ფოტო: Getty Images
აშშ-ის სენატის ქვეკომიტეტი OpenAI-ის AI-აგენტების მიერ ივლისში ხელოვნური ინტელექტის მოდელების ჰოსტინგის პლატფორმა Hugging Face-ის სისტემებზე განხორციელებულ კიბერთავდასხმას იძიებს. გამოძიება მას შემდეგ დაიწყო, რაც ინციდენტმა AI-ის უსაფრთხოებასთან დაკავშირებით ახალი კითხვები გააჩინა.
გამოძიების შესახებ პირველად ინფორმაცია Axios-მა გაავრცელა. გამოცემის ცნობით, სენატორმა ჯოშ ჰოულიმ, მისურის შტატის რესპუბლიკელმა და სენატის შიდა უსაფრთხოების კომიტეტის კატასტროფების მართვის ქვეკომიტეტის თავმჯდომარემ, OpenAI-ს ინციდენტთან დაკავშირებით კითხვებზე პასუხის გაცემა და შესაბამისი დოკუმენტების წარდგენა მოსთხოვა.
ჰოულის წერილის მიხედვით, OpenAI-მ მოთხოვნილი ინფორმაცია 1-ელ ოქტომბრამდე უნდა წარადგინოს. ამ დროისთვის უცნობია, კონკრეტულად რა მიმართულებით წარიმართება გამოძიების შემდგომი ეტაპები ან რა ზომების მიღებას განიხილავს სენატი.
OpenAI-მ აგვისტოში ინციდენტის ტექნიკური ანგარიში თავად გამოაქვეყნა. კომპანიის განცხადებით, ივლისში კიბერუსაფრთხოების შიდა ტესტირების დროს მისმა მოდელებმა უსაფრთხოების კონტროლების გვერდის ავლა, ინტერნეტთან წვდომის მოპოვება და მესამე მხარის სისტემებზე, მათ შორის Hugging Face-ზე, შეღწევა შეძლეს.
კომპანიის განმარტებით, AI-აგენტებმა უსაფრთხოების რამდენიმე ხარვეზის გამოყენებით Hugging Face-ის სერვერებზე კოდის გაშვების შესაძლებლობა მოიპოვეს. ერთ-ერთ სერვერზე მათ სრული ადმინისტრაციული წვდომაც მიიღეს და შეზღუდულ კერძო მონაცემებსა და კომპანიის საკომუნიკაციო პლატფორმის მონაცემებზე წვდომა მოიპოვეს. OpenAI-ის თქმით, ინციდენტს მომხმარებელთა მონაცემებზე, პროდუქტების ფუნქციონირებასა და ხელმისაწვდომობაზე გავლენა არ მოუხდენია.
ინციდენტის შემდეგ AI-ის უსაფრთხოების საკითხზე შეშფოთება კიდევ უფრო გაიზარდა. დამოუკიდებელი მკვლევრების შეფასებით, OpenAI-ის აგენტებმა ერთმანეთთან კოორდინაციაც შეძლეს და ტესტირების გარემოს თავდაპირველ შეზღუდვებს გასცდნენ.
სენატის გამოძიება AI-აგენტების მიერ დამოუკიდებლად მოქმედების შესაძლებლობებზე მზარდი შეშფოთების ფონზე მიმდინარეობს. აშშ-ში უკვე გაჩნდა ინიციატივები, რომლებიც კომპანიების მიერ AI-აგენტების უსაფრთხოდ გამოყენების სტანდარტების შექმნას ითვალისწინებს.
