ფოტო: Yuliia Kokosha / Getty Images
მედიასაშუალებები ხშირად აქვეყნებენ საშუალო ხელფასების რეიტინგს მსოფლიოს სხვადასხვა ქვეყნიდან ან პოლიტიკურ-ეკონომიკური გაერთიანების შიგნით. თუმცა უმეტეს შემთხვევაში კონკრეტული სახელმწიფოების ხელფასების შედარება არარელევანტურია. მიზეზი კი ისაა, რომ ყველა ქვეყანაში განსხვავებული ცხოვრების დონე და, შესაბამისად, ხარჯებია.
ამიტომაც შეერთებული შტატების კონკრეტულ შტატში არსებული საშუალო ხელფასის შედარება რომელიმე ევროპული სახელმწიფოს საშუალო ხელფასთან ხშირად არაეფექტიანია. ასე იმიტომ ხდება, რომ რეიტინგებში არ ითვალისწინებენ მსყიდველობით უნარს (ინგლ. Purchasing Power Parity (PPP)).
წინამდებარე სტატიაში ხელფასები ცხოვრების ხარჯებთან მიმართებით არის გამოთვლილი. მონაცემები აღებულია შრომის საერთაშორისო ორგანიზაციის ანგარიშიდან და 2024 წლის სტატისტიკას ეფუძნება. აღსანიშნავია, რომ აშშ-ის, გაერთიანებული სამეფოსა და კანადის შემთხვევაში 2025 წლის მონაცემებია გამოყენებული.
შედეგები სწორედ იმაზე მიუთითებს, რომ ნომინალურად მაღალი ხელფასი ყოველთვის არ ნიშნავს უკეთესი ცხოვრების დონეს და მაღალ მსყიდველობით უნარს. ზოგიერთ სახელმწიფოში ძვირი ქირა, სამომხმარებლო კალათის მაღალი ხარჯი და სხვა სერვისების სიძვირე შემოსავლის მსყიდველუნარიანობას მნიშვნელოვნად ამცირებს. ზოგიერთ სახელმწიფოში კი მაღალი ხელფასი ხშირად დაბალ საცხოვრებელ ხარჯებთანაა კომბინირებული, რაც შემოსავალს მაღალ მსყიდველუნარიანობას ანიჭებს.
მსყიდველობითი უნარის მიხედვით კორექტირებული მაჩვენებლებით, მსოფლიოში პირველ ადგილზე ლუქსემბურგია, სადაც ყოველთვიური შემოსავალი $9,300-ს აჭარბებს. შედარებისათვის, ეს დასაქმებულებს საშუალო სტატისტიკურ ამერიკელთან შედარებით თითქმის 50%-ით მეტ მსყიდველობით უნარს ანიჭებს.
რეიტინგში მეორე პოზიცია ბელგიას უკავია, სადაც, დაკორექტირებული მაჩვენებლით, საშუალო ყოველთვიური შემოსავალი $8,297-ია. რეიტინგის მესამე ადგილზე მოხვედრილ ნიდერლანდებში კი ეს მაჩვენებელი $7,234-ს შეადგენს. როგორც ხედავთ, ბენილუქსის ქვეყნებში ცხოვრების დონე შემოსავლების გათვალისწინებით მსოფლიოში ყველაზე მაღალია.
რეიტინგის მეოთხე პოზიცია ასევე ევროპულ სახელმწიფოს, ავსტრიას უკავია ($7,234). შეერთებული შტატები კი, $6,273-დოლარიანი ყოველთვიური შემოსავლით, მეხუთე პოზიციაზე იმყოფება. ის ისეთ მდიდარ ჩრდილოევროპულ სახელმწიფოებს უსწრებს, როგორებიცაა ფინეთი ($6,253) და ნორვეგია ($5,760).
რეიტინგის ათეულში აშშ ერთადერთი არაევროპული სახელმწიფოა. საკმაოდ მაღალშემოსავლიანი შვეიცარია იქ არსებული ცხოვრების მაღალი ხარჯების გამო მე-14 პოზიციაზე ხვდება, მსყიდველობითი უნარის პარიტეტის კორექტირებული მაჩვენებლით კი შემოსავალი $4,683-ს შეადგენს.
გაერთიანებული სამეფო რეიტინგის მე-17 პოზიციაზე იმყოფება ($4,124). საინტერესოა ისიც, რომ რეიტინგის 25-ეულში არ ხვდება არც ერთი აზიური სახელმწიფო, მათ შორის არც იაპონია და არც სამხრეთი კორეა. რეიტინგში მეორე არაევროპული სახელმწიფო კანადაა, რომელიც მე-13 პოზიციას იკავებს ($4,747).
| რეიტინგი | ქვეყანა | საშუალო თვიური ხელფასი (PPP-ით კორექტირებული, 2024) |
|---|---|---|
| 1 | ლუქსემბურგი | $9,307 |
| 2 | ბელგია | $8,297 |
| 3 | ნიდერლანდები | $7,234 |
| 4 | ავსტრია | $6,832 |
| 5 | აშშ | $6,273 |
| 6 | ფინეთი | $6,253 |
| 7 | ნორვეგია | $5,760 |
| 8 | დანია | $5,512 |
| 9 | ირლანდია | $5,441 |
| 10 | იტალია | $5,326 |
| 11 | სლოვენია | $5,291 |
| 12 | ესპანეთი | $5,166 |
| 13 | კანადა | $4,747 |
| 14 | შვეიცარია | $4,683 |
| 15 | კვიპროსი | $4,566 |
| 16 | შვედეთი | $4,538 |
| 17 | გაერთიანებული სამეფო | $4,124 |
| 18 | ესტონეთი | $4,065 |
| 19 | ლატვია | $4,011 |
| 20 | ლიეტუვა | $4,001 |
| 21 | ხორვატია | $3,945 |
| 22 | ჩეხეთი | $3,561 |
| 23 | საბერძნეთი | $3,546 |
| 24 | პოლონეთი | $3,082 |
| 25 | საფრანგეთი | $3,064 |
