საქართველოს უმსხვილესი კომპანიები და მათი მფლობელები

საქართველოში რეგისტრირებული თითქმის 90 ათასი კომპანიის მხოლოდ 0.6% კლასიფიცირდება მსხვილ, 2,5% კი საშუალო ზომის საწარმოდ. ჩვენი ახალი რეიტინგი ამ ვიწრო კორპორაციულ მწვერვალს შიგნიდან გვაჩვენებს: ვინ ფლობს ქვეყნის 100 ყველაზე ძვირადღირებულ კომპანიას, როგორია მათი შეფასება და რომელ სექტორებში გროვდება ყველაზე მეტი კორპორაციული ღირებულება.

პირველ ასეულში წარმოდგენილი კომპანიების ჯამური შეფასება 86,6 მლრდ ლარია, რომლის ნახევარზე მეტი მხოლოდ 12 კომპანიაზე მოდის. თუმცა მაღალი ღირებულება ერთ სექტორში არ იყრის თავს: პირველი ოცეული 12 სექტორიდან 11-ს მოიცავს. ჯამური შეფასებით ფინანსური მომსახურება და ენერგეტიკა ლიდერობს, კომპანიების რაოდენობით კი საცალო ვაჭრობა და დისტრიბუცია.

მთავარი რედაქტორი: შოთა დიღმელაშვილი | კვლევის ხელმძღვანელი: ეგნატე შამუგია | რეპორტიორი: ანტონ კოკაია

რედაქტორის სვეტიდან

ერთი შეხედვით, საქართველოში მასშტაბირება ბევრი მიმართულებით არის შესაძლებელი. თუმცა, მეორე მხრივ, ის ფაქტი, რომ სიის ჯამური ღირებულების უდიდესი ნაწილი კომპანიების მხოლოდ 12%-ზე მოდის, დამატებითი კვლევის საფუძველს იძლევა. რეიტინგი ვერ გვეტყვის ამ სხვაობის მიზეზებს – რაშია საქმე, უკეთეს მართვაში, მასშტაბის ეკონომიაში თუ კონკურენციის სტრუქტურულ ბარიერებში?

თუმცა ერთი რამ აშკარაა: სიის წამყვანი ბიზნესები ჩვენს ყოველდღიურ საჭიროებებს უზრუნველყოფენ. ისინი უზრუნველყოფენ ფულის მოძრაობას, ელექტროენერგიის მიწოდებას. ისინი გვაკავშირებენ ერთმანეთს, გვაწვდიან მედიკამენტებს და სრულფასოვანი ცხოვრებისთვის აუცილებელ პროდუქტებსა და სერვისებს. ამ ბიზნესების ძალა მნიშვნელოვანწილად ეყრდნობა წლების მანძილზე ნაშენებ კავშირებსა და ქსელებს, ახალბედა ბიზნესისთვის ამ ყოველივეს უცებ რეპროდუცირება შეუძლებელია.

წაიკითხეთ რედაქტორის სვეტი სრულად →

ენერგო–პრო ჯორჯია

₾7.65 მლრდ

სექტორი: ენერგეტიკა და კომუნალური მომსახურება

მფლობელი: იარომირ ტესარი - 100%

„ენერგო-პრო” ჯორჯია თბილისს გარეთ ელექტროენერგიის დისტრიბუციაზე ფლობს მონოპოლიას და ამჟამად 1 200 000-ზე მეტ აბონენტს ემსახურება. კომპანია ბაზარზე 2006 წელს შემოვიდა, 2017 წელს კი კახეთის სადისტრიბუციო ენერგოკომპანიაც შეიძინა. „ენერგო-პრო ჯორჯიაში” 6000-მდე ადამიანია დასაქმებული. „ენერგო-პრო“ ჯგუფს DK Holding Investments s.r.o-ს საშუალებით სრულად ფლობს და აკონტროლებს ჩეხი ბიზნესმენი იარომირ ტესარი.

საქართველოს ბანკი

₾6.61 მლრდ

სექტორი: ფინანსური მომსახურება

მფლობელი: Lion Finance Group PLC - 100%. მათ შორის - საქართველოს კაპიტალი - 14,86% Dimensional Fund Advisors - 4,80% JPMorgan Asset Management - 4%

„საქართველოს ბანკი“ ქვეყნის უმსხვილესი კომერციული ბანკია, რომელიც 1994 წელს დაარსდა. 2006 წელს „საქართველოს ბანკი“ პირველი ქართული კომპანია გახდა, რომელმაც ლონდონის საფონდო ბირჟაზე განათავსა აქციები, ექვსი წლის შემდეგ კი პრემიუმ–ლისტინგში გადაინაცვლა. კომპანიას 2 მილიონზე მეტი მომხმარებელი და 9 ათასზე მეტი თანამშრომელი ჰყავს. „საქართველოს ბანკის“ მფლობელი ბრიტანეთში რეგისტრირებული Lion Finance Group PLC-ია, რომლის უმსხვილეს აქციონერებს შორის არიან „საქართველოს კაპიტალი", Dimensional Fund Advisors-ი და JP Morgan-ი.

თიბისი ბანკი

₾4.54 მლრდ

სექტორი: ფინანსური მომსახურება

მფლობელი: მამუკა ხაზარაძე და ბადრი ჯაფარიძე - 15,33%; BlackRock - 6.74%; Dunross & Co. - 5,57%

„თიბისი ბანკი“ საქართველოში ყველაზე ძველი კომერციული ბანკის ლიცენზიის მქონე კომპანიაა, რომელიც ეროვნული ბანკისგან 1993 წლის 20 იანვარს მიიღო. მასთან დაკავშირებულ სხვა კომპანიებთან ერთად, „თიბისი“ 11 500-ზე მეტ ადამიანს ასაქმებს. 2016 წლიდან „თიბისის“ აქციები ლონდონის საფონდო ბირჟაზე გავიდა. 2020 წელს „თიბისი“ უზბეკურ ბაზარზეც შევიდა, სადაც ახლა დაახლოებით 12 მილიონი მომხმარებელი ჰყავს. სს „თიბისი ბანკის“ 99.88%-ს ფლობს დიდ ბრიტანეთში რეგისტრირებული TBC Bank Group PLC, უმსხვილეს აქციონერებს შორის კი ბანკის დამფუძნებლები, მამუკა ხაზარაძე და ბადრი ჯაფარიძე არიან.

საქართველოს კაპიტალი

₾4.08 მლრდ

სექტორი: მულტისექტორული

მფლობელი: Lazard Asset Management LLC - 7,41%; Allan Gray (Pty) Ltd. - 5,98%; Gemsstock Ltd. - 5,70%; Irakli Gilauri 5,25%

„საქართველოს კაპიტალი“ 2018 წელს, მას შემდეგ შეიქმნა, რაც „საქართველოს ბანკის ჯგუფი“ ორ დამოუკიდებელ კომპანიად გაიყო. ჰოლდინგს ამჟამად მრავალ სფეროში დივერსიფიცირებული პორტფელი აქვს, მათ შორისაა ჯანდაცვა, ფინანსები და უძრავი ქონება. „საქართველოს ბანკის“ მსგავსად, „საქართველოს კაპიტალი“ ლონდონის საფონდო ბირჟის პრემიუმ–ლისტინგშია. კომპანიის უმსხვილესი ინდივიდუალური აქციონერი და გენერალური დირექტორი „საქართველოს ბანკის“ ყოფილი CEO ირაკლი გილაურია.

მაგთიკომი

₾3.65 მლრდ

სექტორი: ტექნოლოგიები და ტელეკომუნიკაცია

მფლობელი: გია ჯოხთაბერიძე - 75%; ირაკლი რუხაძე - 25%

„მაგთიკომი“ საქართველოს ტელეკომუნიკაციების ბაზრის ლიდერია, რომელიც 1996 წელს დაარსდა, მომდევნო წელს კი მისი ქსელიდან პირველი კომერციული ზარი განხორციელდა. 2016 წელს, „კავკასუს ონლაინის“ შეძენის შემდეგ, „მაგთიკომმა“ მომხმარებლებისთვის საკაბელო ინტერნეტის, ინტერნეტტელევიზიისა და ფიქსირებული ტელეფონის სერვისების მიწოდებაც დაიწყო. კომპანიის 75%-იანი და 25%-იანი წილის მფლობელები, შესაბამისად, გიორგი ჯოხთაბერიძე და ირაკლი რუხაძე არიან, რომლებიც „ფორბსმა“ აპრილში საქართველოს მე-3 და მე-4 უმდიდრეს მეწარმეებად დაასახელა.

არ ემ ჯი

₾2.96 მლრდ

სექტორი: მრეწველობა და წარმოება

მფლობელი: დმიტრი ტროიცკი - მაკონტროლებელი

„არ-ემ-ჯიმ“, რომლის საქმიანობის ძირითადი სფერო ფერადი ლითონების მოპოვებაა, საქმიანობა 2012 წლიდან დაიწყო, 2011 წლიდან კი საქართველოში $300 მილიონზე მეტის ინვესტიცია განახორციელა. 2014 წელს, ბოლნისის მუნიციპალიტეტში მადნის მოსაპოვებლად, „არ-ემ-ჯი გოლდმა“ ააფეთქა საყდრისი-ყაჩაღიანი, მეოთხე ათასწლეულით დათარიღებული ოქროს მაღარო, რომელსაც კულტურის სამინისტრომ არქეოლოგიური ძეგლის სტატუსი მოუხსნა. კომპანიის მფლობელი რუსი ბიზნესმენი დმიტრი ტროიცკია.

თელასი

₾2.73 მლრდ

სექტორი: ენერგეტიკა და კომუნალური მომსახურება

მფლობელი: ინტერ რაო - 75% ხვიჩა მაქაცარია - 25%

1995 წელს დაფუძნებული „თელასი“ მონოპოლიას ფლობს თბილისის ელექტრომომარაგებაზე. კომპანიის აქციების 75%-ს ფლობს რუსული ენერგოკომპანია „ინტერ რაო“, დანარჩენს კი შპს „ბესტ ენერჯი გრუპის“ მეშვეობით ქართველი ბიზნესმენი ხვიჩა მაქაცარია, რომელიც „ფორბსის“ უმდიდრესი ქართველი მეწარმეების სიაში მე-9 ადგილზე მოხვდა. „თელასში“ 2 000-მდე ადამიანია დასაქმებული.

სილქ როუდი

₾2.50 მლრდ

სექტორი: მულტისექტორული

მფლობელი: გიორგი რამიშვილი - 61,8%; იერკინ ტატიშევი - 38,2%

1996 წელს დაარსებული „სილქ როუდ ჯგუფი“ დივერსიფიცირებული ჰოლდინგია, რომელიც მსხვილ აქტივებს ფლობს ტელეკომუნიკაციების, უძრავი ქონების, ენერგეტიკისა და ტრანსპორტირების სფეროებში. მის პორტფელში შედის ინტერნეტისა და სატელეფონო პროვაიდერი „სილქნეტი“, რომელმაც 2018 წელს, საქართველოს ისტორიაში უდიდესი კორპორაციული შენაძენის ფარგლებში „ჯეოსელი“ საკუთარი ბრენდის ქვეშ შეიერთა. ჰოლდინგი ფლობს ისეთ სასტუმროებს, როგორიცაა „რედისონ ბლუ ივერია“ და „ტელეგრაფი“. 2010-იანების დასაწყისში „სილქ როუდ ჯგუფი“ დონალდ ტრამპთან პარტნიორობით „ტრამპ თაუერის“ აშენებას აპირებდა, თუმცა ამ უკანასკნელის პრეზიდენტად არჩევის შემდეგ შეთანხმება ჩაიშალა. კომპანიის აქციების 61,8%-ის მფლობელი გიორგი რამიშვილია - „ფორბსის“ მიხედვით, მე-7 უმდიდრესი ქართველი მეწარმე.

ჰანიველ ცემენტი

₾2.46 მლრდ

სექტორი: უძრავი ქონება და მშენებლობა

მფლობელი: Caucasus Cement Holding B.V. - 100%; აქედან: ირაკლი რუხაძე - 41%

„ჰანიველ ცემენტი“ საქართველოში ცემენტისა და ბეტონის ბაზრის ლიდერია. კომპანია 2006 წელს დაარსდა „ჰაიდელბერგ ცემენტის“ სახელით, 2024 წელს კი „ჰანიველი“ ეწოდა. მას ეკუთვნის ცემენტის სრული ციკლის წარმოების ქარხნები კასპსა და რუსთავში, ასევე ცემენტის წისქვილი ფოთში, ცემენტის ტერმინალი სუფსაში, ინერტული მასალების ორი საწარმო და ბეტონის 17 ქარხანა ქვეყნის მასშტაბით. კომპანიას 1200-მდე თანამშრომელი ჰყავს და კონტრაქტორებისა და ქვეკონტრაქტორების ჩათვლით, 5000-მდე ადამიანის დასაქმებას უწყობს ხელს. 2024 წლის დეკემბრამდე კომპანიის აქციების 90%-ს ფლობდა ბიძინა ივანიშვილის ოჯახი, შემდეგ კი „ჰანიველი“ ირაკლი რუხაძის საკუთრებაში გადავიდა.

#10

კრისტალბეთი

₾2.30 მლრდ

სექტორი: სათამაშო ბიზნესი

მფლობელი: Entain 100%

2011 წელს დაარსებული „კრისტალბეთი“ საქართველოს უმსხვილესი ონლაინტოტალიზატორი და კაზინოა. 2019 წლიდან კომპანია საქართველოს უმაღლესი საფეხბურთო ლიგის სპონსორი გახდა, რომელიც მას შემდეგ „კრისტალბეთ ეროვნული ლიგის“ სახელს ატარებს. მისი აქციების 100%-ის მფლობელი საერთაშორისო აზარტული თამაშების კომპანია Entain-ია.

#11

კროკობეთი

₾2.25 მლრდ

სექტორი: სათამაშო ბიზნესი

მფლობელი: თემურ მიქელაძე - 35%; გიგი ლევაი-ვეისი - 16,67%; ნორბერტ ფრანც ტოიფელბერგერი - 16,67%; მანფრედ ბოდნერი - 16,66%

„კროკობეთი“ 2007 წელს დაარსებული ინტერნეტკაზინო და ტოტალიზატორია. 2025 წელს “კროკობეთმა” საერთაშორისო სტრუქტურა გააფართოვა და შვილობილი კომპანიები დააფუძნა პოლონეტში, რუმინეთში, სერბეთსა და მალტაზე. კომპანიის უმსხვილესი აქციონერი თემურ მიქელაძეა, რომელმაც 2025 წლის ბოლოს მშობლიური ქალაქის საფეხბურთო კლუბი, “დინამო ბათუმი” იყიდა.

#12

გეფა

₾1.84 მლრდ

სექტორი: ჯანდაცვა და ფარმაცია

მფლობელი: Lazard Asset Management LLC - 7,41%; Allan Gray (Pty) Ltd. - 5,98%; Gemsstock Ltd. - 5,70%; ირაკლი გილაური 5,25%

„გეფა“ 2017 წელს შეიქმნა ორი სააფთიაქო ქსელის, „ჯი პი სის“ და „ფარმადეპოს“ გაერთიანების შედეგად. იმავე წელს კომპანია სომხეთის ბაზარზე შევიდა და სააფთიაქო ქსელი AKG გახსნა. საცალო გაყიდვების გარდა, „გეფა“ საბითუმო გაყიდვებით ამარაგებს აფთიაქებს, საავადმყოფოებსა და კლინიკებს. გარდა ამისა, კომპანია ფლობს „ბოდი შოპის“ და „აფლელუ პარიზის“ ფრენჩაიზებს საქართველოში, სომხეთსა და აზერბაიჯანში. „გეფა“ არის „საქართველოს კაპიტალში“ შემავალი კომპანია.

#13

ავერსი-ფარმა

₾1.69 მლრდ

სექტორი: ჯანდაცვა და ფარმაცია

მფლობელი: პაატა კურტანიძე - 100%

„ავერსი“ 1994 წელს დაარსებული ფარმაცევტული კომპანიაა, რომელიც ფლობს სააფთიაქო ქსელს ქვეყნის მასშტაბით, ფარმაცევტულ საწარმოებს და რამდენიმე კლინიკას. დაფუძნების შემდეგ, „ავერსმა“ საქართველოში 10 ათასზე მეტი სამუშაო ადგილი შექმნა. კომპანიის დამფუძნებელი და მფლობელი პაატა კურტანიძეა - ₾1,5–მილიარდიანი აქტივებით „ფორბსის“ უმდიდრესი მეწარმეების სიაში ის მე-6 ადგილზეა.

#14

კოკა-კოლა

₾1.63 მლრდ

სექტორი: სურსათი და სასმელები

მფლობელი: თემურ ჭყონია - 87,47%; კომპანიის თანამშრომლები - 8,04%; სხვა პირები - 4,49%

„კოკა-კოლა ბოთლერს ჯორჯია“ საქართველოში არაალკოჰოლური სასმელების უმსხვილესი მწარმოებელია, რომელიც ამერიკული ბრენდის ლიცენზიას 1993 წლიდან ფლობს. „კოკა-კოლას“ გარდა, კომპანიის პროდუქტებს შორისაა „ფანტა“, „სპრაიტი“, Fuse Tea და „წყალი მთის“. მისი დამფუძნებელი და უმსხვილესი აქციონერი (აქციების 87%) თემურ ჭყონიაა, რომელიც „ფორბსის“ უმდიდრესი ქართველი მეწარმეების სიაში მე-5 ადგილზეა.

#15

გორგია

₾1.47 მლრდ

სექტორი: უძრავი ქონება და მშენებლობა

მფლობელი: გია გორგოშაძე - 100%

1998 წელს დაარსებული „გორგია“ მშენებლობისა და რემონტის დარგში სამხრეთ კავკასიის უმსხვილესი კომპანიაა, რომელიც ამჟამად საქართველოს 8 ქალაქში ჯამში 13 ფილიალს მართავს. მისი ერთადერთი მფლობელი გია გორგოშაძეა - „ფორბსის“ უმდიდრესი მეწარმეების სიის მე-10 ადგილის მფლობელი.

#16

თბილისი ენერჯი

₾1.32 მლრდ

სექტორი: ენერგეტიკა და კომუნალური მომსახურება

მფლობელი: ნასიბ ჰასანოვი - 50% ხვიჩა მაქაცარია - 25% მამუკა ტოგონიძე - 25%

„თბილისი ენერჯი“ 2019 წლიდან საქართველოს დედაქალაქის გაზით მომარაგებაზე ფლობს მონოპოლიას, როცა მან ყაზახური „ყაზტრანსგაზი“ ჩაანაცვლა. „თბილისი ენერჯი“ ემსახურება 1,5 მილიონ მოსახლეს და 18 ათას კომერციულ აბონენტს. კომპანიას ფლობს მარშალის კუნძულებზე დაფუძნებული „ვოლთბეი“, რომლის 25-25%-ს ფლობენ ხვიჩა მაქაცარია და მამუკა ტოგონიძე, დანარჩენ 50%-ს კი - აზერბაიჯანის მოქალაქე ნასიბ ჰასანოვი.

#17

ჯი-თი გრუპი

₾1.28 მლრდ

სექტორი: ტრანსპორტი და ავტოინდუსტრია

მფლობელი: გიორგი გველესიანი, გიორგი თავდიშვილი, თემურ უსტიაშვილი - 33,3-33,3%

„ჯი-თი-გრუპმა“ საქმიანობა 1999 წელს დაიწყო და ვაჭრობს მსუბუქი ავტომობილებით, სატვირთოებით, სამშენებლო, სასოფლო-სამეურნეო და მუნიციპალური ტექნიკით. კომპანია საქართველოში იმპორტირების ექსკლუზივს ფლობს ისეთ ბრენდებზე, როგორებიცაა BMW, „ფორდი“, „იაგუარი“, „ლენდ როვერი“, „სუზუკი“ და სხვ. „ჯი-თი-გრუპი“ ასევე აქციების 50%-ს ფლობს „ევროპროდუქტში“, რომელიც ჩვენს сიაში 65-ე ადგილზე მოხვდა. კომპანიის აქციებს თანაბრად ინაწილებენ გიორგი გველესიანი, გიორგი თავდიშვილი და თემურ უსტიაშვილი.

#18

აჭარაბეთი

₾1.26 მლრდ

სექტორი: სათამაშო ბიზნესი

მფლობელი: Flutter Enterntainment - 100%

„აჭარაბეთი“ ონლაინ ტოტალიზატორი და კაზინოა. მისი აქციების საკონტროლო პაკეტი (51%) 2019 წელს ირლანდიურმა გლობალურმა გიგანტმა, Flutter Enterntainment-მა (მაშინ ეწოდებოდა Paddy Power) 115 მილიონ ევროდ შეიძინა ბიზნესმენ თემურ უგულავასგან, 2022 წელს კი 204 მილიონი გირვანქა სტერლინგი გადაიხადა აქციების დარჩენილ წილში.

#19

ორი ნაბიჯი

₾1.20 მლრდ

სექტორი: საცალო ვაჭრობა და დისტრიბუცია

მფლობელი: კახა ბექაური, გიორგი ჩხეიძე, გოჩა ცქიტიშვილი - 33,3-33,3%

„ორი ნაბიჯი“ საქართველოს უმსხვილესი სუპერმარკეტების ქსელია, რომელიც მოიცავს დაახლოებით 470 საცალო მაღაზიას და ასაქმებს 4300 ადამიანს. მის აქციებს თანაბრად იყოფენ კახა ბექაური (კომუნიკაციების კომისიის ყოფილი თავმჯდომარე), გოჩა ცქიტიშვილი და გიორგი ჩხეიძე.

#20

APM terminals

₾1.07 მლრდ

სექტორი: ტრანსპორტი და ავტოინდუსტრია

მფლობელი: Maersk - მაკონტროლებელი

APM Terminals-ი 2011 წლიდან მართავს ფოთის პორტს, რომელიც საქართველოს საკონტეინერო ტვირთის 80%-ს ამუშავებს. გასულ 15 წელიწადში კომპანიამ პორტში $80 მილიონზე მეტის ინვესტიცია განახორციელა. APM Terminals-ის მფლობელი დანიური საზღვაო გიგანტი „მაერსკია“.

21-100 პოზიციები

#21 იუ-ჯი-თი

₾1.05 მლრდ ტექნოლოგიები და ტელეკომუნიკაცია ▼

მფლობელი: გრიგოლ ჭირაქაძე - 85%; გურამ ხოჯანაშვილი, ერმილე სულაძე, გიორგი მაისურაძე - 5-5%

ინფორმაციული ტექნოლოგიების კომპანია „იუ-ჯი-თი“ 1997 დაფუძნდა და კლიენტებს მომსახურებას უწევს IT-ის, შენობების მართვის, გადახდებისა და ვიდეომონიტორინგის მიმართულებით. კომპანიის აქციების 85%-ს გრიგოლ ჭირაქაძე ფლობს - თუ „იუ-ჯი-თი“ საქართველოს 21-ე ყველაზე შემოსავლიანი კომპანიაა, ჭირაქაძე „ფორბსის“ უმდიდრესი მეწარმეების სიაში 21-ე ადგილზეა.

#22 თეგეტა მოტორსი

₾1 მლრდ ტრანსპორტი და ავტოინდუსტრია ▼

მფლობელი: თემურ კოხოძე - 92,20%; მარინე მუმლაძე, გიორგი მშვილდაძე - 3,9-3,9%

1995 წელს დაფუძნებული „თეგეტა“ თავდაპირველად სათადარიგო ნაწილებით მოვაჭრე მცირე მაღაზია იყო, რომელიც მომდევნო 30 წლის განმავლობაში ავტოიმპორტის რეგიონულ გიგანტად იქცა. კომპანიის აქციების 92%-ს ფლობს თემურ კოხოძე - „ფორბსის“ მიხედვით, საქართველოს მე-16 უმდიდრესი მეწარმე.

#23 აი ჯი დეველოპმენტი

₾951.1 მლნ უძრავი ქონება და მშენებლობა ▼

მფლობელი: მინდია საბანაძე - მაკონტროლებელი

„აი ჯი დეველოპმენტი“ საქართველოში უძრავი ქონების მართვის უმსხვილესი კომპანიაა. მის პორტფელში შედის „სითი მოლი საბურთალო“, „სითი მოლი გლდანი“ და ბიზნესცენტრი „სითი თაუერი“. მისი მფლობელია მინდია საბაძე, რომელიც „ფორბსის“ უმდიდრესი მეწარმეების სიაში მე-15 ადგილზეა.

#24 GMP

₾933.6 მლნ ჯანდაცვა და ფარმაცია ▼

მფლობელი: კახა ოქრიაშვილი - 100%

„ჯი-ემ-პი“ 1999 წელსაა დაარსებული და „პე-ეს-პე“-სთან დაკავშირებული ფარმაცევტული კომპანიაა, რომელიც აწარმოებს მედიკამენტებს და საქართველოს გარდა, ექსპორტზე გააქვს კავკასიისა და ცენტრალური აზიის ქვეყნებში. კომპანიის აქციების 100%-ს კახა ოქრიაშვილი ფლობს, „ფორბსის“ მიხედვით, საქართველოს მე-8 უმდიდრესი მეწარმე.

#25 მაკდონალდსი

₾919.5 მლნ სურსათი და სასმელები ▼

მფლობელი: თემურ ჭყონია - 90%; თენგიზ კაპანაძე - 10%

„მაკდონალდსი“ ამერიკული სწრაფი კვების ობიექტების ქსელია, რომელიც საქართველოში 1999 წელს შემოვიდა - რუსთაველზე პირველი რესტორნის გახსნას მაშინდელი პრეზიდენტი, ედუარდ შევარდნაძეც დაესწრო. ამჟამად თბილისში უკვე 21 „მაკდონალდსია“, საქართველოში კი - ჯამში 28. კომპანია ასაქმებს 2 ათასზე მეტ ადამიანს. „კოკა კოლას“ მსგავსად, ქართული „მაკდონალდსის“ უმსხვილესი მეწილე (აქციების 90%-ის მფლობელი) თემურ ჭყონიაა.

#26 ბეთლაივი

₾866.6 მლნ სათამაშო ბიზნესი ▼

მფლობელი: ნანა ჯანაშია - 26% ლაშა კვაჭაძე - 20,3% ალექსანდრე წულუკიძე - 20,3% ალექსი მოდებაძე - 20,3% და სხვ.

„ბეთლაივი“ აზარტული თამაშების კომპანიაა, რომლის მთავარი პროდუქტები ონლაინ ტოტალიზატორი და კაზინოა. კომპანია ასევე ფლობს რვა სალაროს, სლოტ კლუბს და ტოტალიზატორს მარნეულში. მისი ძირითადი მფლობელები არიან ალექსანდრე წულუკიძე, ალექსი მოდებაძე, ალექსანდრე მელაძე, ლაშა კვაჭაძე და ნანა ჯანაშია.

#26 პსპ ფარმა

₾866.6 მლნ ჯანდაცვა და ფარმაცია ▼

მფლობელი: კახა ოქრიაშვილი - 100%

PSP საქართველოს ერთ-ერთი უმსხვილესი სააფთიაქო ქსელია, რომელიც 1994 წელს დაარსდა და ამჟამად ქვეყნის მასშტაბით 300-ზე მეტ აფთიაქს მართავს. კომპანიის ერთადერთი მფლობელი კახა ოქრიაშვილია, „ფორბსის“ მიხედვით, საქართველოს მე-8 უმდიდრესი მეწარმე.

#28 თოდუას კლინიკა

₾824.8 მლნ ჯანდაცვა და ფარმაცია ▼

მფლობელი: გიორგი დიასამიძე - 100%

„თოდუას კლინიკას“ თბილისში სამი ფილიალი აქვს. ის 1991 წელს დააარსა აკადემიკოსმა ფრიდონ თოდუამ, რომელიც 2017 წელს გარდაიცვალა. ამჟამად კლინიკების მფლობელი მისი 27 წლის შვილიშვილი, გიორგი დიასამიძეა.

#29 ეპამ სისტემს

₾788.0 მლნ ტექნოლოგიები და ტელეკომუნიკაცია ▼

მფლობელი: EPAM Systems - 100%

IT–მომსახურების ამერიკული მიმწოდებელი EPAM-ი საქართველოში 2020 წლიდან საქმიანობს. კომპანია საქართველოდან უწევს მომსახურებას კლიენტებს როგორც ქვეყნის შიგნით, ასევე ავსტრალიაში, ჩრდილოეთ ამერიკის, ევროპისა და აზიის ქვეყნებში. 2024 წლის 31 დეკემბრის მონაცემებით, „EPAM საქართველოში“ 3 ათასამდე ადამიანი იყო დასაქმებული.

#30 ნიკორა

₾762.7 მლნ საცალო ვაჭრობა და დისტრიბუცია ▼

მფლობელი: ვასილ სუხიაშვილი - 23%; GREENMOON LTD - 13%; დავით დუმბაძე - 11%; ოლეგ გუბანოვი - 10%; თალიკო ცირეკიძე - 9%; მაკა სალუქვაძე - 6%

„ნიკორა“ ხორცპროდუქტების მწარმოებელი კომპანიაა, რომელიც ქვეყნის მასშტაბით სუპერმარკეტების მსხვილ ქსელსაც ფლობს - კომპანიის მენეჯმენტის ქვეშაა „ნიკორას“, „ლიბრეს“ და „ნუგეშის“ ბრენდის სუპერმარკეტები. „ფორბსის“ უმდიდრესი ქართველი მეწარმეების სიაში „ნიკორას“ სამი აქციონერი მოხვდა - ვასილ სუხიაშვილი (26-ე ადგილი), თალიკო ცირეკიძე (79-ე ადგილი) და მაკა სალუქვაძე (98-ე ადგილი).

#31 ტოიოტა კავკასია

₾639.0 მლნ ტრანსპორტი და ავტოინდუსტრია ▼

მფლობელი: Toyota Tsusho Corporation - 100%

„ტოიოტა კავკასია“ 2006 წლიდან „ტოიოტასა“ და „ლექსუსის“ ბრენდის ავტომობილებისა და ავტონაწილების ექსკლუზიური იმპორტიორია რეგიონში, რომლებსაც შემდეგ საბითუმოდ ყიდულობენ კავკასიის ავტორიზებული დილერები. „ტოიოტა კავკასიის“ აქციების 100%-ს იაპონური Toyota Tsusho Corporation ფლობს.

#32 მეიჯერელი

₾638.2 მლნ ტექნოლოგიები და ტელეკომუნიკაცია ▼

მფლობელი: Teleperformance - 100%

TP Georgia აუტსორს-სერვისების საერთაშორისო კომპანიაა, რომელიც საქართველოში 2016 წელს „მეიჯერელის“ სახელით შემოვიდა. 2024 წელს „მეიჯერელის“ საერთაშორისო ქსელი, რომლის ნაწილიც საქართველოც იყო, ფრანგულმა Teleperformance-მა (TP) შეიძინა. TP-ს თბილისსა და ქუთაისში ჯამში 2500-ზე მეტი თანამშრომელი ჰყავს.

#33 ვიმ ბილ დანი

₾634.1 მლნ სურსათი და სასმელები ▼

მფლობელი: PepsiCo - 100%

„ვიმ ბილ დანი“ 1992 წელს რუსეთში დაარსებული სასურსათო კომპანიაა, რომლის სამი დამფუძნებლიდან ერთ-ერთი ქართული წარმოშობის ბიზნესმენი დავით იაკობაშვილი იყო. 2011 წელს კომპანია ამერიკულმა PepsiCo-მ $5,7 მილიარდად შეისყიდა, საიდანაც იაკობაშვილმა $600 მილიონი მიიღო. საქართველოში „ვიმ ბილ დანი“ 2008 წელს შემოვიდა და აქვე აწარმოებს „სოფლის ნობათის“ და „ჩუდოს“ პროდუქციას. გარდა ამისა შემოაქვს ისეთი ბრენდების პროდუქტები, როგორებიცაა „ლეისი“, „დორიტოსი“, „ხრუსტიმი“, „ფრუქტოვიი სად“, „ლიპტონის“ ცივი ჩაი და სხვ.

#34 ალმა

₾612.3 მლნ მედია და რეკლამა ▼

მფლობელი: ლევან და სოსო ფხაკაძეები (50-50%)

გარე რეკლამების კომპანია „ალმა“ 1995 წელს დაარსდა, 2013 წელს კი „ვისოლ ჯგუფს“ შეუერთდა. 2017 წელს „ალმამ“ შეიძინა outdoor.ge, იმ დროისთვის საქართველოს სარეკლამო ბაზრის ლიდერი. დღეის მდგომარეობით, „ალმა“ ბაზარზე, ფაქტობრივად, მონოპოლისტია. 2016 წლიდან „ალმამ“ თბილისში მოსაცდელებზე რეკლამების განთავსების უფლება მოიპოვა, 2019 წელს კი - საზოგადოებრივ ტრანსპორტზე.

#35 ევროპაბეთი

₾596.7 მლნ სათამაშო ბიზნესი ▼

მფლობელი: Betsson AB

Betsson ონლაინ კაზინო და ტოტალიზატორია, რომელიც 2010 წელს დაფუძნდა და 2025 წლამდე „ევროპაბეთის“ სახელით იყო ცნობილი. 2025 წელს კომპანია აზარტული თამაშების საერთაშორისო ჰოლდინგმა, Betsson AB-მ შეიძინა, რის შემდეგაც მას სახელიც შეუცვალა.

#36 თიბისი ფეი

₾578.8 მლნ ფინანსური მომსახურება ▼

მფლობელი: მამუკა ხაზარაძე და ბადრი ჯაფარიძე - 15,33%; BlackRock - 6.74%; Dunross & Co. - 5,57%

„თიბისი ფეი“ „თიბისი ბანკის“ შვილობილი საგადახდო მომსახურების პროვაიდერი კომპანიაა. „თიბისი ფეის“ აქვს 4000-ზე მეტი თვითმომსახურების ტერმინალი ქვეყნის მასშტაბით, ვებგვერდი და მობილური აპლიკაცია.

#37 დრესაპი

₾566.9 მლნ საცალო ვაჭრობა და დისტრიბუცია ▼

მფლობელი: ალექსანდრე სამხარაძე - 88%; ლელა სამხარაძე - 12%

„დრესაპ ჯგუფი“ ტანსაცმლისა და ფეხსაცმლის იმპორტიორია, რომელიც 1994 წელს დაარსდა. ონლაინმაღაზიასთან ერთად, კომპანია თბილისში, ბათუმში, რუსთავსა და ზუგდიდში ჯამში 100-ზე მეტ მაღაზიას ფლობს. კომპანიის დამფუძნებელი და აქციების 88%-ის მფლობელი ალექსანდრე სამხარაძეა, რომელიც „ფორბსის“ უმდიდრესი მეწარმეების სიაში 50-ე ადგილზე მოხვდა.

#38 ლიდერბეთი

₾555.5 მლნ სათამაშო ბიზნესი ▼

მფლობელი: ქართლოს დიასამიძე (40%), ბესიკ ხოკერაშვილი (30%), აკაკი შუბითიძე და დავით ჩხიტუნიძე (15%-15%)

„ლიდერბეთი“ აზარტული თამაშების კომპანიაა, რომელმაც 2016 წელს დაიწყო საქმიანობა და ფლობს როგორც ონლაინ, ისე ფიზიკურ ტოტალიზატორებს. კომპანიის მფლობელები არიან ქართლოს დიასამიძე (აქციების 40%), ბესიკ ხოკერაშვილი (30%), აკაკი შუბითიძე და დავით ჩხიტუნიძე (15%-15%).

#39 ელიზი ჯგუფი

₾555.2 მლნ საცალო ვაჭრობა და დისტრიბუცია ▼

მფლობელი: ელიზბარაშვილების ოჯახი - 60%; ზურაბ ზურაბიშვილი - 20%; აფხაიძეების ოჯახი - 17%; ქეთევან მაღლაკელიძე - 3%

„ელიზი ჯგუფი“ 1998 წელს დაფუძნებული თამბაქოს იმპორტიორი და დისტრიბუტორი კომპანიაა. ისინი საქართველოში ვაჭრობენ ისეთი ბრენდებით, როგორებიცაა „უინსტონი“, „სობრანიე“ და „ქემელი“. „ელიზი ჯგუფის“ აქციების 60% ელიზბარაშვილების ოჯახს ეკუთვნის. თავის ძმებთან ერთად, კომპანიის ერთ-ერთი დამფუძნებელი თამაზ ელიზბარაშვილი იყო, რომელმაც მოგვიანებით საკუთარი წილი თავის შვილს, თორნიკეს გადაუფორმა.

#40 ჯორჯიან ქარდი

₾547.7 მლნ ფინანსური მომსახურება ▼

„ჯორჯიან ქარდი“ „საქართველოს ბანკის ჯგუფის“ მფლობელობაში არსებული საგადახდო კომპანიაა, რომელიც 1997 წელს დაარსდა და დღეს 1000 ბანკომატს, 50 000-ზ მეტ ტერმინალსა და 3000-ზე მეტ თვითმომსახურების ტერმინალს ამუშავებს. კომპანია თანამშრომლობს კომერციულ ბანკებთან, მიკროსაფინანსო ორგანიზაციებთან და სხვა ფინანსურ ინსტიტუტებთან.

#41 ანაგი

₾544.5 მლნ უძრავი ქონება და მშენებლობა ▼

მფლობელი: ნანა აროშიძე - 100%

„ანაგი“ 1989 წელს დაარსებული სამშენებლო კომპანიაა, რომელსაც ეკუთვნის 260 დასრულებული პროექტი და რომელიც ასაქმებს 3000 ადამიანს. მისი მფლობელი, ნანა აროშიძე, „ფორბსის“ უმდიდრესი მეწარმეების სიაში 22-ე ადგილზეა.

#42 GWP

₾540.7 მლნ ენერგეტიკა და კომუნალური მომსახურება ▼

მფლობელი: FCC Aqualia - 80% საქართველოს კაპიტალი - 20%

GWP (ჯორჯიან უოთერ ენდ ფაუერი) თბილისის, რუსთავისა და მცხეთის წყალმომარაგებაზე პასუხისმგებელი კომპანიაა, რომელიც ჯამში 2 მილიონზე მეტ ადამიანს ემსახურება. 2022 წლიდან კომპანიის აქციების 80%-ს ესპანური FCC Aqualia ფლობს, დანარჩენ 20%-ს კი - „საქართველოს კაპიტალი“, რომელიც ჩვენს სიაში უკვე შეგხვდათ მე-4 ადგილზე.

#43 ისთ ფოინთი

₾505.8 მლნ უძრავი ქონება და მშენებლობა ▼

მფლობელი: ოლეგ პავლოვი - 100%

„ისთ ფოინთი“ თბილისის განაპირას არსებული სავაჭრო და გასართობი ქალაქია, რომელიც 2015 წელს გაიხსნა. ტერიტორია მოიცავს 150-ზე მეტ მაღაზიას, კვების ობიექტებს, გასართობ სივრცეებს, ატრაქციონებსა და საქართველოში ერთადერთ IMAX–კინოთეატრს. „ისთ ფოინთი“ შედის კაიმანის კუნძულებზე რეგისტრირებული „Quadrum Investment Management Ltd“-ის საკუთრებაში, რომლის მფლობელიც რუსი ბიზნესმენი და ინვესტორი ოლეგ პავლოვია.

#44 კაზინო ივერია

₾497.5 მლნ სათამაშო ბიზნესი ▼

მფლობელი: გიორგი რამიშვილი - მაკონტროლებელი

„კაზინო ივერია“ მოიცავს თბილისისა და ბათუმის „რედისონ ბლუ ივერიაში“ გახსნილ სამორინეებს და Complex Republic-ს თბილისში, პირველი რესპუბლიკის მოედანზე. კომპანია „სილქ როუდ ჯგუფის“ საკუთრებაა.

#45 ალტა

₾479.4 მლნ საცალო ვაჭრობა და დისტრიბუცია ▼

მფლობელი: ირაკლი კაკაბაძე - 47,5% თეა კაკაბაძე - 29% ნანა კასრელიშვილი - 7,39% ლევან ნიკოლაიშვილი - 5,10% და სხვები

ციფრული და საყოფაცხოვრებო ტექნიკის მაღაზიების ქსელი „ალტა“ ბაზარზე 1997 წელს გამოჩნდა. დღეს კომპანია ფლობს როგორც ონლაინმაღაზიას, ისე 16 ფიზიკურ მაღაზიას საქართველოს 7 ქალაქში. კომპანიაში 700-მდე ადამიანია დასაქმებული.

#46 აი სი არ

₾475.3 მლნ საცალო ვაჭრობა და დისტრიბუცია ▼

მფლობელი: კახა ხაზარაძე - 74.7% და ნანი ანდიაშვილი - 25.3%

„აი სი არ“ ჯგუფმა საქმიანობა 1993 წელს დაიწყო და ამჟამად მას 130 ობიექტი ეკუთვნის, რაშიც შედის ტანსაცმლის, ფეხსაცმელის, ავეჯის მაღაზიები და რესტორნები. კომპანიას 1000-მდე თანამშრომელი ჰყავს. მისი დამფუძნებელი და უმსხვილესი აქციონერი კახა ხაზარაძეა, რომელიც „ფორბსის“ უმდიდრესი ქართველი მეწარმეების სიაში 43-ე ადგილზე მოხვდა.

#47 სელფი

₾469.8 მლნ ტექნოლოგიები და ტელეკომუნიკაცია ▼

მფლობელი: ხვიჩა მაქაცარია - 59,1%; მამუკა ტოგონიძე - 38,4%; კონსტანტინე სახოკია, იულია დედოვა - 1,25%-1,25%

„სელფი“ ქართულ ბაზარზე 2007 წელს შემოვიდა „ბილაინის“ სახელით და „მაგთისა“ და „ჯეოსელის“ იმჟამინდელი დუოპოლია დაარღვია. ის დღემდე მესამე მოთამაშედ რჩება - 2026 წლის პირველი ორი თვის მონაცემებით, „სელფის“ მობილური კომუნიკაციების ბაზრის 22,6% უჭირავს და 1,3 მილიონზე მეტ აბონენტს ემსახურება. 2022 წელს კომპანია ხვიჩა მაქაცარიამ შეიძინა - იქამდე მისი ერთ-ერთი მსხვილი აქციონერი რუსი მილიარდერი მიხაილ ფრიდმანი იყო, რომელიც რუსეთის უკრაინაში შეჭრის შემდეგ დასავლურმა ქვეყნებმა დაასანქცირეს. მომდევნო წელს „ბილაინმა“ რებრენდინგის ფარგლებში სახელიც შეიცვალა.

#48 აგროჰაბი

₾459.5 მლნ საცალო ვაჭრობა და დისტრიბუცია ▼

მფლობელი: აკაკი ახვლედიანი - 100%

„აგროჰაბი“ სუპერმარკეტების ქსელია, რომელიც ბაზარზე 2015 წელს გამოჩნდა და დღეს ჯამში მას ცხრა ფილიალი ეკუთვნის თბილისში, ქუთაისსა და ბათუმში. 2025 წელს „ფორბსმა“ მოგების ყველაზე მაღალი მარჟით „აგროჰაბი“ საქართველოში სუპერმარკეტების ყველაზე მოგებიან ქსელად დაასახელა. მისი ერთადერთი მფლობელია აკაკი ახვლედიანი, რომელიც „ფორბსის“ უმდიდრესი მეწარმეების სიის 27-ე ადგილს იკავებს.

#49 რიკო კრედიტი

₾440.5 მლნ ფინანსური მომსახურება ▼

მფლობელი: დალი ურუშაძე - 100%

„შპს რიკო კრედიტი“ 2004 წელს დაარსდა და 2007 წელს ეროვნულმა ბანკმა მიკროსაფინანსო ორგანიზაციად დაარეგისტრირა. „რიკო კრედიტი“ საქართველოს 19 ქალაქში ჯამში 56 ფილიალს ფლობს. მისი ერთადერთი მფლობელი დალი ურუშაძეა, „ფორბსის“ მიხედვით, საქართველოს 47-ე უმდიდრესი მეწარმე.

#50 რითეილ ჯგუფი

₾439.8 მლნ საცალო ვაჭრობა და დისტრიბუცია ▼

მფლობელი: არჩილ გეგენავა - 23,25%; ზურაბ ზაქარიაძე - 20%; დავით კუხალაშვილი - 18,25%; ცეზარ ჩოჩელი - 10% და სხვები

„რითეილ ჯგუფი“ მართავს სუპერმარკეტების ქსელს „მაგნიტის“ ბრენდის ქვეშ. „მაგნიტი“ 2015 წელს დაარსდა და ქსელი ქვეყნის მასშტაბით 500-მდე მაღაზიას აერთიანებს. „რითეილ ჯგუფის“ მშობელი კომპანია „შპს დეილია“.

#51 იმპექსფარმი

₾403.0 მლნ ჯანდაცვა და ფარმაცია ▼

მფლობელი: დავით კოხრეიძე - 100%

„იმპექსფარმი“ მოიცავს სააფთიაქო ქსელ „იმპექსს“, რომელიც 1999 წელს დაარსდა და 1100-ზე მეტ ადამიანს ასაქმებს. მისი ერთადერთი მფლობელი დავით კოხრეიძეა, რომელიც „ფორბსის“ უმდიდრესი მეწარმეების სიაში 28-ე ადგილზეა.

#52 ჯი არ სი

₾394.5 მლნ უძრავი ქონება და მშენებლობა ▼

მფლობელი: ნიქაბაძეების ოჯახი - 60% გიორგი აღდგომელაშვილი - 40%

2003 წელს დაარსებული „ჯი არ სის“ ძირითადი საქმიანობა სამშენებლო მასალების წარმოება და იმპორტია. კომპანიის აქციების 60%-ს ფლობს ნიქაბაძეების ოჯახი (61-ე ადგილი „ფორბსის“ უმდიდრესი მეწარმეების სიაში), დანარჩენ 40%-ს კი - გიორგი აღდგომელაშვილი (87-ე ადგილი).

#53 ლუკოილ-ჯორჯია

₾390.1 მლნ ენერგეტიკა და კომუნალური მომსახურება ▼

მფლობელი: LUKOIL International GmbH - 100%

„ლუკოილი“ 1991 წელს რუსეთში დაარსებული მულტინაციონალური ენერგოკომპანიაა, რომელიც საქართველოში 2002 წლიდან საქმიანობს. ამჟამად „ლუკოილ-ჯორჯია“ საქართველოში 60-ზე მეტ ავტოგასამართ სადგურს ფლობს და 500-მდე ადამიანს ასაქმებს. კომპანიის მფლობელია ვენაში დარეგისტრირებული „LUKOIL International GmbH“. „ლუკოილი“ 2014 წლიდან აშშ-ის სანქციების ქვეშაა, რომელიც 2025 წლიდან კიდევ უფრო დამძიმდა. 2022 წელს, რუსეთის უკრაინაში შეჭრიდან მალევე, „ლუკოილის“ დირექტორთა საბჭომ რუსული აგრესიის მიმართ პროტესტი გამოხატა. რამდენიმე თვეში საბჭოს თავმჯდომარე, რავილ მაგანოვი, მოსკოვში ფანჯრიდან გადავარდა და გარდაიცვალა.

#54 ლიბერთი ბანკი

₾369.5 მლნ ფინანსური მომსახურება ▼

მფლობელი: ბაზისბანკი - 96%; მინორიტარები - 4%

„ლიბერთი ბანკი“ წმინდა მოგებით საქართველოს მესამე ბანკია. ის თავდაპირველად 1994 დაარსდა სახელმწიფო „აგრომრეწვბანკის“ პრივატიზაციის შედეგად, 2002 წელს კი მას „სახალხო ბანკი“ ეწოდა. 2009 წელს ბანკი პარტნიორებთან ერთად საქართველოს ყოფილმა პრემიერ-მინისტრმა, ლადო გურგენიძემ შეიძინა და მას „ლიბერთი ბანკი“ ეწოდა. 2017 წელს „ლიბერთი“ გადავიდა „ქართულ ოცნებასთან“ დაახლოებული ბიზნესმენის, ირაკლი რუხაძისა და მისი პარტნიორების მფლობელობაში, რომლებმაც ის 2026 წლის აპრილში მიჰყიდეს ჩინურ „ბაზისბანკს“. „ლიბერთი ბანკს“ საქართველოს მასშტაბით ყველაზე ფართო ქსელი აქვს - ამისი მიზეზი ისაა, რომ ის უკვე 20 წელიწადზე მეტია, გასცემს სახელმწიფო პენსიებსა და სოციალურ დახმარებებს.

#55 ზუმერი ჯორჯია

₾356.3 მლნ საცალო ვაჭრობა და დისტრიბუცია ▼

მფლობელი: გიორგი მუშკუდიანი - 24%; ვაჟა რეხვიაშვილი - 20%; დიმიტრი კიკაჩეიშვილი - 20%; გოჩა სამხარაძე - 16%; ლევან გაფრინდაშვილი - 10%; დავით კვარაცხელია - 6%; გიორგი თუთარაშვილი - 4%

„ზუმერი“ ციფრული ტექნიკის მაღაზიების ქსელია, რომელიც ბაზარზე 2009 წელს გამოჩნდა. დღეს „ზუმერი“ აერთიანებს ონლაინმაღაზიას, 18 ფილიალს და 500-ზე მეტ ადამიანს ასაქმებს.

#56 ნოვა

₾351.7 მლნ უძრავი ქონება და მშენებლობა ▼

მფლობელი: ზვიად აბულაძე, ჯემალ ბოლქვაძე, ემზარ ირემაძე, რამაზ ირემაძე, ჯემალ ანთაძე - 20-20%

2006 წელს დაარსებული „ნოვა“ სამშენებლო მასალების მწარმოებელი და იმპორტიორია. კომპანია ხუთი მეგობრის შექმნილია, რომლებიც მის წილებს დღემდე თანაბრად ინაწილებენ. 2020 წლიდან „ნოვამ“ საცალო ვაჭრობაც დაიწყო და დღეისათვის თბილისის ცხრა ქალაქში ფლობს მეგაცენტრებს. კომპანიაში ჯამში 1000-ზე მეტი ადამიანია დასაქმებული.

#57 ლილო-მოლი

₾351.3 მლნ უძრავი ქონება და მშენებლობა ▼

მფლობელი: ილია შონია - 13,79%; ვაჟა უსანეთაშვილი - 12,79%; გია ანდღულაძე - 12,29%; ბაჩო კაპანაძე - 11,53%; გიორგი გაგუა - 11,29% და სხვები

„ლილო მოლი“ ამიერკავკასიის ერთ-ერთი უმსხვილესი სავაჭრო კომპლექსია, რომელიც 35 ჰექტარზეა განლაგებული და 6000-მდე სავაჭრო ობიექტს მოიცავს. კომპანია 1991 წელს დაფუძნდა და იჯარით გასცემს თავის საკუთრებაში არსებულ სავაჭრო ფართებს.

#58 ნიუ ჰოსპიტალსი

₾345.2 მლნ ჯანდაცვა და ფარმაცია ▼

მფლობელი: კახა ოქრიაშვილი - 100%

„ნიუ ჰოსპიტალსი“ თბილისში არსებული 150–საწოლიანი მრავალპროფილური ჰოსპიტალია, რომელიც „პსპ ფარმას“ საკუთრებაა. მის ამბულატორიულ განყოფილებას ყოველდღიურად 1000 პაციენტის მომსახურება შეუძლია. ჰოსპიტალი 1200-მდე ადამიანს ასაქმებს.

#59 აჭარა ტექსტილი

₾341.9 მლნ მრეწველობა და წარმოება ▼

მფლობელი: ჯემალ და ქემალ ბილგინგულუოღლუები - 50-50%

„აჭარა ტექსტილი“ 2008 წელს დაარსებული სამკერვალო კომპანიაა. ის თანამშრომლობს ისეთ გლობალურ ბრენდებთან, როგორებიცაა Nike–ი, Puma, Adidas–ი, New Balance–ი, Under Armour–ი და სხვა. კომპანიას თანაბრად ინაწილებენ თურქი ბიზნესმენები, ჯემალ და ქემალ ბილგინგულუოღლუები.

#60 ელსი ვაიკიკი

₾335.3 მლნ საცალო ვაჭრობა და დისტრიბუცია ▼

მფლობელი: LC Waikiki - 100%

„ელსი ვაიკიკი“ ტანსაცმლისა და ფეხსაცმლის მაღაზიების თურქული ქსელია, რომელიც საქართველოში 2011 წლიდან შემოვიდა. „ვაიკიკის“ ეკუთვნის მაღაზიები თბილისში, ბათუმში, ქუთაისში, რუსთავში, ზუგდიდსა და თელავში. ამასთანავე, სომხური „ელსი ვაიკიკი“ ქართულის შვილობილი კომპანიაა.

#61 ვისოლი

₾329.5 მლნ ენერგეტიკა და კომუნალური მომსახურება ▼

მფლობელი: ლევან ფხაკაძე - 37,5% სოსო ფხაკაძე - 31,25% და გიორგი რამიშვილი - 15,5%

სააქციო საზოგადოება „ვისოლ პეტროლიუმ ჯორჯია“ „ვისოლ ჯგუფის“ წევრია, რომლის პორტფელშიც შედის „ვისოლის“ 150 ავტოგასამართი სადგური და „ვინტოს“ ავტომომსახურების 10 ცენტრი. კომპანიის ყველაზე მსხვილი აქციონერები არიან ძმები, ლევან და სოსო ფხაკაძეები (შესაბამისად, აქციების 37,5% და 31,25%), და გიორგი რამიშვილი (15,5%).

#62 მერსედეს–ბენცი

₾329.1 მლნ ტრანსპორტი და ავტოინდუსტრია ▼

მფლობელი: მაკა ასათიანი და ოჯახი - 100%

„მერსედეს-ბენცი საქართველო“ 1993 წლიდან ეწევა „მერსედესისა“ და „დაიმლერის“ ავტომობილების, სპეცტექნიკისა და ორიგინალი სათადარიგო ნაწილების რეალიზაციას, ასევე ტექნიკურ მომსახურებას. კომპანიას მაკა ასათიანი და მისი ოჯახი, დედა და და, ფლობენ. „ფორბსის“ უმდიდრესი მეწარმეების სიაში ასათიანების ოჯახი მე-12 ადგილზე მოხვდა.

#63 სუფთა სახლი

₾327.9 მლნ საცალო ვაჭრობა და დისტრიბუცია ▼

მფლობელი: იოსებ თათარაშვილი - 96%

„სუფთა სახლი“ სახლის, ჰიგიენისა და თავის მოვლის პროდუქტების მაღაზიათა ქსელია, რომელმაც 2014 წელს დაიწყო საქმიანობა. ოთხი მაღაზიით დაწყებული ბიზნესი დღეს ჯამში 250-მდე მაღაზიას მოიცავს საქართველოს ყველა რეგიონულ ცენტრში. მისი მფლობელი იოსებ თათარაშვილია, რომელიც „ფორბსის“ უმდიდრესი მეწარმეების სიაში 29-ე ადგილზე მოხვდა.

#64 ევროპროდუქტი

₾310.5 მლნ საცალო ვაჭრობა და დისტრიბუცია ▼

მფლობელი: ნინო ბრეგვაძე - 50% ჯი თი გრუპი - 50%

„ევროპროდუქტმა“ საქმიანობა 2004 წელს ფინური კარაქ „ვალიოს“ დისტრიბუციით დაიწყო, მომდევნო ათი წლის განმავლობაში სადისტრიბუციო საქმიანობა გააფართოვა, 2014 წელს კი პირველი საცალო მაღაზია გახსნა. დღეს „ევროპროდუქტის“ მაღაზიათა ქსელი მოიცავს ჯამში 41 სუპერმარკეტს თბილისსა და მის გარეთ, სადისტრიბუციო ქსელი კი 2600-მდე მაღაზიას ამარაგებს. კომპანიის აქციების ნახევარი ნინო ბრეგვაძეს ეკუთვნის (59-ე ადგილი „ფორბსის“ უმდიდრესი მეწარმეების სიაში), მეორე ნახევარი კი „ჯი-თი-გრუპს“, რომელიც ჩვენს სიაში მე-17 ადგილზეა.

#65 ბაზის ბანკი

₾307.6 მლნ ფინანსური მომსახურება ▼

მფლობელი: ჰუალინგ ჯგუფი - 91,7%; მი ზაიცი და მინორიტარი აქციონერები - 8,3%

„ბაზისბანკმა“ საქმიანობა 1993 წელს დაიწყო ერთი სერვისცენტრით და რამდენიმე თანამშრომლით. 2008 წელს მისი აქციების 15% შეიძინა ევროპის განვითარებისა და რეკონსტრუქციის ბანკმა (EBRD), 2012 წელს კი „ბაზისბანკი“ ჩინური „ჰუალინგ ჯგუფის“ საკუთრებაში გადავიდა (დღეს ისინი ფლობენ ბანკის აქციების 92,30%-ს). 2026 წლის აპრილში „ბაზისბანკმა“ შეიძინა „ლიბერთი ბანკი“, რომელიც ჩვენს სიაში 55-ე ადგილზეა. სიაში ეს ცვლილება იმიტომ არ ასახულა, რომ კომპანიების უკანასკნელი ფინანსური ანგარიშები, რომელთა ანალიზსაც ჩვენ ვეყრდნობით, ამ შესყიდვამდეა შედგენილი.

#66 ევოლუშენი

₾300.6 მლნ ტექნოლოგიები და ტელეკომუნიკაცია ▼

მფლობელი: Evolution AB - 100%

„ევოლუშენ გეიმინგი“ შვედური მულტინაციონალური კომპანიაა, რომელიც აზარტული თამაშების კომპანიებს ლაივ–კაზინოს მომსახურებას სთავაზობს. „ევოლუშენი“ საქართველოში 2017 წელს შემოვიდა. მისი ძირითადი საქმიანობა კაზინოს თამაშების ვიდეო და აუდიო ლაივ–სტრიმინგია.

#67 ლაიქ ჰაუსი

₾298.0 მლნ უძრავი ქონება და მშენებლობა ▼

მფლობელი: ლევან მჟავანაძე - 100%

„ლაიქ ჰაუსი“ ბათუმში მოქმედი სამშენებლო და დეველოპერული კომპანიაა, რომელიც ბაზარზე თითქმის 20 წლის წინ გამოჩნდა. მისი მფლობელია ლევან მჟავანაძე - „ფორბსის“ მიხედვით, საქართველოს 65-ე უმდიდრესი მეწარმე.

#68 Bolero & Company

₾275.9 მლნ სურსათი და სასმელები ▼

მფლობელი: ვახტანგ კარიჭაშვილი - 100%

Bolero & Company საქართველოს ერთ-ერთი უმსხვილესი სავაჭრო-სამრეწველო ჯგუფის ნაწილია, რომლის ძირითადი საქმიანობაც ღვინისა და სპირტიანი სასმელების წარმოებაა. საწარმოთა ჯგუფი ჯამურად საქართველოში მოყვანილი ყურძნის ნახევარზე მეტს ამუშავებს. მათი პროდუქცია ძირითადად ექსპორტისთვისაა განკუთვნილი, აქედან უდიდესი ნაწილი - რუსული ბაზრისთვის. კომპანიის მფლობელია ვახტანგ კარიჭაშვილი, საქართველოსა და რუსეთის ორმაგი მოქალაქე, რომელიც „ფორბსის“ უმდიდრესი მეწარმეების სიაში მე-11 ადგილზე მოხვდა.

#69 ქირურგიის ეროვნული ცენტრი

₾265.9 მლნ ჯანდაცვა და ფარმაცია ▼

მფლობელი: პაატა კურტანიძე - 100%

„კონსტანტინე ერისთავის სახელობის ექსპერიმენტული და კლინიკური ქირურგიის ეროვნული ცენტრი“ 1946 წელს დაარსებული კლინიკაა, რომელიც „ავერსი-ფარმას“ საკუთრებაშია. სააქციო საზოგადოება „ქირურგიის ეროვნულ ცენტრს“ აგრეთვე ეკუთვნის მახინჯაურის მრავალპროფილიანი პოლიკლინიკა და კლინიკა „ახალი სიცოცხლე“.

#70 მპ დეველოპმენტი

₾258.5 მლნ უძრავი ქონება და მშენებლობა ▼

მფლობელი: პაატა გამგონეიშვილი - 50%; სოსო და ლევან ფხაკაძეები - 25-25%

2012 წელს დაარსებული „ემპი დეველოპმენტი“ „ვისოლ ჯგუფში“ შემავალი უძრავი ქონების მართვის კომპანიაა. მისი პორტფელი მოიცავს 19 სავაჭრო ცენტრს თბილისსა და საქართველოს სხვა ქალაქებში. საერთო გასაქირავებელი ფართი 74 000 მ²-ს აღწევს.

#71 ღუდუშაურის საავადმყოფო

₾257.1 მლნ ჯანდაცვა და ფარმაცია ▼

მფლობელი: გიგი გოცირიძე - 91%; ელგუჯა ქებურია - 9%

ღუდუშაურის განახლებული ეროვნული სამედიცინო ცენტრი მულტიპროფილური სამედიცინო დაწესებულებაა ამბულატორიული და დიაგნოსტიკური სერვისებით, გადაუდებელი მიმღებით და ჰოსპიტალით. სტიქიური და საომარი კატაკლიზმების დროს რამდენიმე საათში შეიძლება მისი გადაკეთება სამხედრო რეჟიმის ჰოსპიტლად. კლინიკას აქვს ელექტრო– და წყალმომარაგების ალტერნატიული წყაროები და საჰაერო ტრანსპორტის დასაფრენი ბილიკი. ღუდუშაურის სამედიცინო ცენტრში 1000-ზე მეტი ადამიანია დასაქმებული.

#72 ლაქტალის ჯორჯია

₾250.1 მლნ საცალო ვაჭრობა და დისტრიბუცია ▼

მფლობელი: Lactalis - 100%

„ლაქტალისი“ რძის პროდუქტების ფრანგული მულტინაციონალური კომპანიაა, რომელიც საქართველოში 2011 წლიდან საქმიანობს. 2016 წელს „ლაქტალის ჯგუფი“ გახდა „სანტეს“ წილის მფლობელიც. საქართველოში კომპანიის სხვა ბრენდებს შორისაა „პარმალატი“, „პრეზიდენტი“ და „გალბანი“.

#73 მეგატექნიკა

₾246.7 მლნ საცალო ვაჭრობა და დისტრიბუცია ▼

მფლობელი: გრიგორი გუდავაძე - 50%; თამარა გაბრიელაშვილი - 40%; ნინო გაბუნია - 10%

„მეგატექნიკა“ საყოფაცხოვრებო ტექნიკის მაღაზიების ქსელია, რომელიც ბაზარზე 1996 წელს შევიდა. დღეს მისი ქსელი მოიცავს ჯამში 20 მაღაზიას საქართველოს 12 ქალაქში და 170-მდე ადამიანს ასაქმებს. თავის მხრივ, კომპანიის სადილერო ქსელი მოიცავს 100-მდე პარტნიორ მაღაზიას 40-მდე ქალაქსა და დაბაში. კომპანიის აქციების 50%-ის მფლობელი, გრიგორი გუდავაძე, რომელიც საქართველოსა და რუსეთის ორმაგი მოქალაქეა, „ფორბსის“ უმდიდრესი მეწარმეების სიაში 89-ე ადგილზე მოხვდა.

#74 პეის ჯორჯია

₾242.1 მლნ ტრანსპორტი და ავტოინდუსტრია ▼

მფლობელი: ლაურა ლარიონი - 38%; ირაკლი კერვალიშვილი - 38%; ირაკლი თათეიშვილი - 10%; თეიმურაზ კერვალიშვილი - 10%; თამაზ კაპანაძე - 4%

2000 წელს დაარსებული „პეის ჯორჯია“ დაკავებულია ტვირთების ტრანსპორტირებით, ექსპედირებით და დატვირთვა-გადმოტვირთვის სამუშაოებით. კომპანია მართავს გემების სააგენტოს ფოთის საზღვაო პორტში, ისევე, როგორც ღია და დახურულ საწყობებს.

#75 გლობალფარმი

₾237.5 მლნ მულტისექტორული ▼

მფლობელი: ანტონ ობოლაშვილი - 100%

„გლობალფარმი“ 2005 წელს დაარსებული ფარმაცევტული კომპანიაა, რომელიც 200-ზე მეტი მედიკამენტის იმპორტს და დისტრიბუციას ეწევა. გარდა ამისა, კომპანიას ეკუთვნის საცხოვრებელი კომპლექსი 170 ბინით და კომერციული ფართებით. „გლობალფარმის“ 100%-იანი წილის მფლობელი ანტონ ობოლაშვილია, რომელიც 2020 წლიდან „ქართული ოცნების“ დეპუტატია. „ფორბსის“ უმდიდრესი მეწარმეების სიაში ის 46-ე ადგილზე მოხვდა.

#76 კავკასიის მედიცინის ცენტრი

₾231.3 მლნ ჯანდაცვა და ფარმაცია ▼

მფლობელი: საქართველოს კაპიტალი - მშობელი საწარმო

„კავკასიის მედიცინის ცენტრი“ ჰოლდინგ „საქართველოს კაპიტალის“ საკუთრებაში არსებული კიდევ ერთი კლინიკაა, რომელიც 200-ზე მეტ სამედიცინო სერვისს აწვდის თვეში 10 000-მდე პაციენტს. 250-ზე მეტ საწოლზე გათვლილ მულტიპროფილურ რეფერალურ ჰოსპიტალში ასევე ტარდება ისეთი იშვიათი სამედიცინო ინტერვენციები, როგორიცაა ძვლის ტვინის ტრანსპლანტაცია თუ რქოვანას გადანერგვა.

#77 ჯიდიაი

₾217.8 მლნ საცალო ვაჭრობა და დისტრიბუცია ▼

მფლობელი: ვიონეო ჰოლდინგი - 31,70%; ალპფორდიო სერვისიზ - 30,69%; არევაკო ინვესთმენთზ - 17,61%; კორინარია მენეჯმენტ - 20%

„ჯი-დი-აი“ 2016 წელს დაარსებული კომპანიაა, რომელიც „ფილიპ მორისის“ თამბაქოს ნაწარმის დისტრიბუციას ეწევა. „ჯი-დი-აი“-ში 300-ზე მეტი ადამიანია დასაქმებული.

#78 პეპსი

₾214.6 მლნ სურსათი და სასმელები ▼

მფლობელი: ჰაიკ სარქისიანი - მაკონტროლებელი

სააქციო საზოგადოება „იბერია რეფრეშმენტსი“ ფლობს „პეპსის“ პროდუქტების ფრანჩიზს საქართველოში. კომპანია პროდუქციის ძირითად ნაწილს თავისივე ქარხანაში აწარმოებს, ნაწილი კი იმპორტირებულია. მისი მფლობელი სომხური წარმოშობის ბრიტანელი ბიზნესმენი ჰაიკ სარქისიანია. საქართველოს გარდა, სარქისიანის Revery Group–ი „პეპსის“ ფრანჩიზებს სომხეთსა და უზბეკეთში ფლობს.

#79 ჯეოსთილი

₾213.4 მლნ მრეწველობა და წარმოება ▼

მფლობელი: Georgian Steel Group Holdings Limited - 100%

„ჯეოსთილი“ სამშენებლო არმატურის მწარმოებელია, რომელმაც 2010 წელს რუსთავში საკუთარი საწარმო გახსნა. კომპანია ფოლადის ინდური კონგლომერატის, JSW-ს წევრია. „ჯეოსთილმა“ საქართველოში შემოსვლიდან $100 მილიონამდე უცხოური ინვესტიცია შემოიტანა და ამჟამად 500-მდე ადამიანს ასაქმებს.

#80 გაგუას კლინიკა

₾209.8 მლნ ჯანდაცვა და ფარმაცია ▼

მფლობელი: დავით გაგუა - 51%, ირაკლი გაგუა - 47%, სპირიდონ ჯოლოხავა - 2%

„გაგუას კლინიკა“ 1996 წელს დაარსდა და საქართველოში პირველი კერძო სამშობიარო კლინიკა იყო. 2024 წელს კლინიკის სამეანო სერვისების წილი სამედიცინო ბაზარზე თბილისში 36,4%-ს შეადგენდა, საქართველოში კი - 12,42%-ს. მისი მესაკუთრეები არიან დავით გაგუა, ირაკლი გაგუა და სპირიდონ ჯოლოხავა. კლინიკაში 400-ზე მეტი ადამიანია დასაქმებული.

#81 კარფური

₾208.7 მლნ საცალო ვაჭრობა და დისტრიბუცია ▼

მფლობელი: Majid Al Futtaim Hypermarkets - 100%

„კარფური“ სუპერმარკეტების ფრანგული ქსელია, რომლის ლიცენზიასაც საქართველოში საამიროების Majid Al Futtaim Hypermarkets–ი ფლობს. საქართველოში პირველი „კარფური“ 2012 წელს გაიხსნა, 2024 წლის დეკემბრის მონაცემებით კი მისი ქსელი საქართველოს 10 ქალაქში მოიცავს ჯამში 6 ჰიპერმარკეტს, 19 სუპერმარკეტსა და 72 პატარა ფორმატის სუპერმარკეტს. იმავე მონაცემებით კომპანიაში დასაქმებული იყო 2700-ზე მეტი ადამიანი.

#82 ელთ ბილდინგი

₾200.1 მლნ უძრავი ქონება და მშენებლობა ▼

მფლობელი: ელგუჯა თურმანიძე - 100%

ELT ჯგუფი სამშენებლო და დეველოპერული კომპანიაა, რომელმაც საქმიანობა 2015 წელს დაიწყო ბათუმში და მოგვიანებით თბილისშიც გადაინაცვლა. კომპანია ასაქმებს 200-ზე მეტ ადამიანს. მისი მფლობელი, ელგუჯა თურმანიძე, 76-ე ადგილზე მოხვდა „ფორბსის“ უმდიდრესი მეწარმეების სიაში.

#83 მოდუსი

₾197.7 მლნ უძრავი ქონება და მშენებლობა ▼

მფლობელი: ამირან დარჩიძე - 100%

„მოდუსი“ ავეჯისა და სამშენებლო მასალების ჰიპერმარკეტების ქსელია, რომელიც 2006 წელს დაარსდა. ის მოიცავს ორ ფილიალს ბათუმში და ორსაც – თბილისში. კომპანიის მფლობელია ამირან დარჩიძე, „ფორბსის“ მიხედვით, საქართველოს 51-ე უმდიდრესი მეწარმე.

#84 კრისტალი

₾197.1 მლნ ფინანსური მომსახურება ▼

მფლობელი: AGRIF COÖPERATIEF - 40%; DWM Funds S.C.A. - SICAV SIF - 18,8%; ინდივიდუალური აქციონერები - 41%

„კრისტალი“ 2007 წელს დაარსებული ფინანსური ინსტიტუტია, რომელმაც საქმიანობა მიკროსაფინანსო ორგანიზაციის სტატუსით დაიწყო, 2025 წელს კი ეროვნული ბანკისგან მიკრობანკის ლიცენზია მიიღო. „კრისტალი“ ქვეყნის მასშტაბით 48 ფილიალს ფლობს და 1000-ზე მეტ ადამიანს ასაქმებს. კომპანიის უმსხვილესი აქციონერები ბელგიური AGRIF COÖPERATIEF (აქციების 40%) და ლუქსემბურგული DWM Funds S.C.A. - SICAV SIF (18,8%) არიან. დანარჩენი 41% ნაწილდება ინდივიდუალურ აქციონერებზე.

#85 ჯი აი ჯი

₾192.4 მლნ ენერგეტიკა და კომუნალური მომსახურება ▼

მფლობელი: დავით ბეჟუაშვილი - მაკონტროლებელი

1994 წელს დაარსებული „ჯი-აი-ჯი ჰოლდინგი“ 10-ზე მეტ სფეროში ფლობს აქტივებს, მათ შორისაა ენერგეტიკა, ჯანდაცვა და განათლება. სხვა კომპანიებთან ერთად, ჰოლდინგის პორტფელში შედის „მტკვარი ენერჯი“, „ევროპული სკოლა“, კიევის ამერიკული უნივერსიტეტი და ხერსონის პორტი. „ჯი-აი-ჯის“ დამფუძნებელი და დირექტორთა საბჭოს თავმჯდომარე, დავით ბეჟუაშვილი, „ფორბსის“ უმდიდრესი მეწარმეების სიაში მე-20 ადგილზეა.

#86 შარმ ტრეიდინგი

₾188.7 მლნ საცალო ვაჭრობა და დისტრიბუცია ▼

მფლობელი: დიმიტრი ნიშნიანიძე - 34%; ლევან კაკაბაძე - 30%; გიორგი ჩივაძე - 16%; ვახტანგ საძაგლიშვილი, სოლომონ მამუჩიშვილი - 10-10%

„შარმ ტრეიდინგი“ 2000 წელს დაარსებული კომპანიაა, რომელიც ეწევა საყოფაცხოვრებო და ჰიგიენური პროდუქციისა და საკვების იმპორტსა და დისტრიბუციას. კომპანიაში 600-ზე მეტი ადამიანია დასაქმებული. „ფორბსის“ უმდიდრესი მეწარმეების სიაში „შარმ ტრეიდინგის“ სამი მეწილე მოხვდა: დიმიტრი ნიშნიანიძე (37-ე ადგილი), ლევან კაკაბაძე (56-ე) და გიორგი ჩივაძე (85-ე).

#87 დომინო

₾188.3 მლნ უძრავი ქონება და მშენებლობა ▼

მფლობელი: ოლეგ პავლოვი - 100%

„დომინო“ სამშენებლო და სარემონტო მასალების ჰიპერმარკეტია თბილისში, რომლის პირველი ფილიალი 2015 წელს გაიხსნა, მეორე კი - 2021 წელს. მისი მფლობელი რუსი ბიზნესმენი და ინვესტორი ოლეგ პავლოვია. პავლოვის საკუთრებაშია სავაჭრო და გასართობი ქალაქი „ისთ ფოინთი“ რომელიც 44-ე ადგილზეა ჩვენს სიაში და სადაც პირველი „დომინო“ მდებარეობს.

#88 ჯეო სქაი

₾177.6 მლნ ტრანსპორტი და ავტოინდუსტრია ▼

მფლობელი: ზაურ ქორთოშიძე - 100%

„ჯეო სქაი“ 2017 წელს დაარსდა და საჰაერო ტვირთების გადაზიდვითაა დაკავებული. 2021 წელს კომპანიამ გახსნა ტექნიკური მომსახურების საწარმო „ჯეო სქაი ტექნიკსი“. „ჯეო სქაის“ მფლობელია ზაურ ქორთოშიძე, რომელიც მე-60 ადგილზე მოხვდა „ფორბსის“ უმდიდრესი ქართველი მეწარმეების სიაში.

#89 მაღალტექნოლოგიური ჰოსპიტალი მედცენტრი

₾172.6 მლნ ჯანდაცვა და ფარმაცია ▼

მფლობელი: მუხამედ ართმელაძე - 100%

„მედცენტრმა“ 2012 წელს დაიწყო ფუნქციონირება აჭარის ონკოლოგიური ცენტრის რეკონსტრუქციის შედეგად. ამჟამად ის მოიცავს ხუთ ფილიალს ბათუმში. კომპანიის მფლობელია საქართველოსა და რუსეთის ორმაგი მოქალაქე მუხამედ ართმელაძე, რომელიც „ფორბსის“ უმდიდრესი მეწარმეების სიაში 49-ე ადგილზე მოხვდა.

#90 მნკორპი

₾170.5 მლნ მრეწველობა და წარმოება ▼

მფლობელი: გურამ თალაკვაძე - 100%

„მნკორპი“ დაკავებულია მანგანუმის კონცენტრატის რეალიზაციით, რომელსაც „ჯორჯიან მანგანეზისგან“ ყიდულობს. 2024 წლის აგვისტოში „მნკორპი“ შეიძინა გურამ თალაკვაძემ, რომელიც 32-ე ადგილზეა „ფორბსის“ უმდიდრესი მეწარმეების სიაში.

#91 ჩაჩავას კლინიკა

₾165.7 მლნ ჯანდაცვა და ფარმაცია ▼

მფლობელი: ელგუჯა გოცირიძე - 76%; ნიკოლოზ ცაავა - 7%; ფატმან ცაავა - 7% და სხვები

„ჩაჩავას კლინიკა“ მულტიპროფილური სამედიცინო დაწესებულებაა თბილისში. 2024 წლის მონაცემებით, მასზე მოდიოდა თბილისის სამეანო სერვისების ბაზრის 16,8%, საქართველოს მასშტაბით კი - 6,3%. კლინიკაში 400-მდე ადამიანი იყო დასაქმებული. „ჩაჩავას კლინიკის“ აქციების 76%-ს ფლობს ელგუჯა გოცირიძე, რომელიც 2020 წლიდან „ქართული ოცნების“ დეპუტატია. „ფორბსის“ უმდიდრესი ქართველი მეწარმეების სიაში გოცირიძე 30-ე ადგილზეა.

#92 მიქსორი

₾160.9 მლნ სურსათი და სასმელები ▼

მფლობელი: ცეზარ ჩოჩელი - 100%

„მიქსორი“ ბეტონისა და რკინაბეტონის მწარმოებელი კომპანიაა, რომელმაც საქმიანობა 2008 წელს დაიწყო ქვიშისა და ღორღის წარმოებით, რასაც მალევე მოჰყვა ავჭალაში ბეტონის ქარხნის აშენება. კომპანია თავის სფეროში რეგიონის ერთ-ერთი ლიდერია. მისი მფლობელი, ცეზარ ჩოჩელი, 39-ე ადგილზე მოხვდა „ფორბსის“ უმდიდრესი მეწარმეების სიაში.

#93 ჯეთთიქლაუდ

₾157.0 მლნ ტექნოლოგიები და ტელეკომუნიკაცია ▼

მფლობელი: დავიდ სლონიმსკი - 100%

„ჯეთთიქლაუდი“ რუსული IT–კომპანიაა, რომელიც საქართველოში 2022 წლის 10 მარტს დარეგისტრირდა. მისი მფლობელი და დირექტორი რუსი ბიზნესმენი დავიდ სლონიმსკია.

#94 ქართული სადისტრიბუციო მარკეტინგული კომპანია

₾156.9 მლნ საცალო ვაჭრობა და დისტრიბუცია ▼

მფლობელი: ვიონეო ჰოლდინგი - 38,44%; ალფორდიო სერვისიზ - 37,21%; არევაკო ინვესთმენთ - 21,35%; დავით ალავიძე - 3%

“ქართული სადისტრიბუციო და მარკეტინგული კომპანია" 2005 წელს დაარსდა და ეწევა პროდუქციის ფართო ასორტიმენტის იმპორტსა და დისტრიბუციას. კომპანია ამარაგებს ჰიპერმარკეტებს, სუპერმარკეტებსა და მცირე სასურსათო მაღაზიებს საქართველოს მასშტაბით. ასაქმებს 400-მდე ადამიანს.

#95 ინტერნეიშნლ მარკეტინგ ენდ თრეიდინგ

₾155.2 მლნ საცალო ვაჭრობა და დისტრიბუცია ▼

მფლობელი: არმან მარაბიანი - 100%

„ინტერნეიშნლ მარკეტინგ ენდ თრეიდინგი“ დაარსდა 2016 წელს და დაკავებულია თამბაქოსა და მისი ნაწარმის იმპორტითა და რეალიზაციით. კომპანიის დამფუძნებელი და ერთადერთი მფლობელი სომეხი ბიზნესმენი არმან მარაბიანია.

#96 ჯიბე

₾151.7 მლნ საცალო ვაჭრობა და დისტრიბუცია ▼

მფლობელი: ლევან დავითაძე - მაკონტროლებელი

„ჯიბე“ საქართველოში „ქეშ & ქერი“ ტიპის ერთადერთი ფართომასშტაბიანი ქსელია. ეს ფორმატი ბიზნესებს და საცალო მომხმარებლებს საშუალებას აძლევს, ადგილზე შეიძინონ საბითუმო პროდუქცია. კომპანია ბაზარზე 2010 წელს გამოჩნდა. „ჯიბე“ აერთიანებს 40-ზე მეტ ფილიალს ქვეყნის მასშტაბით. კომპანიის საბოლოო მაკონტროლებელი ლევან დავითაძეა.

#97 Hualing

₾150.1 მლნ უძრავი ქონება და მშენებლობა ▼

მფლობელი: Huashan Investment Co - 100%

ჩინური „ჰუალინგი“ აკონტროლებს სპეციალურ ეკონომიკურ ზონას თბილისის ზღვასთან, რაც მოიცავს უძრავ ქონებისა და ხუთვარსკვლავიანი სასტუმროს მართვას, ისევე როგორც სამშენებლო და სარემონტო მასალით საბითუმო ვაჭრობას.

#98 ჰელსიკორი

₾149.0 მლნ ჯანდაცვა და ფარმაცია ▼

მფლობელი: თამარ ემუხვარი (38%), რონ კარმელი (31,4%) მანანა სანაძე (5%), გიული ალასანია (5%) ნოდარ ემუხვარი (9,54%) ნინო ემუხვარი (8,06%) რუსუდან ნაფეტვერიძე (3%)

„ისრაელ-საქართველოს სამედიცინო კვლევითი კლინიკა ჰელსიკორი” 2008 წელს დაარსებული კლინიკაა თბილისში. მისი ყველაზე მსხვილი აქციონერები არიან თამარ ემუხვარი (37%), რონ კარმელი (32,4%) და საქართველოს უნივერსიტეტი (10%).

#99 GBG

₾148.7 მლნ უძრავი ქონება და მშენებლობა ▼

მფლობელი: ლევან კაჭარავა - 60% გიორგი ჟორდანია 40%

GBG (Georgian Building Group) ცემენტისა და ბეტონის მწარმოებელი კომპანიაა, რომელიც 2005 წელს დაარსდა და ამჟამად სამ ქარხანას ფლობს თბილისში. საწარმოში 145 ადამიანია დასაქმებული. მისი მფლობელები არიან ლევან კაჭარავა (აქციების 60%) და გიორგი ჟორდანია (40%).

#100 გუდვილი

₾146.5 მლნ საცალო ვაჭრობა და დისტრიბუცია ▼

მფლობელი: ირინე ქოსაშვილი - 95% დავით გლუნჩაძე 5%

„გუდვილი" საქართველოში ჰიპერმარკეტების პირველი ქსელია, რომლის ისტორიაც 2003 წლიდან იწყება. ამჟამად, „გუდვილი" აერთიანებს 5 ჰიპერმარკეტს და „გუდვილი გურმეს" 4 მაღაზიას.

მეთოდოლოგია

რეიტინგში არ შედის კომპანიები, რომლებსაც 100%-ით ფლობს საქართველო ან რომელიმე უცხო ქვეყნის სახელმწიფო. ამ კატეგორიას მიეკუთვნება, მაგალითად, აზერბაიჯანის სახელმწიფო ნავთობკომპანია SOCAR-ის მიერ კონტროლირებული კომპანიები. ქართულ ბაზარზე წარმოდგენილად მივიჩნიეთ საქართველოში დაფუძნებული ან რეგისტრირებული იურიდიული პირები, რომელთა საქმიანობის ძირითადი ნაწილი საქართველოში ხორციელდება. კომპანიების მფლობელთა შესახებ მონაცემები ასახავს 2026 წლის 5 აგვისტოს მდგომარეობით საჯარო წყაროებში ხელმისაწვდომ ინფორმაციას.

არაფინანსური კომპანიების უმეტესობა შეფასდა EV/EBITDA მეთოდით. EBITDA, ანუ მოგება საპროცენტო ხარჯების, გადასახადების, ცვეთისა და ამორტიზაციის დარიცხვამდე, გამრავლდა შესაბამისი ინდუსტრიისთვის განვითარებულ ეკონომიკებში გაანგარიშებულ მულტიპლიკატორზე. მიღებულ სიდიდეს გამოაკლდა კომპანიის წმინდა ვალი, რითიც კომპანიის საბოლოო ღირებულება დადგინდა. თუ კომპანიას უარყოფითი EBITDA აქვს, თუმცა შემოსავლების დინამიკა მომავალში მოგებაზე გასვლის პერსპექტივას აჩვენებს, შეფასებისთვის EV/Sales მეთოდს ვიყენებთ. კომპანიის შემოსავალი გამრავლდა შესაბამის მულტიპლიკატორზე, მიღებულ ღირებულებას კი წმინდა ვალი გამოაკლდა.

კომერციული ბანკები, მიკროსაფინანსო ორგანიზაციები, საკრედიტო კავშირები, სადაზღვევო კომპანიები და სხვა ფინანსური ინსტიტუტები P/B მეთოდით შეფასდა. კომპანიის საკუთარი კაპიტალი გამრავლდა ევროპის საფინანსო სექტორისთვის 2023 წლის მეორე კვარტლის მდგომარეობით განსაზღვრულ შესაბამის მულტიპლიკატორზე. გამოყენებული მულტიპლიკატორებია: კომერციული ბანკები: 0,8; სადაზღვევო კომპანიები: 1,3; სხვა ფინანსური მომსახურება: 1,5. იმ ბანკებისთვის, რომელთა აქციებიც საფონდო ბირჟაზე ივაჭრება, საბაზრო კაპიტალიზაცია გამოვიყენეთ. ამ პრინციპით შეფასდა „თიბისი ბანკი“ და „საქართველოს ბანკი“.

რეიტინგში წარმოდგენილი კომპანიების შეფასებები ეფუძნება მათ 2024 წლის ფინანსურ ანგარიშებს. ინფორმაციის ძირითადი წყაროა ბუღალტრული აღრიცხვის, ანგარიშგებისა და აუდიტის ზედამხედველობის სამსახურის ანგარიშგებების პორტალზე გამოქვეყნებული ფინანსური და მმართველობითი ანგარიშგებები. დამატებითი ინფორმაცია მოვიპოვეთ საჯარო რეესტრიდან, კომპანიების ვებგვერდებიდან და სხვა ღია წყაროებიდან.