ფოტო: nbcnews.com
აშშ-ის შუალედურ არჩევნებში დემოკრატიულმა პარტიამ მნიშვნელოვან გამარჯვებას მიაღწია და სენატსა და წარმომადგენელთა პალატაში უმრავლესობის მოპოვება შეძლო. დემოკრატებმა წარმატებას მიაღწიეს იმ შტატებშიც, რომლებიც წლების განმავლობაში რესპუბლიკელების მყარ დასაყრდენად მიიჩნეოდა, მათ შორის სამხრეთ კაროლინაში, ტეხასსა და აიოვაში.
როგორც პოლიტიკის სფეროს ანალიტიკოსები აცხადებენ, დემოკრატების წარმატება, ძირითადად, ეკონომიკური მდგომარეობითა და ტრამპის მიერ ირანის წინააღმდეგ ომის დაწყებით გამოწვეულმა უკმაყოფილებამ განაპირობა. კონფლიქტს, რომელიც თებერვალში დაიწყო, საწვავის ფასების მკვეთრი ზრდა მოჰყვა. საზოგადოებრივი აზრის გამოკითხვებში ამომრჩევლები განსაკუთრებით ხშირად გამოხატავდნენ შეშფოთებას ცხოვრების გაძვირების გამო და პრეზიდენტის ეკონომიკურ პოლიტიკას აკრიტიკებდნენ.
დემოკრატებმა სენატში რესპუბლიკელებს ჯამში ექვსი ადგილი წაართვეს, რითაც უმრავლესობა გარანტირებული გახადეს. მათ შორის იყო კანზასი, სადაც ადამ ჰამილტონი თითქმის საუკუნის შემდეგ პირველი დემოკრატი გახდა, რომელმაც შტატიდან სენატორის მანდატი მოიპოვა. ოჰაიოში დემოკრატმა შეროდ ბრაუნმა გაიმარჯვა და ადგილი დაიკავა, რომელიც ორი წლის წინ ვიცე-პრეზიდენტ ჯეი დი ვენსს ეკავა. ტეხასში კი შტატის წარმომადგენელმა ჯეიმს ტალარიკომ რესპუბლიკელი კენ პექსტონი დაამარცხა, მიუხედავად მისი მხარდამჭერების მხრიდან წინასაარჩევნო კამპანიაში გაწეული მნიშვნელოვანი ფინანსური დანახარჯებისა.
დემოკრატებმა წარმატებას მიაღწიეს სამხრეთ კაროლინაშიც, სადაც ენი ენდრიუსმა რესპუბლიკელი სენატორი დარლინ გრეჰემი დაამარცხა. აღსანიშნავია, რომ 2024 წლის საპრეზიდენტო არჩევნებში ტრამპმა ეს შტატი თითქმის 18%-იანი უპირატესობით მოიგო. პრეზიდენტი აქტიურად უჭერდა მხარს პექსტონისა და გრეჰემის კანდიდატურებს, მიუხედავად მათი რეპუტაციის გარშემო არსებული პრობლემებისა. პექსტონი არაერთი სკანდალის მონაწილე იყო, მათ შორის 2023 წელს მის წინააღმდეგ იმპიჩმენტის პროცედურა დაიწყო და ფასიანი ქაღალდების თაღლითობის ბრალდებებიც წაუყენეს.
არჩევნების წინ ტრამპმა რესპუბლიკელ კანდიდატებს აქტიური მხარდაჭერა გამოუცხადა და კამპანიის ფარგლებში ორ ათეულზე მეტ ღონისძიებაში მიიღო მონაწილეობა. ამომრჩევლებს ის არაერთხელ მოუწოდებდა, წარმოედგინათ, თითქოს თავადაც საარჩევნო ბიულეტენში იყო შეტანილი. თუმცა მას შემდეგ, რაც რესპუბლიკელებისთვის კონგრესში უმრავლესობის დაკარგვის საფრთხე აშკარა გახდა, ტრამპმა სოციალურ ქსელში დაწერა: „მე ბიულეტენში არ ვყოფილვარ და რომ ვყოფილიყავი, გამანადგურებელი უპირატესობით გავიმარჯვებდით“.
Forbes Georgia-ს აღმასრულებელი რედაქტორი
