ვიზიტორები ტურისტების გარდა ადამიანების იმ კატეგორიას მოიცავს, რომლებმაც ქვეყანაში 24 საათზე ნაკლები დრო გაატარეს (მათ შორის ტრანზიტი). მსოფლიო ბანკი მსოფლიოს ქველა ქვეყნის ვიზიტორების სტატისტიკას ყოველწლიურად აქვეყნებს. დღეისათვის მონაცემები 2016 წლის ჩათვლით არის გამოქვეყნებული.
2006 წლიდან 2016 წლამდე ყველაზე მეტჯერ ბელარუსში ჩასული ვიზიტორების რაოდენობა გაიზარდა – 105.9-ჯერ. მეორე ადგილზე ბუტანია, სადაც ვიზიტორების რაოდენობა 12.1-ჯერ გაიზარდა. მესამე ადგილზე კი საქართველოა 6.5-ჯერ ზრდით. 2016 წელს საქართველოში 6 361 000 ვიზიტორი შემოვიდა, 5.4 მილიონით მეტი, ვიდრე 2006 წელს. 2017 წელს საქართველოში შემოსულმა ვიზიტორების რაოდენობამ 7.6 მილიონი შეადგინა, თუმცა, მსოფლიო ბანკს ჯერ 2017 წლის მონაცემები თავის სტატისტიკურ ბაზებში ასახული არ აქვს.
თუ ვიზიტორების ზრდას რაოდენობის მიხედვით ვნახავთ (და არა ზრდის ტემპს), 2006 წელთან შედარებით, 2016 წელს ყველაზე მეტად აშშ-ში ჩასული ვიზიტორების რაოდენობაა გაზრდილი – 24.6 მილიონით. შემდეგ ტაილანდი მოდის 18.7 მილიონით. ყველაზე დიდი შემცირება უკრაინაშია, სადაც 2016 წელს 5.6 მილიონით ნაკლები ვიზიტორი ჩავიდა, ვიდრე 2006 წელს.
ცხრილი: 10 ქვეყანა, სადაც 2006 წლიდან 2016 წლამდე ვიზიტორების რაოდენობა ყველაზე მეტჯერ გაიზარდა
ქვეყანა | 2006 | 2016 | ზრდა, ჯერადობით |
ბელარუსი | 89,000 | 9,423,500 | 105.9 |
ბუტანი | 17,300 | 210,000 | 12.1 |
საქართველო | 983,000 | 6,361,000 | 6.5 |
კონგო | 46,000 | 224,000 | 4.9 |
ტიმორ-ლესტე | 14,000 | 66,000 | 4.7 |
მიანმარი | 630,000 | 2,907,000 | 4.6 |
მონტენეგრო | 378,000 | 1,662,000 | 4.4 |
ალბანეთი | 937,000 | 4,070,000 | 4.3 |
ისლანდია | 422,000 | 1,792,000 | 4.2 |
ლაოსი | 842,000 | 3,315,000 | 3.9 |
წყარო: მსოფლიო ბანკი
