გამოჩენიდან 10 წლის თავზე „თიბისი დაზღვევა“ ბაზრის უპირობო ლიდერია, თუმცა დავით კიღურაძისთვის გარდაქმნა აქ არ სრულდება. მიზანი ინდუსტრიის შემდეგი სტანდარტის შექმნაა, ერთდროულად ტექნოლოგიური და ადამიანზე ორიენტირებული დაზღვევის მოდელით.
ფოტო: ხათუნა ხუციშვილი
2016 წლისთვის საქართველოს სადაზღვევო ბაზარი სრულად გაყიდვების ტრადიციულ არხებზე იყო დამოკიდებული. უცხოეთში გამგზავრებისას მომხმარებელს სამოგზაურო პოლისის შესაძენად სადაზღვევო კომპანიის ოფისში ან ტურისტულ სააგენტოში უწევდა მისვლა, სადაც დოკუმენტი ხელით, ორკეციანი თვითკოპირებადი ბლანკების საშუალებით ივსებოდა; მთელი ინდუსტრია ამ მოძველებულ მოდელში იყო გაყინული. სადაზღვევო კომპანიების ვებგვერდები ფუნქციურ ინსტრუმენტებზე მეტად სავიზიტო ბარათებს ჰგავდა, ზარალის ანაზღაურება კი ხანგრძლივ სატელეფონო თუ ფიზიკურ მოლაპარაკებებს საჭიროებდა. მომხმარებლისთვის დაზღვევა დამღლელ, ფორმალურ ვალდებულებად აღიქმებოდა.
ამავე დროს, გლობალური სერვისების ეკოსისტემა და ადამიანების ქცევა საოცარი სისწრაფით იცვლებოდა. მომხმარებლები უკვე ციფრულად ჯავშნიდნენ სასტუმროებს, ონლაინ ყიდულობდნენ ავიაბილეთებს, აპლიკაციებით იძახებდნენ საკვებსა თუ ტაქსის. სწორედ ამ კონტრასტში დაინახა „თიბისის“ გუნდმა შესაძლებლობა და სადაზღვევო ინდუსტრიაში შესვლა გადაწყვიტა. ამ გუნდის სათავეში, სხვებთან ერთად, „თიბისი დაზღვევის“ პირველი გენერალური დირექტორი პაატა ღაძაძე და ამჟამინდელი CEO, დავით კიღურაძე იდგნენ.
“ჩვენ თავიდანვე გვჯეროდა, რომ არსებობდა საქმის კეთების სრულიად სხვა გზა — გზა, სადაც დაზღვევა იქნებოდა მარტივი, ადამიანური და ტექნოლოგიური“, — ამბობს დავით კიღურაძე.
თიბისი დაზღვევა იმ ხედვით შეიქმნა, რომ მომხმარებელს არ უნდა უწევდეს რთულ სადაზღვევო ტერმინოლოგიაში გარკვევა ან ბიუროკრატიულ პროცესებში დროის დაკარგვა. მას სჭირდება პარტნიორი, რომელიც მარტივად იგებს მის საჭიროებებს და სწრაფად რეაგირებს. “ჩვენი მიზანი თავიდანვე იყო არა უბრალოდ პოლისების გაყიდვა, არამედ ინდუსტრიის კულტურის შეცვლა”.
თიბისი დაზღვევის შექმნას წინ 50-თანამშრომლიანი ახალგაზრდა კომპანიის, კოპენბურის შესყიდვა უძღოდა. ყიდვის პროცესში, რაც კომპლექსულ ფინანსურ ანალიზს (due diligence) გულისხმობდა, თიბისის გუნდიდან ოთხი ადამიანი იყო ჩართული. ისინი ბუნებრივად იქცნენ ახლად წარმოქმნილი ორგანიზაციის მთავარ ბირთვად. კომპანიის რებრენდინგს საბოლოოდ დაახლოებით ერთი თვე დასჭირდა. დავითის კაბინეტში დღესაც დგას ტუმბო, რომელზეც „კოპენბურის“ ლოგოა დატანილი. თუმცა ამ სიმბოლურ დეტალზე ბევრად უფრო მნიშვნელოვანი ის არის, რომ თავდაპირველი 50 თანამშრომლიდან ბევრი ცხრა წლის შემდეგაც კომპანიაში მუშაობს.
2020 წელს, როდესაც პანდემიის გამო ტურისტული სააგენტოები დაიკეტა და ფიზიკური გაყიდვების არხები სულ რამდენიმე დღეში გაქრა, აღმოჩნდა, რომ სადაზღვევო ინდუსტრიის დიდი ნაწილი ამ ცვლილებისთვის მზად არ იყო. ამ მომენტისთვის ჯერ კიდევ ახალი კომპანია უკვე სრულად გაციფრულებულ ინფრასტრუქტურაზე იდგა: B ბოტი, მოსახერხებელი ვებგვერდი, სწრაფი გადახდის აპარატებით სერვისების შეძენის შესაძლებლობა და ვერიფიკაციისა თუ ზარალის ანაზღაურების დისტანციური გზები უკვე კარგად იყო ფეხმოკიდებული. მომხმარებელი პოლისს სახლიდან გაუსვლელად, ერთ წუთში იღებდა.
“არც თანამშრომლებისთვის ყოფილა გადაწყობა რთული”, — იხსენებს დავით კიღურაძე, — “თავიდანვე გვქონდა მიდგომა, რომ თანამშრომლებს ლეპტოპები ჰქონოდათ და არა სტაციონარული კომპიუტერები. კრიზისული ვითარების დროს სწორედ ასეთი გადაწყვეტილებები აჩვენებს, რამდენად მზად არის ორგანიზაცია მყისიერი ცვლილებისთვის”.
კომპანია, რომლის დნმ-შიც ციფრული ინოვაცია პირველივე დღიდან ჩაიდო, დღეს ბაზრის 18.4%-იანი წილით გამოკვეთილი ლიდერია. 2025 წელს თიბისი დაზღვევამ მოზიდული პრემიით პირველი ადგილი დაიკავა.
“სიმართლე რომ ვთქვა, მოულოდნელი შედეგი არ ყოფილა. ძალიან თანამიმდევრულად ვაშენებდით სისტემას, რომელმაც საბოლოოდ მთლიანი ბაზრის ლიდერობამდე მიგვიყვანა”, — აღნიშნავს დავით კიღურაძე.
ეს მიღწევა Forbes Georgia-ს სადაზღვევო სექტორის რეიტინგშიც აისახა. 2025 წლის მონაცემებით, „თიბისი დაზღვევა“ ყველაზე მოგებიან სადაზღვევო კომპანიად დასახელდა და TOP 10-ის სათავეში მოექცა. კომპანიის კაპიტალზე უკუგებამ (ROE) 46.4% შეადგინა, ხოლო წმინდა მოგებამ – 39.7 მილიონი ლარი. ამ ზრდის საყრდენი წერტილები ციფრული ტრანსფორმაცია, პროცესების მაქსიმალური გამარტივება, ახალი სტანდარტების შექმნა და მომხმარებელთან კომუნიკაციის სრულიად განსხვავებული ფორმა გახდა.
კომპანიის პროგრესს რამდენიმე ურთიერთდაკავშირებული ფაქტორით ხსნის ეგნატე შამუგია, საქართველოს უნივერსიტეტის კვლევითი ინსტიტუტის, გნომონ ვაისის მკვლევარი. მისი შეფასებით, „თიბისი დაზღვევა“ ბოლო წლებში ქართული სადაზღვევო ბაზრის ერთ-ერთი ყველაზე დინამიურად განვითარებადი კომპანიაა.
“პრემიის მოცულობის ზრდა კომპანიამ ანდერრაიტინგის შედეგების გაუმჯობესების პარალელურად შეძლო, რასაც თან ახლდა როგორც ზარალიანობის, ისე ხარჯების პროპორციების გაუმჯობესება. ეს მიუთითებს, რომ მენეჯმენტი ეფექტიანად იყენებს თანამედროვე ციფრულ ტექნოლოგიებსა და მონაცემებზე დაფუძნებულ გადაწყვეტილებებს, რაც ერთდროულად აუმჯობესებს ოპერაციულ ეფექტიანობასა და რისკების შეფასების ხარისხს”, — ამბობს ეგნატე შამუგია.
თიბისი დაზღვევა პირველი სადაზღვევო კომპანია იყო საქართველოში, რომელმაც კომუნიკაციის უშუალო, ადამიანური ენა დაამკვიდრა. წლების განმავლობაში სადაზღვევო ინდუსტრია მომხმარებელთან შიშის ენით საუბრობდა და მას მუდმივად რისკების, ავარიებისა და დანაკარგების შესახებ ახსენებდა. „თიბისი დაზღვევამ“ კი ეს პარადიგმა საპირისპირო მიმართულებით წაიყვანა.
ჩვენ გვინდოდა, ადამიანებს ეგრძნოთ, რომ დაზღვევა არ არის მხოლოდ ფორმალური დოკუმენტაცია; ის ყოველდღიური სიმშვიდის ნაწილია, რომელიც შესაძლებლობას გაძლევს, უფრო თავისუფლად იცხოვრო, — ამბობს დავითი.
დავით კიღურაძის მენეჯერული ხედვა მხოლოდ სადაზღვევო სექტორში არ ჩამოყალიბებულა. კარიერის საწყის ეტაპზე მან სადაზღვევო კომპანიაში სხვადასხვა მიმართულებით იმუშავა: სადაზღვევო შემთხვევების მართვიდან — რისკების მენეჯმენტამდე. შემდეგ იყო MBA სლოვენიაში, IEDC Bled-ში, და რამდენიმე წელი სადაზღვევო სექტორს მიღმა — გამოცდილება, რომელმაც მისი ხედვის მასშტაბი გააფართოვა.
თიბისი ბანკში ხაზინისა და ფინანსური ინსტრუმენტების მიმართულების მართვამ მას საშუალება მისცა, ფინანსური სერვისები კაპიტალის მართვისა და ფინანსური დისციპლინის ჭრილში დაენახა — “იმ დროისთვის ძალიან დიდ პორტფელს ვმართავდით. ფაქტობრივად, ბანკის ფულადი აქტივების მესამედი ამ ერთ განყოფილებას ებარა”. აზერბაიჯანში, TBC Kredit-ის გენერალური დირექტორის პოზიციაზე მუშაობამ განსხვავებული სპეციფიკის ბაზარზე მომხმარებელთან ურთიერთობის გამოცდილება შესძინა. TBC Pay-ში კი სწრაფი ტრანზაქციების, მასობრივი ოპერაციებისა და საცალო მომხმარებლის ქცევის პრაქტიკული ლოგიკა კიდევ უფრო ახლოდან დაინახა.
“დაზღვევას მხოლოდ ერთი პრიზმიდან არ ვუყურებ, — ამბობს დავით კიღურაძე, — ჩემთვის ეს არის ფინანსური მდგრადობა, ტექნოლოგია, სერვისი, მომხმარებლის გამოცდილება და ნდობა ერთიან სისტემაში”.
2016 წელს შექმნილი კომპანია, რომელიც მოქმედების სტილით სტარტაპს ჰგავდა, ცხრა წელიწადში ინდუსტრიის პირველ მოთამაშედ გადაიქცა. დღეს თიბისი დაზღვევა 500-ზე მეტ თანამშრომელს აერთიანებს და კორპორაციულ სამედიცინო დაზღვევაში 70,000-ზე მეტ ადამიანს ემსახურება. გარდა ამისა, ის ერთადერთი ქართული სადაზღვევო ინსტიტუტია, რომელიც ზედიზედ ორი წელია, Fitch-ის BB რეიტინგს ინარჩუნებს, რაც საქართველოს სუვერენული რეიტინგის მაქსიმალური ნიშნულია.
ამ მიღწევებზე საუბრისას დავით კიღურაძე სიამაყეზე მეტად პასუხისმგებლობას გრძნობს. “ეს უფრო ახალი ეტაპის დასაწყისია, ვიდრე დანიშნულების წერტილი”, — ამბობს ის.
თუ 50-კაციან კომპანიაში გადაწყვეტილებების ცენტრალიზება დროის დაზოგვას ემსახურება, 500 თანამშრომლის პირობებში იგივე სისტემა ბიუროკრატიულ ბარიერებს ქმნის. სწორედ ამიტომ თიბისი დაზღვევა დეცენტრალიზებულ მოდელზე გადავიდა. დღეს თითოეულ მიმართულებას გამოცდილი ლიდერი ხელმძღვანელობს და ჯამში კომპანიას შვიდი დირექტორი ჰყავს.
“მინდოდა, კომპანიაში ყოფილიყვნენ ადამიანები, რომლებსაც არა მხოლოდ პასუხისმგებლობა, არამედ გადაწყვეტილების მიღების რეალური თავისუფლებაც ექნებოდათ”, — განმარტავს დავით კიღურაძე. მისი თქმით, მოდელი მუშაობს იმიტომ, რომ ლიდერები ბიზნესს არა თანამდებობრივი პოზიციიდან, არამედ კონკრეტული საოპერაციო პერსპექტივიდან მართავენ: “როდესაც გადაწყვეტილებას ის ადამიანი იღებს, ვისაც ყოველდღიური შეხება აქვს ამა თუ იმ პრობლემასთან, ორგანიზაციაც ბევრად უფრო მოქნილი და სწრაფი ხდება”.
პრაქტიკაში ეს ასე გამოიყურება: მარკეტინგული კამპანია CEO-მ შესაძლოა უკვე დასრულებული სახით ნახოს. როდესაც გენერალური დირექტორი ერთი ან ორი კვირით მიემგზავრება, პროცესები ჩვეულებრივ რეჟიმში გრძელდება. არავინ ელოდება მის დასტურს მნიშვნელოვანი ნაბიჯის გადასადგმელად. თუმცა, თუ მისი გამოცდილება ან რჩევაა საჭირო, მისი კარი მუდამ ღიაა.
ამ ახალი ეტაპის ფილოსოფია დღეს კომპანიის მთავარ გზავნილში იკითხება: როცა წინ ხედავ. დავით კიღურაძე აღნიშნავს, რომ რეალურად ეს მიდგომა კომპანიის შექმნის დღიდანვე არსებობდა: “წინ ხედვა არის უნარი — ცვლილება დაინახო მანამდე, სანამ ის აუცილებლობად იქცევა; მომხმარებლის საჭიროებას უპასუხო მანამდე, სანამ ის პრობლემად ჩამოყალიბდება; და ააშენო სისტემა, რომელიც მომავალზეა გათვლილი”.
გენერალური დირექტორის მოადგილე, ციფრული და ბიზნესის განვითარების დირექტორი ნიკოლოზ ბრეგვაძე განმარტავს, როგორ იქცევა ეს ფილოსოფია ყოველდღიურ საოპერაციო მოდელად:
“ჩვენი ამოცანაა, დაზღვევა იქ ვაქციოთ მარტივ გამოცდილებად, სადაც ადამიანი უკვე არის — მობილურში, ვებგვერდზე, ბანკის თუ ნებისმიერ სხვა ციფრულ ეკოსისტემაში. თანამშრომლობა მაშინ იწყება, როცა ბრენდი, ტექნოლოგია და კომერცია ერთ ენაზე საუბრობს”.
დაზღვევაში მომხმარებლისათვის რეალურ ღირებულებას დროის დაზოგვა და პროცესის გამჭვირვალობა ქმნის. ამ ხედვის პრაქტიკული გამოხატულება პლატფორმებია. მობილური აპლიკაცია მომსახურებაზეა ორიენტირებული: პოლისების კონტროლი, სერვისების მიღება და მოთხოვნების გაგზავნა აქ ხდება. ტრანზაქციული ვებგვერდი კი ციფრული გაყიდვების ძირითადი არხია. შიდა პლატფორმები და CRM სისტემები გუნდებს ეხმარება, ყოველწლიურად გაზარდონ ავტომატიზაციის ხარისხი.
ბიზნესის თვალსაზრისით, ეს მიდგომა ორმხრივ ეფექტს ქმნის: გარე არხები მომხმარებლისთვის შეძენის ბარიერებს აქრობს, ხოლო შიდა ავტომატიზაცია საოპერაციო ხარჯებს მინიმუმამდე ამცირებს. “საბოლოოდ, კარგი პლატფორმა ერთდროულად სამ რამეს უნდა აკეთებდეს: უმარტივებდეს ცხოვრებას მომხმარებელს, უმარტივებდეს მუშაობას გუნდს და ქმნიდეს ზრდის შესაძლებლობას კომპანიისთვის”, — აღნიშნავს ბრეგვაძე.
ამ ხედვის ტექნოლოგიურ საფუძველზე საუბრობს IT დირექტორი ნიკოლოზ კობზევიც. მისი თქმით, მომხმარებელი კომპანიის ციფრულ სერვისებს ძირითადად მობილური აპლიკაციის მეშვეობით იყენებს : “იმის უკან, რასაც მომხმარებელი აპლიკაციაში ხედავს, სრულად ავტომატიზებული ინფრასტრუქტურა დგას, იქნება ეს პოლისის ყიდვა თუ სადაზღვევო შემთხვევის დარეგულირება. ტექნოლოგიის ხარისხი სწორედ მაშინ ჩანს, როცა რთული შიდა სისტემები მომხმარებლისთვის შეუმჩნეველი და მარტივი რჩება”.
შემდეგი ეტაპი ხელოვნურ ინტელექტს უკავშირდება. AI უკვე გამოიყენება სხვადასხვა პროცესში, თუმცა, კობზევის თქმით, ფინანსურმა ინსტიტუტებმა ეს პროცესი განსაკუთრებული ყურადღებით უნდა მართონ: საჭიროა მონაცემების სწორი სტრუქტურიზება, ხარისხის კონტროლი და უსაფრთხოების მკაცრი დაცვა: “AI ეფექტიანად მუშაობს მხოლოდ მაშინ, როცა მონაცემები სწორად არის ორგანიზებული და პროცესები სტაბილურ საფუძველზე დგას”.
თუ ტექნოლოგია მასშტაბირების საფუძველს ქმნის, ბიზნესმიმართულებები ის სივრცეა, სადაც კომპანიის დაპირება რეალურ გამოცდილებად იქცევა.
საცალო და MSME ბიზნესის დირექტორი ივანე კახაძე აღნიშნავს, რომ საცალო სექტორში ლიდერობა მხოლოდ გაყიდვებით არ იზომება. “ჩვენთვის ლიდერობის შენარჩუნება თვითმიზანი არასდროს ყოფილა. მთავარი მიზანია მომხმარებლისთვის რეალური ღირებულების შექმნა, ქვეყანაში დაზღვევის კულტურის გაძლიერება და ინდუსტრიის განვითარებაში ისეთი კონტრიბუცია, რომელიც სტანდარტს მაღლა სწევს”.
“შეძენის მომენტში მომხმარებელი ნდობას გვიცხადებს, სადაზღვევო შემთხვევის დროს კი ჩვენ უნდა დავამტკიცოთ, რომ ეს ნდობა გამართლებულია”. დღეს საქართველოში ყოველი მესამე დაზღვეული ავტომობილი თიბისი დაზღვევაზე მოდის, ხოლო 2025 წელს ახალი დაზღვეულებიდან ყოველმა მეორემ ეს კომპანია აირჩია. კახაძის თქმით, განსაკუთრებით საგულისხმოა, რომ შემთხვევის ანაზღაურების შემდეგ მომხმარებლის კმაყოფილების მაჩვენებელი უფრო მაღალია, ვიდრე მანამდე.
საცალო მიმართულების შემდეგ, კომპანიისთვის მომდევნო სტრატეგიული სივრცე MSME სეგმენტია. მცირე და საშუალო ბიზნესისთვის დაზღვევა არა დამატებითი კომფორტი, არამედ საქმიანობის უწყვეტობის დაცვის ინსტრუმენტია:
“მცირე ბიზნესისთვის ერთი გაუთვალისწინებელი შემთხვევა შეიძლება საქმიანობის შეჩერების მიზეზი გახდეს. ჩვენი ამოცანაა, საცალო მიმართულებით დაგროვებული გამოცდილება MSME სეგმენტშიც გადავიტანოთ — მარტივი პროდუქტებით, გასაგები კომუნიკაციით და შემთხვევების სამართლიანი მართვით”.
კორპორაციულ მიმართულებაში კი აქცენტი პარტნიორობაზე გადადის. კორპორაციული ბიზნესის დირექტორი ცოტნე ებრალიძე ამბობს, რომ მსხვილი კომპანიებისთვის მნიშვნელოვანია პარტნიორი, რომელიც მათ ინდუსტრიულ რისკებსა და ოპერაციულ საჭიროებებს სიღრმისეულად იცნობს. ეს მიმართულება აერთიანებს როგორც კორპორაციულ ჯანმრთელობის დაზღვევას (რომლითაც 70,000-ზე მეტ ადამიანს ემსახურებიან), ისე ქონებისა და პასუხისმგებლობის დაზღვევის ხაზებს. სამედიცინო მიმართულებაშიც აქცენტირებულად ვითარდება ციფრული სერვისები — ექიმთან ჩაწერა, მოთხოვნების გაგზავნა და ყოველდღიური პროცესების მართვა პირდაპირ აპლიკაციიდანაა შესაძლებელი, მოთხოვნების ნაწილს კი უკვე ხელოვნური ინტელექტი ამუშავებს.
თუმცა, სწრაფი ზრდა დაზღვევაში ფინანსური სიმყარის გარეშე წარმოუდგენელია. ფინანსური დირექტორი ნიკოლოზ საყვარელიძე ამბობს, რომ Fitch-ის სარეიტინგო პროცესი კომპანიის გამადიდებელი შუშით შესწავლას ჰგავს: Fitch სწავლობს კაპიტალის ადეკვატურობას, რეზერვების საკმარისობას, საინვესტიციო პორტფელს და ბიზნესმოდელს. ფინანსური სიმყარე უზრუნველყოფს, რომ ჩვენი ვალდებულებები მომხმარებლების წინაშე უპირობოდ შესრულდეს“. კომპანია ზედიზედ ინარჩუნებს Fitch-ის BB რეიტინგს, ხოლო მისი გადახდისუნარიანობის მაჩვენებელმა (Solvency Ratio) 2024 წლის ბოლოს 230%-ს გადააჭარბა. საყვარელიძის თქმით, დღეს ფინანსურ ფუნქციას ემატება მონაცემთა ღრმა ანალიტიკა, რომელიც ეხმარება კომპანიას, ზუსტად დაინახოს პორტფელის ხარისხი და ზრდის მდგრადობა.
ფინანსური სიმყარის პარალელურად, კომპანიის ერთ-ერთი ყველაზე უხილავი, მაგრამ კრიტიკული ნაწილი რისკების მართვაა. რისკების დირექტორ დავით ჭრიკიშვილის თქმით, კომპანიის რეალური მასშტაბი მისი ინფრასტრუქტურის სიძლიერით ფასდება — რამდენად შეუძლია მას, როგორც დიდი რაოდენობის ზარალების დროში ეფექტურად ანაზღაურება, ასევე რთული და დიდი მოცულობის ზარალების მართვა. კომპანია მხოლოდ A-კატეგორიის საერთაშორისო გადამზღვეველებთან თანამშრომლობს, რაც ნიშნავს, რომ მსხვილი რისკების უკან გლობალური ფინანსური რესურსი დგას.
ამ სისტემის ერთ-ერთი ყველაზე რთული გამოცდა 2022 წელს, უკრაინაში დაწყებულ ომთან დაკავშირებული გეოპოლიტიკური ცვლილებები იყო. საერთაშორისო გადამზღვეველებმა რეგიონში პირობები გაამკაცრეს ან გარკვეული სექტორები დატოვეს. ადგილობრივი კომპანიებისათვის ეს გარემო რისკების სწრაფ გადაფასებას და ფინანსური დაცვის ახალ დისციპლინას მოითხოვდა. “ასეთ დროს განსაკუთრებით კარგად ჩანს, რამდენად მნიშვნელოვანია ძლიერი ფინანსური და რისკების მართვის საფუძველი”, — ამბობს ჭრიკიშვილი.
თავად დავით კიღურაძისთვის როცა წინ ხედავ პირველ რიგში ხელოვნურ ინტელექტთან კიდევ უფრო მჭიდრო პარტნიორობას უკავშირდება. ის არ ერიდება იმის აღიარებას, რომ რამდენიმე წლის წინ AI-ის მიმართ სკეპტიკურად იყო განწყობილი. “ვფიქრობდი, რომ კომპანიაში დასანერგად ძალიან ძვირი და რთული ტექნოლოგია იყო”. თუმცა შემდეგ მიზნად დაისახა, უკეთ გარკვეულიყო ამ საკითხში. დღეს კომპანიაში უკვე რამდენიმე AI-ბაზირებული სისტემა მუშაობს, თავად კიღურაძე კი დიდ დროს უთმობს ამ მიმართულებით ცოდნის გაღრმავებას. თიბისი დაზღვევისათვის შემდეგი დიდი ტექნოლოგიური ნახტომი სწორედ ხელოვნური ინტელექტის სრულ ინტეგრაციას უკავშირდება: “თუ ტექნოლოგია არ გესმის, მის შესაძლებლობასაც ვერ შეაფასებ”, — ასე ფიქრობს კომპანიის გენერალური დირექტორი.
საქართველოს სადაზღვევო ბაზარი ჯერ კიდევ განვითარების ეტაპზეა: რეგისტრირებულ ავტომობილების მხოლოდ მცირე ნაწილია დაზღვეული, ჯანმრთელობის დაზღვევის პენეტრაცია დაბალია, ხოლო სადაზღვევო პრემიების თანაფარდობა მთლიან შიდა პროდუქტთან განვითარებულ ქვეყნებთან შედარებით მცირეა. ამ მოცემულობით, თიბისი დაზღვევას ზრდის დიდი პოტენციალი აქვს, თუმცა კომპანიისთვის რეალური ამოცანა არა ბაზრის მექანიკური ათვისება, არამედ თავად სადაზღვევო კულტურის ტრანსფორმაციაა.
“წარმატება არ იზომება მხოლოდ ბაზრის წილით, — დასძენს დავით კიღურაძე. — ბევრად უფრო მნიშვნელოვანი კითხვაა, რამდენ ადამიანს დავანახეთ, რომ დაზღვევა რეალურად აუმჯობესებს ცხოვრების ხარისხს”.
Forbes Georgia: სარედაქციო გუნდი
