რეიტინგი: ყველაზე ეფექტიანად მართული კომპანიები და მათი დირექტორები

ეს კომპანიები და მათი მენეჯმენტი 2023 წელს მაღალი ფინანსური შედეგებითა და უკუგებით გამოირჩეოდნენ. თუმცა უკუგებაზე გავლენას არა მხოლოდ მენეჯერული გადაწყვეტილებები ახდენს, არამედ ისეთი ფაქტორებიც, როგორებიცაა კომპანიის მასშტაბი, საქმიანობის სფერო, განვითარების ეტაპი და სხვა. ჩვენი მიზანია, სწორედ ამ გარე ფაქტორების გამორიცხვით შევაფასოთ წმინდად მენეჯმენტის გავლენა. წარმოგიდგენთ საუკეთესო მაჩვენებლის მქონე 50 კომპანიასა და ხელმძღვანელს.

რედაქტორი: შოთა დიღმელაშვილი; კვლევის ხელმძღვანელი: ეგნატე შამუგია; დამატებითი რეპორტინგი: კახი ჩაკვეტაძე

მეთოდოლოგია

ყველაზე ეფექტიანად მართული კომპანიების რეიტინგი კომპანიის მენეჯერული გადაწყვეტილებების წარმატების საზომის, აქტივებზე უკუგების სიდიდეს ეფუძნება. ეფექტიანობის შესაფასებლად გამოყენებულია სტანდარტიზებული ქულა. კერძოდ, თითოეული კომპანიის ხელმძღვანელის ქულის გამოსათვლელად, აქტივებზე უკუგებიდან, გამორიცხულია მასზე გავლენის მქონე  სხვადასხვა ფაქტორი (მაგ. კომპანიის ზომა, ასაკი, სექტორი და ა.შ.). სხვა ფაქტორების გავლენის გამოსარიცხად გამოყენებული რეგრესული ანალიზით შეფასებულია მათი პარამეტრები.  

რეიტინგის მომზადებისთვის კომპანიების ბაზა შედგენილია  ბუღალტრული აღრიცხვის, ანგარიშგებისა და აუდიტის შესახებ კანონით განსაზღვრული პირველი და მეორე კატეგორიის საწარმოებსა და Forbes Georgia-ს „საქართველოს 150 ყველაზე შემოსავლიან კომპანიებზე“ დაყრდნობით. რეიტინგში წარმოდგენილია 50 საუკეთესო შეფასების მქონე კომპანიიის ხელმძღვანელი 2023 წლის მდგომარეობით. კომპანიის მმართველად მიჩნეულია სამეწარმეო რეესტრში მითითებული „დირექტორი“ ან „გენერალური დირექტორი“, ან „პრეზიდენტი“.    

სრული მეთოდოლოგია იხილეთ ბმულზე

ᲜᲐᲗᲘᲐ ᲙᲐᲮᲘᲫᲔ
ᲛᲐᲒᲗᲘᲙᲝᲛᲘ / ᲢᲔᲚᲔᲙᲝᲛᲣᲜᲘᲙᲐᲪᲘᲐ

მაგთიკომი მობილური ოპერატორების საბაზრო წილით ლიდერი კომპანიაა. ის 1996 წელს დაარსდა და დღეს თითქმის 2.5 მლნ მომხმარებელს აერთიანებს, რაც საქართველოს მთლიანი ბაზრის 41%-ია. მაგთიკომს ნათია კახიძე ხელმძღვანელობს.  

2023 წელს კომპანიის წმინდა მოგება 361.3 მლნ ლარი იყო, რაც წინა საანგარიშო პერიოდთან შედარებით 17.3%-ით არის გაზრდილი. ამ პერიოდში არა მხოლოდ მოგება, არამედ კომპანიის მოგებიანობის დონეც გაუმჯობესდა. მაგალითად, 2023 წელს კაპიტალზე უკუგება 36.1%-დან 41.2%-მდე გაიზარდა, ხოლო აქტივებზე უკუგება  – 32.1%-დან 35.3%-მდე. 

ᲒᲘᲝᲠᲒᲘ ᲢᲧᲔᲑᲣᲩᲐᲕᲐ
MERCEDES-BENZ GEORGIA / ᲐᲕᲢᲝᲕᲐᲭᲠᲝᲑᲐ, ᲛᲝᲛᲡᲐᲮᲣᲠᲔᲑᲐ

ამ სახელის უკან 1996 წელს დაფუძნებული შპს აკა არის, რომლის საქმიანობაც ავტომობილებით ვაჭრობას და მათ მომსახურებას უკავშირდება. კომპანიის გენერალური დირექტორი გიორგი ტყებუჩავაა.  

კომპანიისთვის 2023 წელი წარმატებული აღმოჩნდა, რადგან წინა წელთან შედარებით წმინდა მოგება 78.2%-ით გაიზარდა. 2023 წელს Mercedes-Benz Georgia“-ს წმინდა მოგებამ 33.6 მლნ ლარი შეადგინა. ამავე პერიოდში არსებითად გაუმჯობესდა კომპანიის ძირითადი ფინანსური პროპორციები. კომპანიის აქტივებზე უკუგება 25.7%-დან 36%-მდე გაიზარდა, ხოლო 37.3%-დან 41.7%-მდე ზრდა იყო კაპიტალზე უკუგების შემთხვევაში.  

ᲞᲐᲐᲢᲐ ᲦᲐᲫᲐᲫᲔ
ᲗᲘᲑᲘᲡᲘ ᲓᲐᲖᲦᲕᲔᲕᲐ / ᲓᲐᲖᲦᲕᲔᲕᲐ

მიუხედავად იმისა, რომ ახალია და მხოლოდ 2014 წლიდან არსებობს, „თიბისი დაზღვევა“ მცირე ზომისა და უხვი მოთამაშის მქონე, სადაზღვევო სექტორში ზრდის დინამიკით გამორჩეული კომპანიაა. 2023 წელს კომპანია ბაზრის 23.3%-იან წილს იკავებდა. ის მომხმარებლებს ავტომობილის, ჯანმრთელობის, მოგზაურობისა და ქონების დაზღვევას სთავაზობს. 2023 წლის მდგომარეობით კომპანიის გენერალური დირექტორის პოზიციას  პაატა ღაძაძე იკავებდა. 

2023 წელს კომპანიის წმინდა მოგება 20.7%-ით გაიზარდა, რაც საანგარიშო პერიოდის ბოლოს 20.7 მლნ ლარს შეადგენდა. ამ პერიოდში კომპანიამ 19.8%-ით მეტი პრემია მოიზიდა, თუმცა 2022 წელთან შედარებით მოგებიანობა მცირედით ნაკლები იყო. 2023 წელს აქტივებზე უკუგება 19.8% იყო, რაც წინა საანგარიშო პერიოდში 19.6%-ს შეადგენდა. 2023 წელს კაპიტალზე უკუგება 50.6%-დან 49.8%-მდე შემცირდა. 

ᲛᲐᲠᲘᲜᲐ ᲒᲘᲝᲠᲒᲐᲫᲔ
ᲑᲐᲓᲐᲒᲝᲜᲘ / ᲐᲚᲙᲝᲰᲝᲚᲣᲠᲘ ᲡᲐᲡᲛᲔᲚᲔᲑᲘ

„ბადაგონი“ 2003 წელს დაფუძნებული კომპანიაა, რომლის გენერალური დირექტორი მარინა გიორგაძეა.  კომპანია კახეთის რეგიონში ღვინოს აწარმოებს და ადგილობრივ და უცხოურ ბაზარზე ღვინის ფართო ასორტიმენტით არის წარმოდგენილი. „ბადაგონისთვის“ 2023 წელი არსებითი ზრდის პერიოდი იყო.

2023 წელს კომპანიის წმინდა მოგებამ 11.2 მლნ ლარი შეადგინა. 2022 წელს ეს მაჩვენებელი 1.7 მლნ ლარი იყო (ომის ეფექტი). საანგარიშო პერიოდში აქტივებზე უკუგება 3.1%-დან 15.2%-მდე გაიზარდა, ხოლო კაპიტალზე უკუგების მაჩვენებელი 7%-დან 34.5%-მდე იყო გაუმჯობესებული. ომამდე, 2021 წელს, კომპანიის კაპიტალზე უკუგების მაჩვენებელი 19.6% იყო, ხოლო აქტივებზე  –  9.1%.   

ᲔᲠᲛᲘᲚᲔ ᲡᲣᲚᲐᲫᲔ
ᲘᲣ ᲯᲘ ᲗᲘ / ᲡᲐᲘᲜᲤᲝᲠᲛᲐᲪᲘᲝ ᲢᲔᲥᲜᲝᲚᲝᲒᲘᲔᲑᲘ

კომპანიის საქმიანობა 1997 წლიდან იწყება.  მისი გენერალური დირექტორი ერმილე სულაძეა. საინფორმაციო ტექნოლოგიების ბაზარზე წარმოდგენილი „იუ ჯი თი“ მომხმარებელს ფართო სპექტრის მომსახურებას სთავაზობს.

2023 წელს კომპანიის წმინდა მოგებამ 32.8 მლნ ლარი შეადგინა, რაც წინა საანგარიშო პერიოდთან შედარებით 23.5%-ით მეტია. 2023 წელს კომპანიის ძირითადი ფინანსური პროპორციები მაღალ ნიშნულზე იყო შენარჩუნებული. ამ პერიოდში აქტივებზე უკუგება 29.5%-დან 31%-მდე გაუმჯობესდა, ხოლო კაპიტალზე უკუგების ნიშნული 80.6%-დან 85.2%-მდე გაიზარდა. 

Forbes.ge

Forbes Georgia: სარედაქციო გუნდი