სტოკჰოლმის საერთაშორისო მშვიდობის კვლევითმა ცენტრმა მსოფლიოში სამხედრო ხარჯების ტენდენციებზე კვლევა გამოაქვეყნა. 2020 წელს მსოფლიოში თავდაცვაზე 2 ტრილიონ აშშ დოლარამდე დაიხარჯა, რაც 2019 წლის მაჩვენებელზე 2.6%-ით, ხოლო 2011 წლის მაჩვენებელზე 9.3%-ით მეტია. თავდაცვაზე მსოფლიო ეკონომიკის 2.4% იხარჯება.
2020 წელს ყველაზე მაღალი სამხედრო ხარჯები აშშ-ს ჰქონდა – 778 მილიარდი დოლარი, რაც აშშ-ს ეკონომიკის მიმართ 3.7%-ია. აშშ-ს სამხედრო ხარჯი მსოფლიო სამხედრო ხარჯების 39%-ია. 2019 წელთან შედარებით, აშშ-მა სამხედრო ხარჯები 4.4%-ით გაზარდა, თუმცა 2011 წელთან შედარებით 10%-ით არის შემცირებული.
მეორე ადგილზე ჩინეთია, რომელმაც გასულ წელს 252 მილიარდი დოლარი დახარჯა. ჩინეთის წილი მსოფლიო სამხედრო ხარჯებში 13%-ია. ბოლო 10 წელიწადში ჩინეთმა სამხედრო ხარჯები 76%-ით გაზარდა.
მზარდია რუსეთის სამხედრო ხარჯებიც, რომელიც 2020 წელს მე-4 იყო მსოფლიოში და ჯამში 62 მილიარდ დოლარამდე დახარჯა. 2019 წელთან შედარებით რუსეთის სამხედრო ხარჯები 2.5%-ით გაიზარდა, ხოლო 2011 წელთან შედარებით 26%-ით არის გაზრდილი. რუსეთის ეკონომიკის მიმართ სამხედრო ხარჯები 4.3%-ია. რუსეთის წილი მსოფლიო სამხედრო ხარჯებში 3.1%-ია.
მიუხედავად იმისა, რომ გრძელვადიან ჭრილში აშშ-ს სამხედრო ხარჯები მცირდება, ხოლო რუსეთის იზრდება, 2020 წელს აშშ-მა სამხედრო შეიარაღებაზე და ჯარზე 13-ჯერ მეტი დახარჯა, ვიდრე რუსეთმა.
სამხედრო ხარჯების მხრივ ტოპ 10 ქვეყანაზე ჯამში 1.5 ტრილიონი დოლარი მოდის, რაც მსოფლიო სამხედრო ხარჯების 75%-ია.
ქვეყნები, რომლებსაც ყველაზე მაღალი სამხედრო ხარჯები აქვთ
ქვეყანა | მილიარდი აშშ დოლარი | მშპ-ს მიმართ | წილი მსოფლიო სამხედრო ხარჯებში | |
1 | აშშ | 778 | 3.7% | 39% |
2 | ჩინეთი | 252 | 1.7% | 13% |
3 | ინდოეთი | 73 | 2.9% | 3.7% |
4 | რუსეთი | 61.7 | 4.3% | 3.1% |
5 | გაერთიანებული სამეფო | 59.2 | 2.2% | 3.0% |
6 | საუდის არაბეთი | 57.5 | 8.4% | 2.9% |
7 | გერმანია | 52.8 | 1.4% | 2.7% |
8 | საფრანგეთი | 52.7 | 2.1% | 2.7% |
9 | იაპონია | 49.1 | 1.0% | 2.5% |
10 | სამხრეთ კორეა | 45.7 | 2.8% | 2.3% |
წყარო: : SIPRI Military Expenditure Database
