Tesla-ს აქციების ფასის ყველაზე მკვეთრი ერთდღიანი ვარდნის გავლენით, კომპანიის დამფუძნებლისა და აღმასრულებელი დირექტორის, ილონ მასკის ქონება მნიშვნელოვნად შემცირდა. Forbes-ის მონაცემებით, 23 ივლისს, Tesla-ს აქციების ღირებულება დაახლოებით 14%-ით დაეცა, რის შედეგადაც, მასკმა ერთ დღეში $18.6 მილიარდი დაკარგა და მისი ქონება $731.7 მილიარდამდე შემცირდა.
მიუხედავად მისი ქონების შემცირებისა, ილონ მასკი კვლავ მსოფლიოს უმდიდრეს ადამიანად რჩება. მოგვიანებით, Forbes-ის შეფასებით, ამერიკელი ბიზნესმენის ქონება მცირედით კვლავ გაიზარდა და ამჟამად $744 მილიარდს უტოლდება. მსოფლიოს უმდიდრეს ადამიანთა რეიტინგში მასკს Google-ის თანადამფუძნებელი, ლარი პეიჯი ($262 მილიარდი) და Amazon-ის დამფუძნებელი ჯეფ ბეზოსი ($244.6 მილიარდი) მოჰყვებიან.
Tesla-ს აქციების ფასის ვარდნა ამერიკული კომპანიის მიერ კვარტალური ფინანსური ანგარიშგების გამოქვეყნებას მოჰყვა. მიუხედავად იმისა, რომ გასულ კვარტალში Tesla-მ $28.2 მილიარდის შემოსავალი მიიღო — რაც ანალიტიკოსების პროგნოზს, $27.2 მილიარდს აღემატებოდა — თითო აქციაზე მოგებამ მხოლოდ 33 ცენტი შეადგინა, მაშინ როცა ბაზარი 55 ცენტს ელოდებოდა.
Tesla-ს ფინანსური დირექტორის, ვაიბჰავ ტანეჯას განცხადებით, Tesla მიმდინარე წელს დაახლოებით $25 მილიარდის ინვესტირებას გეგმავს, მომდევნო წლებში კი ინვესტიციების მოცულობა კიდევ უფრო გაიზრდება.
თუმცა სწორედ ამ გეგმამ უოლ-სტრიტის ნაწილის კრიტიკა გამოიწვია. Morgan Stanley-ის ანალიტიკოსების შეფასებით, ასეთი მასშტაბის ინვესტიციები აუცილებელია, მაგრამ ამავდროულად კომპანია ვალდებულია, რობოტაქსებისა და Optimus-ის ჰუმანოიდი რობოტების განვითარების მიმართულებით, ხელშესახები პროგრესი და კონკრეტული შედეგები აჩვენოს.
ანალიტიკოსები ყურადღებას Tesla-სა და SpaceX-ის შესაძლო გაერთიანების შესახებ გავრცელებულ ვარაუდებზეც ამახვილებენ. ილონ მასკმა ამ საკითხზე პირდაპირი საუბრისგან თავი შეიკავა და განაცხადა, რომ ეს საკითხები კომპანიის ფინანსური ანგარიშგების განხილვისას არ განიხილება.
