დღეს ფინანსთა სამინისტრომ 2018 წლის სახელმწიფო ბიუჯეტის პროექტი გამოაქვეყნა, რომლის მიხედვით, 2017 წელთან შედარებით ბიუჯეტის მთლიანი ხარჯები (გადასახდელები) 949 მლნ ლარით იზრდება.
ყველაზე მეტად რეგიონალური განვითარებისა და ინფრასტრუქტურის სამინისტროს ბიუჯეტი იზრდება – 572 მლნ ლარით. ძირითადად საგზაო ინფრასტრუქტურის გაუმჯობესებაზე დასახარჯი თანხების მოცულობა იზრდება. შემდეგ მოდის ჯანდაცვის სამინისტრო, რომლის დაფინანსება 111 მლნ ლარით იზრდება, ზრდა ძირითადად ჯანდაცვის პროექტების დაფინანსებაზე მოდის. არ იზრდება პენსია და სოციალური დახმარება.
ასევე მნიშვნელოვნად იზრდება განათლების და მეცნიერების სამინისტროს, სპორტის და ახალგაზრდობის სამინისტროს, შინაგან საქმეთა სამინისტროს და კულტურის და ძეგლთა დაცვის სამინისტროს დაფინანსება.
6 მლნ ლარით იზრდება საზოგადოებრივი მაუწყებლის დაფინანსება, ხოლო სახელმწიფო უსაფრთხოების სამსახურის 5 მლნ ლარით.
მნიშვნელოვნად მცირდება 2 სამინისტროს დაფინანსება – ეკონომიკის და თავდაცვის სამინისტროების.ეკონომიკის სამინისტროს ბიუჯეტის 116 მლნ ლარით შემცირება, ძირითადად ანაკლიის პორტისთვის მიწების გამოსყიდვის დასრულებითაა განპირობებული.
ცხრილი: უწყებები, რომელთა დაფინანსება ყველაზე მეტად იცვლება, მლნ ლარებში
უწყებები | 2017 | 2018 | სხვაობა |
რეგიონული განვითარებისა და ინფრასტრუქტურის სამინისტრო | 1258 | 1830 | 572 |
ჯანდაცვის სამინისტრო | 3416 | 3527 | 111 |
განათლებისა და მეცნიერების სამინისტრო | 1116 | 1179 | 63 |
სპორტისა და ახალგაზრდობის საქმეთა სამინისტრო | 137 | 166 | 29 |
შინაგან საქმეთა სამინისტრო | 585 | 605 | 20 |
კულტურისა და ძეგლთა დაცვის სამინისტრო | 100 | 117 | 17 |
იძულებით გადაადგილებულ პირთა, განსახლებისა და ლტოლვილთა სამინისტრო | 85 | 96 | 11 |
სოფლის მეურნეობის სამინისტრო | 258 | 266 | 8 |
გარემოსა და ბუნებრივი რესურსების დაცვის სამინისტრო | 36 | 43 | 7 |
საქართველოს ცენტრალური საარჩევნო კომისია | 60.5 | 67 | 6.5 |
სასჯელაღსრულებისა და პრობაციის სამინისტრო | 139 | 145 | 6 |
საზოგადოებრივი მაუწყებელი | 46 | 52 | 6 |
სახელმწიფო უსაფრთხოების სამსახური | 118 | 123 | 5 |
თავდაცვის სამინისტრო | 748 | 702 | -46 |
ეკონომიკის სამინისტრო | 370 | 254 | -116 |
დატოვე კომენტარი
