ფოტო: Kevin Dietsch/Getty
ამერიკის შეერთებული შტატების პრეზიდენტი, დონალდ ტრამპი, SpaceX-ის დამფუძნებელ ილონ მასკს, Nvidia-ს აღმასრულებელ დირექტორ ჯენსენ ჰუანგსა და ტექნოლოგიური ინდუსტრიის სხვა გავლენიან პირებს მეცნიერებაში უმაღლეს ეროვნულ ჯილდოს გადასცემს. დაჯილდოების ცერემონია დღეს, 8 ოქტომბერს, ვაშინგტონში, ტექნოლოგიური მიღწევებისადმი მიძღვნილი სამიტის ფარგლებში გაიმართება.
მასკთან და ჰუანგთან ერთად, ტრამპი მეცნიერების ეროვნული მედლით Google-ის თანადამფუძნებელ სერგეი ბრინსა და AMD-ის აღმასრულებელ დირექტორს, ლიზა სუს დააჯილდოებს. ტექნოლოგიისა და ინოვაციების ეროვნული მედალი კი Dell Technologies-ის დამფუძნებელს, მაიკლ დელსა და Microsoft-ის CEO-ს, სატია ნადელას გადაეცემათ.
მეცნიერების ეროვნული მედალი აშშ-ის ადმინისტრაციის მიერ მეცნიერებისა და ინჟინერიის სფეროში გაცემული უმაღლესი ჯილდოა. ნომინაციებს პრეზიდენტის მიერ დანიშნული სპეციალური კომიტეტი აფასებს.
ეს პირველი შემთხვევაა ტრამპის ორი საპრეზიდენტო ვადის განმავლობაში, როდესაც ის ინდუსტრიის წარმომადგენლებს მეცნიერებისა და ტექნოლოგიების ეროვნულ მედლებს გადასცემს. დაჯილდოება ტექნოლოგიური ინდუსტრიის წარმომადგენლებთან ტრამპის ადმინისტრაციის ურთიერთობის გაღრმავების ფონზე ხდება.
ამ საკითხთან დაკავშირებით, ტრამპმა აშშ-ის ტექნოლოგიური კომპანიების ხელმძღვანელებს გასულ კვირას თეთრ სახლშიც უმასპინძლა. შეხვედრის ფარგლებში, ტექნოლოგიური სფეროს მილიარდერმა ლიდერებმა ხელოვნური ინტელექტის უსაფრთხო განვითარებასა და კომპანიების თვითრეგულირების შესახებ „შეთანხმებას“ ხელი მოაწერეს. ხელმომწერთა შორის იყვნენ ილონ მასკი, ჯენსენ ჰუანგი, მარკ ცუკერბერგი, დარიო ამოდეი და სუნდარ პიჩაი.
