ევროპის ყველაზე ძვირი და ყველაზე იაფი ავიაკომპანიები

ფოტო: AP

გლობალური ფრენებისა და ბარგის კომპენსაციის სერვისმა, AirAdvisor-მა, ევროპის მასშტაბით ყველაზე ძვირი და ყველაზე იაფი ავიაკომპანიების რეიტინგი წარმოადგინა. ანგარიში ჯამში რეგიონის 23 ავიაკომპანიას RASK-ის (Revenue per Available Seat Kilometre) მაჩვენებლის მიხედვით აფასებს. აღნიშნული მაჩვენებელი გულისხმობს საშუალო შემოსავალს მგზავრ-კილომეტრზე, შესაბამისად, იმ თანხას, რომელსაც ავიაკომპანია თითოეული ხელმისაწვდომი ადგილისთვის გავლილ კილომეტრზე იღებს.

RASK-ის მიხედვით, შესაძლებელია შეფასდეს, თუ საშუალოდ რამდენს იხდის ერთი მგზავრი აღნიშნული ავიაკომპანიით მგზავრობისას — ფრენის მანძილისა და ხელმისაწვდომი ადგილების გათვალისწინებით. შედეგად, მაჩვენებელი ბილეთის ფასთან ერთად მოიცავს დამატებით ხარჯებსაც, როგორებიცაა, მაგალითად, ბარგისა და თვითმფრინავში ადგილის არჩევის საფასური. შესაბამისად, რაც უფრო მაღალია RASK-ი, მით უფრო ძვირად ითვლება ავიაკომპანია.

AirAdvisor-ის კვლევაში ძირითადად მსხვილი და მნიშვნელოვანი რეგიონული ავიაკომპანიები მოხვდნენ. ანგარიშის თანახმად, მცირე ზომის ავიაკომპანიებს თითო მგზავრზე ხშირად უფრო მაღალი ხარჯები აქვთ, რაც ნაკლები რაოდენობით მარშრუტის, მცირე ავიაპარკის, დაბალი მოთხოვნის ან რთულად მისადგომი მიმართულებების მომსახურების მიზეზით აიხსნება.

ამასთან, კვლევით დადგინდა, რომ 2024-დან 2025 წლამდე ევროპის ავიაკომპანიების უმეტესობისთვის RASK-ი შემცირებულია. მაგალითად, იმ 14 ავიაკომპანიიდან, რომელთა მონაცემებიც ყოველწლიურად ხელმისაწვდომი იყო, RASK-ის მაჩვენებელი მხოლოდ ხუთ შემთხვევაში გაიზარდა, ხოლო ცხრა ავიაკომპანიაში შემცირდა.

AirAdvisor-ის კვლევით, ევროპის ყველაზე ძვირი ავიაკომპანიების რეიტინგის სათავეში ნორვეგიული Widerøe-ია, რომლის RASK-მა €0.32 შეადგინა. Widerøe ნორვეგიისთვის სიდიდით მესამე ავიაკომპანიაა და ძირითადად ქვეყნის მცირე რეგიონულ აეროპორტებს დიდ აეროპორტებთან აკავშირებს. უფრო მსხვილ ევროპულ ავიაკომპანიებს შორის RASK-ის ყველაზე მაღალი მაჩვენებელი British Airways-ს აქვს — 2025 წელს მისი RASK-ი €0.0888 იყო, რაც წინა წელთან შედარებით €0.0038-ით მეტია. მესამე ადგილზე Air France და Austrian Airlines არიან — ორივე ავიაკომპანიის RASK-ი €0.0850-ია.

რეიტინგის მეორე მხარეს, RASK-ის გათვალისწინებით ყველაზე იაფი ავიაკომპანიების სათავეში კი Wizz Air-ია. მისი RASK–ი მხოლოდ €0.0433-ს შეადგენს, რაც მას, AirAdvisor-ის კვლევით, ევროპის ყველაზე იაფ ავიაკომპანიად აქცევს. შესაძლოა, განსხვავება მცირე ჩანდეს, თუმცა რეალურად საშუალო ევროპული ფრენის მანძილის გათვალისწინებით ეს განსხვავება სწრაფად იზრდება. მაგალითად, Air France-ის ნაცვლად Wizz Air-ით მგზავრობამ შესაძლოა მგზავრს დაახლოებით €50 დაუზოგოს.

მეორე ყველაზე დაბალი RASK-ი easyJet-ს აქვს — €0.0521. ამ ავიაკომპანიის მაჩვენებელი 2024 წლის €0.0770-დან 2025 წელს მნიშვნელოვნადაა შემცირებული, ხოლო მესამე ადგილზეა Ryanair-ი, რომლის RASK-იც €0.0843-დან €0.0556-მდე დაეცა.

წარმოგიდგენთ ევროპის ავიაკომპანიების სრულ რეიტინგს RASK-ის მიხედვით (ძვირიდან იაფისკენ):