ფოტო: Science History Institute / Wikimedia Commons
Moderna-ს თანადამფუძნებელი რობერტ ლენჯერი კვლავ მილიარდერი გახდა. Forbes-ის შეფასებით, ბიოტექნოლოგიური კომპანიის აქციების ფასის მკვეთრი ზრდის შედეგად ლენჯერის ქონებამ $1.7 მილიარდს მიაღწია.
Moderna-ს აქციების ფასი დღეს თითქმის გაორმაგდა მას შემდეგ, რაც კომპანიამ კიბოს საწინააღმდეგო ექსპერიმენტული ვაქცინის გვიანი, მესამე ფაზის კლინიკური კვლევის დადებითი შედეგები გამოაქვეყნა.
ლენჯერი Moderna-ს დაახლოებით 3%-იან წილს ფლობს. კომპანიის აქციების ამჟამინდელი ფასის მიხედვით, მისი წილის ღირებულება დაახლოებით $1.7 მილიარდამდე გაიზარდა, მაშინ როდესაც სამშაბათს ეს მაჩვენებელი დაახლოებით $730 მილიონი იყო.
Moderna-ს აქციების წლევანდელი მინიმუმის, $29.81-ის დაფიქსირებისას, 2 იანვარს, ლენჯერის წილის ღირებულება დაახლოებით $343 მილიონს შეადგენდა.
მნიშვნელოვნად გაიზარდა Moderna-ს სხვა დამფუძნებლების ქონებაც. კომპანიის თანადამფუძნებლის ნუბარ აფეიანის ქონება $184 მილიონით, $2.1 მილიარდამდე გაიზარდა, ხოლო აღმასრულებელი დირექტორის, სტეფან ბანსელის ქონებას $2.5 მილიარდი შეემატა და $4.8 მილიარდს მიაღწია. Moderna-ს დამფუძნებელ ინვესტორ ტიმოთი სპრინგერის ქონება კი $948 მილიონით გაიზარდა და დაახლოებით $2.2 მილიარდი შეადგინა.
აქციების ზრდა მას შემდეგ დაიწყო, რაც Moderna-მ და Merck-მა მელანომის წინააღმდეგ შექმნილი პერსონალიზებული ვაქცინის მესამე ფაზის კვლევის შედეგები გამოაცხადეს. ვაქცინა mRNA-ტექნოლოგიაზეა დაფუძნებული და Merck-ის იმუნოთერაპიულ პრეპარატ Keytruda-სთან კომბინაციაში გამოიყენება.
Moderna-ს განცხადებით, ვაქცინამ მძიმე ფორმის კანის კიბოს, მელანომის, განმეორების შემთხვევები შეამცირა და გაახანგრძლივა პერიოდი, რომლის განმავლობაშიც პაციენტებს დაავადება ხელახლა არ უვითარდებოდათ.
ეს mRNA-ზე დაფუძნებული კიბოს საწინააღმდეგო თერაპიისთვის პირველი წარმატებული საბოლოო, მესამე ფაზის კლინიკური კვლევაა, რაც Moderna-სთვის მნიშვნელოვანი მიღწევაა და კომპანიის აქციების მკვეთრი ზრდის მთავარი მიზეზიც გახდა.
