ქვეყნების სიღარიბის ყველაზე გავრცელებული მაჩვენებელი არის ერთ მოსახლეზე მსყიდველობითი უნარით (PPP dollar) გამოხატული საშუალო წლიური შემოსავალი/ხარჯი. გაეროს მონაცემებით, მსოფლიოს ყველაზე ღარიბი ქვეყანა სომალია, სადაც ერთ ადამიანს წლიურად საშუალოდ 400 დოლარის შემოსავალი აქვს. საერთაშორისო სავალუტო ფონდი სომალიზე მსყიდველობითი უნარის პარიტეტის მიხედვით დათვლილ შემოსავალს არ აქვეყნებს, რადგან დათვლისთვის შესაბამისი სტატისტიკის სომალისგან მიღება შეუძლებელია.
ფონდის მიერ აღრიცხული შემოსავლების მიხედვით, ყველაზე ღარიბი ცენტრალური აფრიკის რესპუბლიკაა, სადაც ერთ ადამიანზე საშუალო წლიური შემოსავალი 712 PPP დოლარია. შემდეგ ბურუნდი მოდის 733 PPP დოლარით.
აღსანიშნავია, რომ ყველაზე ღარიბი ქვეყნების ათეული მხოლოდ აფრიკის კონტინენტის ქვეყნებს მოიცავს, სადაც დაახლოებით 215 მილიონი ადამიანი ცხოვრობს. ყველაზე მრავალმოსახლიანი ქვეყანა კონგოს დემოკრატიული რესპუბლიკაა 89 მილიონით.
ცხრილი: მსოფლიოს 10 ყველაზე ღარიბი ქვეყანა ერთ მოსახლეზე შემოსავლით, 2018 წელი
ქვეყანა | PPP დოლარი |
სომალი | – |
ცენტრალური აფრიკის რესპუბლიკა | 712 |
ბურუნდი | 733 |
კონგოს დემოკრატიული რესპუბლიკა | 816 |
მალავი | 1,202 |
ნიგერი | 1,218 |
მოზამბიკი | 1,295 |
ლიბერია | 1,327 |
სამხრეთ სუადნი | 1,527 |
სიერა ლეონე | 1,618 |
წყარო: საერთაშორისო სავალუტო ფონდი
