როგორც ჩანს, საქართველო და ქართული სამზარეულო მსოფლიოში დღითი დღე უფრო პოპულარული ხდება – სხვადასხვა ქვეყნებში ახალი ქართული რესტორანი იხსნება, ხოლო ხაჭაპური და სხვა კერძები სოციალურ ქსელებს იპყრობს. ქართული სამზარეულოს პოპულარობის ზრდაზე მიუთითებს ისიც, რომ მსოფლიოს წამყვანმა ბიზნესგამოცემამ, ამერიკულმა Forbes-მა, თბილისის საუკეთესო რესტორნების ჩამონათვალი შეადგინა, რომელშიც თორმეტი დაწესებულება შეიყვანა.
„ქართული სამზარეულო უფრო მეტია, ვიდრე გემო – ის გამოცდილებაა“, – წერს ამერიკული Forbes-ის კონტრიბუტორი, ბრიანა უილსონი. „აი, ის მომენტი რად ღირს, ქართულ პომიდორს პირველად რომ დააგემოვნებ ან საქართველოს გულუხვი საბოძვრის სეზონურობას რომ აღმოაჩენ, სოკოსა და თუთას. და ის, რომ გაიფიქრებ, ნეტავ იმ ქალებმა „დეზერტირების ბაზარში“ აჯიკასთან ერთად ყველა სხვა სუნელ-სანელებელს რომ ყიდიან, მიშვილონ და ყველაფერი მასწავლონ, რაც იციანო? ისიც, როცა უეცრად, საიდანღაც სახლის ღვინო და ჭაჭა გაჩნდება. აი, სწორედ ესაა ქართული სამზარეულოს სული და გული, რომელიც ადამიანებს ასე ძალიან იზიდავთ“.
რაკიღა ქართული სამზარეულოს პოპულარიზება ჩვენი ქვეყნისთვის განსაკუთრებულად მნიშვნელოვანია, თბილისის საუკეთესო რესტორნების ჩამონათვალს, რომელზეც ამერიკულმა Forbes-მა იმუშავა, გამოცემის ქართულენოვანი რედაქცია უცვლელად გთავაზობთ.
ნინიას ბაღი
მისამართი: დიმიტრი უზნაძის ქ. 97, თბილისი, საქართველო
უზნაძის 97 ნომერში, აღდგენილ ძველ თბილისურ სახლში მდებარე „ნინიას ბაღი“ შეფ-მზარეულ მერიკო გუბელაძის ქალაქური ოაზისია. აღნიშნულ რესტორანში მყუდრო სახლური გარემო, სტაბილურად გემრიელი კერძები და კარგი შიდა და გარე სივრცეებია დაგხვდებათ – აი, სწორედ ესაა ის, რის გამოც ადამიანებს უკან დაბრუნება სურთ.
![](https://imageio.forbes.com/specials-images/imageserve/6343960ae7969525e7de06ad/Ninias-Garden-Best-Restaurants-Tbilisi/960x0.jpg?format=jpg&width=960)
ელეგია
მისამართი: ივანე ჯავახიშვილის ქ. 7, თბილისი, საქართველო
ილია ჭავჭავაძის სახელობის ლიტერატურულ-მემორიალურ მუზეუმში მდებარე რესტორანი „ელეგია“ ამ სივრცის გემოვნებიან და ბუნებრივ ნაწილად გვევლინება. ის კერძები, რომელთაც „ელეგიაში“ ამზადებენ, მრავალშრიან ქართულ სამზარეულოს იმგვარად წარმოადგენენ, რომელთა არშეყვარება, უბრალოდ შეუძლებელია.
![](https://imageio.forbes.com/specials-images/imageserve/6343965ccde58f6b1dde06a9/Elegia-Best-Restaurants-Tbilisi/960x0.jpg?format=jpg&width=960)
კაფე ლიტერა
მისამართი: ივანე მაჩაბლის ქ. 13, თბილისი, საქართველო
„კაფე ლიტერა“ ის ადგილია, სადაც ევროპა საქართველოს ხვდება და სადაც საკვები მომავლის ხედვითა და წარსული გამოცდილების სინთეზით იქმნება – ის სიმბოლურად ეხმიანება მწერალთა სახლის იდეას, რომლის ბაღშიც მდებარეობს. საინტერესოა, რომ „კაფე ლიტერა“ ერთია იმ ორი თბილისური რესტორნიდან, რომლებიც World’s 50 Best-ის მიერ შედგენილ რეიტინგში მოხვდა.
![](https://imageio.forbes.com/specials-images/imageserve/6343968be7969525e7de06af/Cafe-Littera-Best-Restaurants-Tbilisi/960x0.jpg?format=jpg&width=960)
ბარბარესთან
მისამართი: დავით აღმაშენებლის გამზირი 12, თბილისი, საქართველო
რესტორანმა „ბარბარესთან“ თბილისურ გასტრონომიულ რუკაზე მისი კუთვნილი ადგილი გახსნისთანავე დაიმკვიდრა და მალევე, World’s 50 Best-ის რეიტინგშიც მოხვდა. ამ რესტორანს, რომელიც ძველ საყასბოში მდებარეობს და მე-19 საუკუნის მზარეულის, ბარბარე ჯორჯაძის სახელს ატარებს, ანტიკვარობისა და მოძველებულობის არაფერი სცხია, მეტიც – ეს ეკლექტიკური ქართული რესტორანი სხვებისგან სრულიად განსხვავებულია.
![](https://imageio.forbes.com/specials-images/imageserve/634396aacde58f6b1dde06ab/Barbarestan-Best-Restaurants-Tbilisi/960x0.jpg?format=jpg&width=960)
ქეთო და კოტე
მისამართი: მიხეილ ზანდუკელის ჩიხი 3, თბილისი, საქართველო
სხვა თბილისური რესტორნებისგან „ქეთო და კოტეს“ დეტალებისადმი პატივისცემა და არაჩვეულებრივი ცინცხალი ადგილობრივი პროდუქტი გამოარჩევს. რესტორნის ტრადიციული თეთრი სუფრები, მცოდნე თანამშრომლები და ქალაქის არაჩვეულებრივი ხედები არის ის, რაც „ქეთო და კოტეს“ თბილისის ერთ-ერთ ყველასათვის დასამახსოვრებელ ადგილად აქცევს.
![](https://imageio.forbes.com/specials-images/imageserve/634396ca211b4e929c646333/Keto-and-Kote-Best-Restaurants-Tbilisi/960x0.jpg?format=jpg&width=960)
ოცი
მისამართი: იოანე შავთელის ქ. 20, თბილისი, საქართველო
„ოცი“ ის ადგილია, რომელზეც თბილისში ბევრი საუბრობს, რადგან „ოცის“ შეფ-მზარეულმა, გიორგი ნინუამ თბილისური სამზარეულოს წესების გადაწერა განიზრახა. კლასიკური ქართული კერძების ახლებური რეცეპტების წყალობით, „ოცში“ შეხვდებით, როგორც ჭაჭაში დაძველებულ ორაგულს, ასევე კარამელის სოუსში შქმერულად მომზადებულ ქათამს.
![](https://imageio.forbes.com/specials-images/imageserve/634396e87233002b57d6632e/OtsY-Best-Restaurants-Tbilisi/960x0.jpg?format=jpg&width=960)
Cafe Daphna
მისამართი: ათონელის ქ. 29, თბილისი, საქართველო
როგორც მას დამფუძნებლები უწოდებენ, Café Daphna სახლური ხინკლის სახლია, რომელშიც მეგობრებთან ერთად თუ წახვალთ, ხინკლის ყველა იმ ნაირსახეობის გასინჯვას შეძლებთ, რომელიც კაფეში არის ხელმისაწვდომი. თუ კაფეში ცივ ამინდში მოხვდით, ხინკალთან ერთად ჩიხირთმა მიირთვით და ღვინო არ დაგავიწყდეთ!
![](https://imageio.forbes.com/specials-images/imageserve/63439705fe115deb5961f5c2/Cafe-Daphna-Best-Restaurants-Tbilisi/960x0.jpg?format=jpg&width=960)
პოლიფონია
მისამართი: ჭონქაძის ქ. 29, თბილისი საქართველო
„პოლიფონია“ თბილისის ერთ-ერთი საუკეთესო რესტორანია, რომელმაც ეს წოდება, სრულიად დამსახურებულად მიიღო იქ გამოყენებული ცინცხალი პროდუქტისა და საუკეთესო ნატურალური ღვინოების უბადლო კომბინირების გამო. „პოლიფონია“ იმდენად ჰარმონიულია, რამდენად ჰარმონიულიცაა ის ხალხური სიმღერა, რომლიდანაც რესტორნის სახელწოდება მოდის.
![](https://scontent.ftbs2-2.fna.fbcdn.net/v/t39.30808-6/307038497_767118328039655_2275797760223399721_n.jpg?_nc_cat=101&ccb=1-7&_nc_sid=730e14&_nc_ohc=zeVuNBQao0AAX8ZKeAp&_nc_ht=scontent.ftbs2-2.fna&oh=00_AT_yFuwYdMR7iCpcltKRR1LvyP-8QeXtoOpozuPgTkA29Q&oe=634CD6F4)
კლიკეს ხინკალი
მისამართი: შიო ჩიტაძის ქ. 1, თბილისი, საქართველო
თბილისში ჩამოსვლა და ტრადიციული ხინკლის სახლის არმონახულება, უბრალოდ არ შეიძლება. რუსთაველის გამზირთან ახლოს, ფერდობზე მდებარე „კლიკეს ხინკალში“ ქალაქში საუკეთესო ხინკალი აქვთ. ხინკალთან ერთად, „ლაღიძის წყლების“ ლიმონათის ან ცივი ჩამოსასხმელი ლუდის შეკვეთა არ დაგავიწყდეთ.
![](https://imageio.forbes.com/specials-images/imageserve/63439796cde58f6b1dde06ad/Klikes-Khinkali-Best-Restaurants-Tbilisi/960x0.jpg?format=jpg&width=960)
სალობიე ბია
მისამართი: შოთა რუსთაველის გამზირი 17, თბილისი, საქართველო
მარტივი ქართული კერძები, რომელთაც საუცხოოდ ამზადებენ რუსთაველის თეატრთან მდებარე ამ სალობიეში, ისაა, რამაც „სალობიე ბიას“ თბილისურ გასტრონომიულ რუკაზე საკუთარი ადგილი დაუმკვიდრა. რესტორნის გამორჩეულ კერძებს შორისაა შქმერული და ლობიანი.
![](https://imageio.forbes.com/specials-images/imageserve/634397b430f94eb36c4bef7e/Salobie-Bia-Best-Restaurants-Tbilisi/960x0.jpg?format=jpg&width=960)
Dadi Wine, Bar and Shop
მისამართი: შალვა დადიანის ქ. 4, თბილისი, საქართველო
სოლოლაკში მდებარე Dadi Wine, Bar and Shop-ი ის ადგილია, რომელსაც ახლებური და არატრადიციული ქართული ღვინისა და გემრიელი სეზონური კერძების დასაგემოვნებლად უნდა ესტუმროთ.
![](https://check24.ge/storage/gastronomy/126/JGXeOJUDGbLi9FZHVBqig54GGLtC9HBn0bz6vEa9.jpeg)
მაფშალია
მისამართი: დავით აღმაშენებლის გამზირი 137, თბილისი, საქართველო
„მაფშალია“ ის ადგილია, რომელშიც ადგილობრივს უფრო მარტივად გადაეყრებით, ვიდრე ტურისტს. ამ რესტორანში ნამდვილი საქართველოს გაცნობას შეძლებთ და ეს ფასებზეც აისახება. აუცილებლად დააგემოვნეთ ოსტრი და მეგრული ხაჭაპური და ორივეს „ყაზბეგის“ ლუდი დააყოლეთ.
![](https://fastly.4sqi.net/img/general/width960/41367168_DxwS0ARb0P_KNOCZOSzLF9ecRzewvzQklet42MHZBRA.jpg)
* აღნიშნულ სტატიაში გამოყენებული აღწერები ინგლისურენოვანი მასალის მოკლე შინაარსს წარმოადგენს.