აშშ-ის პრეზიდენტმა დონალდ ტრამპმა განაცხადა, რომ ნაკლებად სავარაუდოა, მან ირანზე ახალი თავდასხმების ბრძანება გასცეს, სანამ კონფლიქტის დასრულებისკენ მიმართული მოლაპარაკებები პროგრესს განიცდის. ეს განცხადება იმ ფონზე კეთდება, როდესაც ჰორმუზის სრუტეში გემებზე განხორციელებული თავდასხმების შესახებ ინფორმაციას ორივე ქვეყანა ავრცელებს.
„ეს დამოკიდებულია იმაზე, გააფორმებენ თუ არა ისინი ძალიან მყარ შეთანხმებას. მოკლედ რომ ვთქვათ, ნაკლებად სავარაუდოა, რომ ამის საჭიროება იყოს“, – განუცხადა ტრამპმა CNN-ს სატელეფონო ინტერვიუში.
აშშ-ის პრეზიდენტმა ასევე აღნიშნა, რომ თუ დარტყმები განახლდება, აშშ-ს უკვე განსაზღვრული აქვს ინფრასტრუქტურული სამიზნეები, მათ შორის 38 ხიდი, „რომელთა განადგურებაც, ფაქტობრივად, ერთ საათშია შესაძლებელი“.
კვირას, დღის მეორე ნახევარში, ტრამპმა სოციალურ ქსელ Truth–ზე დაწერა, რომ ირანის წინააღმდეგ „ოპერატიული ჯგუფი „რკინის კარიბჭე“ სრული დატვირთვით ამოქმედდა“. ეს კამპანია, რომლის შესახებაც პირველად მედიასააგენტო Reuters-ი იტყობინებოდა, მიზნად ისახავს თეირანის მიერ სახმელეთო საზღვრებისა და კასპიის ზღვის გავლით თანამედროვე შეიარაღებისა და სხვა სანქცირებული მასალების გადაზიდვის აღკვეთას.
ტრამპმა აღიარა, რომ გასულ კვირას აშშ-ში გამართულ შუალედურ არჩევნებში რესპუბლიკელების მარცხის ერთ-ერთი მიზეზი ირანთან დაკავშირებული ომი იყო. საინტერესოა, რომ ვიცე-პრეზიდენტი ჯეი დი ვენსი, რომელიც ტრამპის პოტენციურ მემკვიდრედ განიხილება, კიდევ უფრო შორს წავიდა და სოციალურ ქსელში პირდაპირ განაცხადა: „ჩვენი მარცხის მიზეზი ომია“.
აშშ-ის სახელმწიფო მდივანმა მარკო რუბიომ, რომელიც ასევე ტრამპის შესაძლო მემკვიდრედ მოიაზრება, ომსა და არჩევნებს შორის კავშირის შესახებ კომენტარის გაკეთებაზე უარი განაცხადა.
