Forbes: 2026 წლის მსოფლიო ჩემპიონატის ყველაზე მაღალანაზღაურებადი ფეხბურთელები

@illustration by Alice Lagarde for Forbes

2026 წლის FIFA-ს მსოფლიო ჩემპიონატი სტარტს 11 ივნისს აიღებს და 19 ივლისს საფინალო მატჩით დასრულდება. ტურნირის ისტორიაში ყველაზე მასშტაბური ჩემპიონატის ფარგლებში, ჯამში 48 ეროვნული ნაკრები სამი მასპინძელი ქვეყნის — ამერიკის შეერთებული შტატების, კანადისა და მექსიკის — 16 სხვადასხვა ქალაქში მდებარე სტადიონებზე გამართავს შეხვედრებს.

მოახლოებულ მუნდიალთან დაკავშირებით, ამერიკულმა Forbes-მა მსოფლიო ჩემპიონატის მონაწილე ყველაზე მაღალანაზღაურებადი ფეხბურთელების რეიტინგი გამოაქვეყნა. ამ შემთხვევაში გამოცემამ, სიმბოლურად, „სასტარტო თერთმეტეული“ წარმოგვიდგინა, რომელსაც Forbes-ის მილიარდერთა სიის ორი ახალწვეული, პორტუგალიელი კრიშტიანუ რონალდუ და მოქმედი ჩემპიონი, არგენტინელი ლიონელ მესი ლიდერობენ.

საერთო ჯამში, FIFA-ს მსოფლიო ჩემპიონატის თერთმეტმა ყველაზე მაღალანაზღაურებადმა ფეხბურთელმა, უდიდეს საფეხბურთო ტურნირამდე, ბოლო 12 თვის განმავლობაში, კოლექტიურად $950 მილიონი გამოიმუშავა.

41 წლის რონალდუ არა მხოლოდ ყველაზე მაღალანაზღაურებადი ფეხბურთელი, არამედ, ყველა სპორტის სახეობას შორის, ყველაზე მაღალანაზღაურებადი სპორტსმენიცაა. „ალ-ნასარის“ მოქმედმა ფეხბურთელმა 2026 წლის მსოფლიო ჩემპიონატამდე 12-თვიან პერიოდში $300 მილიონი გამოიმუშავა — აქედან $235 მილიონი უშუალოდ სტადიონზე და $65 მილიონიც მოედანს მიღმა საქმიანობებიდან. ამავდროულად, პორტუგალიელთა კაპიტანი ერთადერთი სპორტსმენია, რომელმაც კარიერის განმავლობაში $2 მილიარდზე მეტი გამოიმუშავა. ამჟამად ამერიკული Forbes-ი კრიშტიანუს ქონებას $1.2 მილიარდად აფასებს.

2026 წლის მსოფლიო ჩემპიონატის ყველაზე მაღალანაზღაურებადი ფეხბურთელების სიაში რონალდუს 38 წლის არგენტინელი, ლიონელ მესი მოჰყვება. „ინტერ-მაიამის“ ფეხბურთელმა უკანასკნელი ერთი წლის განმავლობაში $140 მილიონი გამოიმუშავა — $72 მილიონი მოედანზე და $70 მილიონიც სტადიონს მიღმა საქმიანობებიდან. Forbes-ის უმდიდრეს ადამიანთა სიაში ლიონელ მესი, ისევე როგორც რონალდუ, გასული თვიდან ირიცხება, უშუალოდ არგენტინელის სიმდიდრე კი $1.1 მილიარდადაა შეფასებული.

Forbes-ის რეიტინგში მესამე ადგილზე საფრანგეთისა და მადრიდის „რეალის“ 27 წლის თავდამსხმელი, კილიან მბაპეა წარმოდგენილი — უკანასკნელ 12 თვეში გამომუშავებული $95 მილიონით, ხოლო ხუთეულს 25 წლის ნორვეგიელი, ერლინგ ჰაალანდი ($80 მილიონი) და 25 წლის ბრაზილიელი, ვინისიუს ჟუნიორი ($60 მილიონი) ასრულებენ.

ცნობისთვის, 2026 წლის მუნდიალის თერთმეტი ყველაზე მაღალანაზღაურებადი ფეხბურთელიდან ორი ბრაზილიის ნაკრებში — ვინისიუს ჟუნიორი და ნეიმარი ($38 მილიონი) — და ორიც ინგლისის ნაკრებში — ჯუდ ბელინგემი ($44 მილიონი) და ჰარი კეინი ($41 მილიონი) — ირიცხება. რეიტინგში ყველაზე ასაკოვანი კრიშტიანუ რონალდუა, ხოლო ყველაზე ახალგაზრდა ფეხბურთელი — „ბარსელონის“ ესპანელი გარემარბი, ლამინ იამალი ($43 მილიონი).

შეგახსენებთ, FIFA-ს სანაკრებო ჩემპიონატი 11 ივნისს, მექსიკისა და სამხრეთ აფრიკის დაპირისპირებით გაიხსნება. საფინალო მატჩი კი 19 ივლისს, ნიუ-ჯერსის „მეტლაიფ სტეიდიუმზე“ გაიმართება. FIFA-ს ინფორმაციით, საფინალო მატჩზე დასასწრები ბილეთების ღირებულება $2,030-დან დაიწყება, ხოლო პრემიუმ-ადგილების ფასი დაახლოებით $32,970 იქნება. ეს უკანასკნელი აპრილის თვის ფასთან შედარებით გასამმაგებულია, ხოლო 2022 წლის კატარის ფინალის ეკვივალენტურ ბილეთზე 20-ჯერ ძვირია.