ფოტო: REUTERS/Charles Platiau
გერმანიისა და საფრანგეთის ლიდერებმა ახალი თაობის საბრძოლო თვითმფრინავის ერთობლივი განვითარების პროექტის შეწყვეტის გადაწყვეტილება მიიღეს. გადაწყვეტილება მრავალთვიანი ჩიხის შემდეგ იქნა მიღებული, რადგან პროექტში ჩართულმა სამხედრო-სამრეწველო კომპანიებმა შეთანხმებას ვერ მიაღწიეს.
გერმანიის კანცლერმა, ფრიდრიხ მერცმა და საფრანგეთის პრეზიდენტმა, ემანუელ მაკრონმა საკითხი გასულ კვირას, მონტენეგროში გამართული ევროკავშირი-დასავლეთ ბალკანეთის სამიტის ფარგლებში განიხილეს. გერმანული მხარის ინფორმაციით, ლიდერები მივიდნენ დასკვნამდე, რომ პროექტის ირგვლივ არსებული უთანხმოების გადაჭრის პერსპექტივა აღარ არსებობდა.
გერმანიის ოფიციალური პირების განცხადებით, მერცმა მაკრონს ურჩია, ერთობლივი საბრძოლო თვითმფრინავის პროექტის გაგრძელებაზე უარი ეთქვა.
საფრანგეთის პრეზიდენტის ადმინისტრაციამ დაადასტურა, რომ მხარეებმა პროექტი დეტალურად განიხილეს და სინანული გამოთქვეს იმის გამო, რომ მთავარმა ინდუსტრიულმა პარტნიორებმა – Airbus-მა, რომელიც გერმანიასა და ესპანეთს წარმოადგენს, და Dassault Aviation-მა, შეთანხმებას ვერ მიაღწიეს.
პროექტი, რომელიც 2017 წელს მაკრონმა და გერმანიის ყოფილმა კანცლერმა, ანგელა მერკელმა წამოიწყეს, ევროპის თავდაცვის ინდუსტრიის ერთ-ერთ ყველაზე ამბიციურ ინიციატივად მიიჩნეოდა. მისი საერთო ღირებულება დაახლოებით 100 მილიარდ ევროს შეადგენდა და მასში ესპანეთიც მონაწილეობდა.
პროექტის შეწყვეტა იმის ფონზე ხდება, როდესაც დასავლელი სამხედრო ლიდერები რუსეთისგან მომდინარე მზარდ საფრთხეზე საუბრობენ, ხოლო აშშ ევროპულ ქვეყნებს თავდაცვის ხარჯების ზრდისა და სამხედრო შესაძლებლობების გაძლიერებისკენ მოუწოდებს.
მიუხედავად გადაწყვეტილებისა, საფრანგეთის პრეზიდენტის ადმინისტრაციაში აცხადებენ, რომ ფრანგულ-გერმანული თანამშრომლობა თავდაცვის სფეროში კვლავ აუცილებელია როგორც ორი ქვეყნისთვის, ისე მათი ევროპელი პარტნიორებისთვის.
