ფოტო: AFP
ჩინეთის მარეგულირებლებმა Tesla-ს თითქმის 3 მილიონი ავტომობილის შეკეთება დაავალეს, რაც კომპანიისთვის როგორც ჩინეთში, ისე გლობალურად, ყველაზე მასშტაბური გაწვევაა. გადაწყვეტილება ავტომობილებში კარის ავარიულ მექანიკურ გამხსნელთან დაკავშირებულ უსაფრთხოების პრობლემებს უკავშირდება.
ჩინეთის ბაზრის რეგულირების სახელმწიფო ადმინისტრაციის (SAMR) განცხადებით, Tesla 973,156 ერთეულ Model 3-ს გაიწვევს, რომლებიც 2019 წლის 4 მარტიდან 2026 წლის 29 აპრილამდეა წარმოებული. გაწვევა ასევე შეეხება ჩინეთში წარმოებულ დაახლოებით 1.96 მილიონ Model Y-ს, რომლებიც 2020 წლის 16 ნოემბრიდან 2026 წლის 30 აპრილამდეა გამოშვებული. გარდა ამისა, სიაში შედის 35,000-ზე მეტი იმპორტირებული Model 3, დაახლოებით 8,000 ერთეული Model X და 2,000 ერთეული Model S.
საერთო ჯამში, გაწვევა დაახლოებით 2.98 მილიონ ავტომობილს მოიცავს და Tesla-ს ისტორიაში ყველაზე მასშტაბურია.
ჩინეთის მარეგულირებლების განცხადებით, ავტომობილებში კარის ავარიული მექანიკური გამხსნელები ავარიის ან ელექტროენერგიის გათიშვის შემდეგ შესაძლოა რთულად შესამჩნევი იყოს. Tesla-ს განცხადებით, კომპანია მექანიკურ სახელურებზე გამაფრთხილებელ ეტიკეტებს უფასოდ დაამონტაჟებს, რათა მათი ადგილმდებარეობის იდენტიფიცირება გამარტივდეს.
ცალკე გადაწყვეტილებით, SAMR-მა Tesla-ს კიდევ 2.74 მილიონი ჩინეთში წარმოებული Model 3-ისა და Model Y-ის შეკეთება დაავალა. ეს ავტომობილები 2019 წლის მარტიდან 2025 წლის დეკემბრამდეა წარმოებული.
მეორე გაწვევა მძღოლის მონიტორინგის სისტემის ხარვეზს უკავშირდება, რის გამოც სისტემამ შესაძლოა მძღოლი საკმარისად არ გააფრთხილოს, რომ გზას თვალყური მიადევნოს. როგორც ცნობილია, Tesla პრობლემის გამოსასწორებლად ავტომობილების პროგრამულ უზრუნველყოფას დისტანციურად განაახლებს.
