განცხადებაში აღნიშნულია, რომ ორგანიზაცია „აღარ მოითმენს მის მთლიანობაზე, მმართველობასა და პროცესებზე რაიმე სახის თავდასხმას“ და მიიღებს ყველა საჭირო ზომას თავისი რეპუტაციის დასაცავად.
ბოდიშმა FIFA-ს მიერ ახალი კომერციული უფლებების ორგანოს შექმნის შესახებ პროექტის დამუშავებისას დაშვებული შეცდომები კიდევ ერთხელ დაადასტურა, რაც 2016 წელს ინფანტინოს მიერ პრეზიდენტის პოსტის დაკავების შემდეგ, მისი ხელმძღვანელობისთვის ყველაზე სერიოზულ გამოწვევად იქცა.
