ვენესუელა ნავთობის მარაგებით მსოფლიოში პირველ ადგილზეა. მიუხედავად ამისა, მისი როლი გლობალურ ენერგობაზრებზე ბოლო წლების განმავლობაში ისეთივე მნიშვნელოვანი არ არის, როგორიც ათწლეულების წინ იყო.
მაშინ როდესაც აშშ, საუდის არაბეთი და სხვა ქვეყნები ნავთობმოპოვებით მოწინავე სახელმწიფოები არიან, ვენესუელაში მოპოვება ბოლო ათწლეულების განმავლობაში თანდათან მცირდებოდა. სტატიაში წარმოგიდგენთ ნავთობის ყველაზე დიდი მარაგების მქონე სახელმწიფოების რეიტინგს და მათ შედარებას ვენესუელის რესურსებთან. მონაცემები აღებულია „ნავთობის ექსპორტიორ ქვეყანათა ორგანიზაციის“ (OPEC) 2025 წლის ანგარიშიდან.
როგორც აღვნიშნეთ, ნავთობის ყველაზე დიდი მარაგი სამხრეთამერიკულ სახელმწიფოს აქვს. ვენესუელის მარაგები 2024 წლის მონაცემებით 303,221 მილიარდ ბარელს შეადგენდა, რაც გლობალური მარაგების 17%-ს წარმოადგენს. ვენესუელის ნავთობმარაგების უმეტესობა „ორინოკოს სარტყელშია“ კონცენტრირებული, რომელიც მდინარე ორინოკოს აუზსა და დელტას, ასევე ატლანტის ოკეანის სანაპირო ზოლს აერთიანებს. აქ წარმოდგენილი ტიპის ნავთობი შედარებით მძიმეა, მისი მოპოვება კი უფრო ძვირი ჯდება და განსაკუთრებულ ინფრასტრუქტურას მოითხოვს.
საინტერესოა, რომ მიუხედავად ყველაზე დიდი ნავთობმარაგებისა, 2024 წლის ნავთობის მოპოვების რეიტინგში ვენესუელას მხოლოდ 21-ე ადგილი ეკავა. 2024-ში ქვეყანა ყოველდღიურად 960,000 ბარელ ნავთობს აწარმოებდა.
ნავთობის მოპოვება ვენესუელაში პიკში 1970-იან წლებში იყო, როდესაც ქვეყანა ყოველდღიურად 3.5 მილიონ ბარელს მოიპოვებდა, რაც გლობალური გამომუშავების 7%-ს შეადგენდა. მოპოვება 2010-იან წლებში დაეცა და შარშან საშუალოდ დღიურად 1.1 მილიონი ბარელი შეადგინა, რაც გლობალური გამომუშავების დაახლოებით 1%-ს წარმოადგენს.
მოპოვების შემცირებას სხვადასხვა – პოლიტიკური, ეკონომიკური, ფინანსური და ტექნიკური – მიზეზი აქვს. ათწლეულების განმავლობაში ინდუსტრიის შეუსაბამოდ მართვამ, კორუფციის მაღალმა დონემ, ინვესტიციების ნაკლებობამ და საერთაშორისო სანქციებმა ვენესუელის ნავთობინდუსტრია თითქმის სრულად გაანადგურა. მიუხედავად იმისა, რომ ქვეყანაში დასავლური ნავთობკომპანიები, მაგალითად, Chevron-ი, კვლავ ოპერირებენ, სანქციების გაფართოებასთან ერთად მათი დატვირთვაც სულ უფრო შემცირდა.
თუმცა ვენესუელა კვლავ ფლობს ნავთობის უდიდეს მარაგებს, შესაბამისად, სწორი მენეჯმენტისა და ინვესტიციების, დემოკრატიული პოლიტიკური სისტემის შემთხვევაში, ამ რესურსების გამოყენება ეფექტიანად შეიძლება.
ცნობისათვის, ვენესუელა ირანთან, ერაყთან, ქუვეითთან და საუდის არაბეთთან ერთად OPEC-ის ერთ-ერთი დამფუძნებელი ქვეყანაა. მიუხედავად ამისა, ზემოთ აღნიშნული მიზეზების გამო მისი გავლენა ორგანიზაციაში ამჟამად უმნიშვნელოა.
| რეიტინგი | ქვეყანა | 2024 (მილიარდი ბარელი) |
| 1 | ვენესუელა | 303,221 |
| 2 | საუდის არაბეთი | 267,200 |
| 3 | ირანი | 208,600 |
| 4 | კანადა | 163,000 |
| 5 | ერაყი | 145,019 |
| 6 | არაბთა გაერთიანებული საამიროები | 113,000 |
| 7 | ქუვეითი | 101,500 |
| 8 | რუსეთი | 80,000 |
| 9 | ლიბია | 48,363 |
| 10 | აშშ | 45,014 |
| 11 | ნიგერია | 37,280 |
| 12 | ყაზახეთი | 30,000 |
| 13 | ჩინეთი | 28,182 |
| 14 | კატარი | 25,244 |
| 15 | ბრაზილია | 15,894 |
| 16 | ალჟირი | 12,200 |
| 17 | ეკვადორი | 8,273 |
| 18 | აზერბაიჯანი | 7,000 |
| 19 | ნორვეგია | 6,912 |
| 20 | მექსიკა | 5,136 |
| 21 | სუდანი | 5,000 |
| 22 | ინდოეთი | 4,981 |
| 23 | ომანი | 4,971 |
| 24 | ვიეტნამი | 4,400 |
| 25 | ეგვიპტე | 3,300 |
| 26 | არგენტინა | 2,999 |
| 27 | მალაიზია | 2,700 |
| 28 | ანგოლა | 2,550 |
| 29 | ინდონეზია | 2,410 |
| 30 | კოლუმბია | 2,019 |
| 31 | გაბონი | 2,000 |
| 32 | კონგო | 1,811 |
| 33 | ავსტრალია | 1,803 |
| 34 | გაერთიანებული სამეფო | 1,500 |
| 35 | ბრუნეი | 1,100 |
| 36 | ეკვატორული გვინეა | 1,100 |
| 37 | თურქმენეთი | 600 |
| 38 | უზბეკეთი | 594 |
| 39 | უკრაინა | 395 |
| 40 | დანია | 365 |
| 41 | ბელარუსი | 198 |
| 42 | ჩილე | 150 |
