ფოტო: APM Terminals
2026 წლის II კვარტალში საქართველოს ნავსადგურებსა და ტერმინალებში 4,611 გემი შემოვიდა, რაც გასული წლის შესაბამის პერიოდთან შედარებით გემების სხვადასხვა ტიპის მიხედვით განსხვავებულ დინამიკას აჩვენებს.
საქსტატის მონაცემებით, შემოსული გემების 47.3% გენერალური (ზოგადი სახის) ტვირთის გადამზიდი იყო, 24.9% – თხევადი ტვირთმზიდი, 19.3% – კონტეინერმზიდი, ხოლო 8.5% ნაყარი ტვირთმზიდი და სპეციალიზებული გემები.
წინა წლის შესაბამის პერიოდთან შედარებით, II კვარტალში საქართველოს ნავსადგურებმა და ტერმინალებმა 39.1%-ით მეტი ნაყარი ტვირთმზიდი, 34.8%-ით მეტი კონტეინერმზიდი და 17.3%-ით მეტი თხევადი ტვირთმზიდი გემი მიიღეს. გენერალური ტვირთის გადამზიდი გემების რაოდენობა 2.3%-ით გაიზარდა, ხოლო სპეციალიზებული გემების – 65.0%-ით შემცირდა.
შემოსული გემების ყველაზე დიდი ნაწილი პანამის დროშის ქვეშ დაცურავდა – 19.1%. შემდეგ მოდიოდა თურქეთის დროშის ქვეშ მცურავი გემები 15.2%-ით, ლიბერიის – 11.3%-ით და მალტის – 7.2%-ით. დანარჩენი 47.3% სხვა ქვეყნების დროშის ქვეშ მცურავ გემებზე მოდიოდა.
საქსტატის ანგარიშის თანახმად, 2026 წლის II კვარტალში საქართველოს ნავსადგურები 4.7 ათას მგზავრს მოემსახურა, რაც გასული წლის შესაბამის პერიოდთან შედარებით 54.5%-ით მეტია.
მგზავრთა საერთო ნაკადში გასული მგზავრების წილი 53.2%-ს შეადგენდა და შემოსული მგზავრების წილს აღემატებოდა.
2026 წლის აპრილ-ივნისში საქართველოს ნავსადგურებმა და ტერმინალებმა 5.36 მილიონი ტონა ტვირთი გადაამუშავეს, რაც 2025 წლის II კვარტლის მაჩვენებელზე 33.0%-ით მეტია.
გადამუშავებული ტვირთის ყველაზე დიდი ნაწილი გენერალურ ტვირთზე მოდიოდა – 47.8%. თხევადი ტვირთის წილი 30.5% იყო, ხოლო ნაყარი ტვირთის – 21.7%.
