მსოფლიოს 10 უმდიდრესი ადამიანი | 2026 წლის მარტი

ამერიკული გამოცემა Forbes-ის უმდიდრეს ადამიანთა რეიტინგში, 2025 წლის მაისის შემდეგ, პირველ ადგილს უცვლელად Tesla-სა და SpaceX-ის აღმასრულებელი დირექტორი, ილონ მასკი იკავებს. გასულ თვეში მასკის ქონების ღირებულებამ $800 მილიარდს გადააჭარბა, რის შედეგადაც მასსა და რეიტინგში მეორე პოზიციაზე მყოფ ლარი პეიჯს ($247 მილიარდი) შორის სხვაობა $500 მილიარდზე მეტია.

Forbes-ის რეიტინგში მსოფლიოს ათი უმდიდრესი ადამიანის პოზიციები გასული თვის შემდეგ მნიშვნელოვნად არ შეცვლილა. ადგილები მხოლოდ ორმა ადამიანმა გაცვალა: უორენ ბაფეტი მე-9 პოზიციაზე გადავიდა, ხოლო Zara-ს დამფუძნებელი, ესპანელი მილიარდერი ამანსიო ორტეგა მე-10 ადგილამდე დაქვეითდა. ორივე მათგანი რეიტინგის ათეულიდან იმ მხოლოდ ოთხ პირს შორის იყო, რომელთა ქონებაც თებერვალში გაიზარდა.

ყველაზე მოგებიანი გასული თვე ილონ მასკისთვის აღმოჩნდა, რომელმაც თავის სიმდიდრეს $64 მილიარდი შემატა. შედეგად, მასკმა კიდევ ერთი რეკორდი მოხსნა და გახდა პირველი ადამიანი, რომლის სიმდიდრემ $800 მილიარდს გადააჭარბა. ცნობისთვის, ოქტომბერში მასკი გახდა პირველი ადამიანი, რომლის სიმდიდრემ $500 მილიარდს გადააჭარბა, შემდეგ, 15 დეკემბერს — $600 მილიარდს, ხოლო 19 დეკემბერს — $700 მილიარდს. წარმოდგენილ რეიტინგში, 2026 წლის პირველი მარტის მონაცემებით, მსოფლიოს უმდიდრესი ადამიანი $839 მილიარდის ქონებას ფლობს.

თებერვლის ზრდით, მასკმა ნახევარ ტრილიონ აშშ დოლარზე მეტით გაზარდა თავისი უპირატესობა მსოფლიოს მეორე უმდიდრეს ადამიანთან, Google-ის თანადამფუძნებელ ლარი პეიჯთან. პეიჯმა მეორე ადგილის შენარჩუნება თებერვლის თვეში $20-მილიარდიანი დანაკარგის მიუხედავად მოახერხა. პეიჯთან ერთად, გასულ თვეში $18 მილიარდი დაკარგა Google-ის კიდევ ერთმა თანადამფუძნებელმა, სერგეი ბრინმა. თუმცა თებერვალში ყველაზე დიდი დანაკარგი ჯეფ ბეზოსმა განიცადა, რადგან Amazon-ის აქციების ღირებულების 12%-იანი ვარდნის შედეგად, მისი ქონება $26 მილიარდით შემცირდა.

ქვემოთ მოცემულ რეიტინგში წარმოდგენილია Forbes-ის შეფასებით მსოფლიოს ათი უმდიდრესი ადამიანის ქონება, 2026 წლის პირველი მარტის მონაცემებით. კოლექტიურად, მათი სიმდიდრის ღირებულება $2.6 ტრილიონია, რაც გასული თვის ანალოგიურია. მსოფლიოს ყველაზე მდიდარი ათი ადამიანიდან რვა ამერიკელია, ორი არაამერიკელი წევრი კი ფრანგი ბერნარ არნო და ესპანელი ამანსიო ორტეგა არიან. პირველი მარტის მდგომარეობით, Forbes-ის ათეულში კვლავ ყველა მამაკაცია.

ცნობისთვის, პლანეტის უმდიდრესი ქალი Walmart-ის დამფუძნებლის, სემ უოლტონის შვილიშვილი ელის უოლტონია. 2026 წლის პირველი მარტის მდგომარეობით, ელის უოლტონი $134 მილიარდის ქონებას ფლობს, რაც მას მსოფლიოში მე-14 უმდიდრეს ადამიანად აქცევს.

მსოფლიოს 10 უმდიდრესი ადამიანი (2026 წლის 1-ელი მარტის მდგომარეობით):

#1 ილონ მასკი
ქონება: $839 მლრდ (+64 მლრდ)
წყარო: Tesla, SpaceX, xAI, X
ასაკი: 54
საცხოვრებელი ადგილი: ოსტინი, ტეხასი
მოქალაქეობა: აშშ

#2 ლარი პეიჯი
ქონება: $257 მლრდ (-$20 მლრდ)
წყარო: Google
ასაკი: 52
საცხოვრებელი ადგილი: პალო-ალტო, კალიფორნია
მოქალაქეობა: აშშ

#3 სერგეი ბრინი
ქონება: $237 მლრდ (-$18 მლრდ)
წყარო: Google
ასაკი: 52
საცხოვრებელი ადგილი: ლოს-ალტოსი, კალიფორნია
მოქალაქეობა: აშშ

#4 ჯეფ ბეზოსი
ქონება: $224 მლრდ (-$26 მლრდ)
წყარო: Amazon
ასაკი: 61
საცხოვრებელი ადგილი: მაიამი, ფლორიდა
მოქალაქეობა: აშშ

#5 მარკ ცუკერბერგი
ქონება: $222 მლრდ (-$23 მლრდ)
წყარო: Meta (Facebook)
ასაკი: 41
საცხოვრებელი ადგილი: პალო-ალტო, კალიფორნია
მოქალაქეობა: აშშ

#6 ლარი ელისონი
ქონება: $191 მლრდ (-$21 მლრდ)
წყარო: Oracle
ასაკი: 81
საცხოვრებელი ადგილი: ვუდსაიდი, კალიფორნია
მოქალაქეობა: აშშ

#7 ბერნარ არნო
ქონება: $171 მლრდ (+$2 მლრდ)
წყარო: LVMH
ასაკი: 76
საცხოვრებელი ადგილი: პარიზი
მოქალაქეობა: საფრანგეთი

#8 ჯენსენ ჰუანგი
ქონება: $154 მლრდ (-$12 მლრდ)
წყარო: Nvidia
ასაკი: 62
საცხოვრებელი ადგილი: ლოს-ალტოსი, კალიფორნია
მოქალაქეობა: აშშ

#9 უორენ ბაფეტი
ქონება: $149 მლრდ (+$7 მლრდ)
წყარო: Berkshire Hathaway
ასაკი: 95
საცხოვრებელი ადგილი: ომაჰა, ნებრასკა
მოქალაქეობა: აშშ

#10 ამანსიო ორტეგა
ქონება: $148 მლრდ (+$3 მლრდ)
წყარო: Inditex (Zara)
ასაკი: 89
საცხოვრებელი ადგილი: ლა-კორუნია, ესპანეთი
მოქალაქეობა: ესპანეთი