მსოფლიოს 10 უმდიდრესი ადამიანი | 2025 წლის დეკემბერი

ნოემბრის შუა რიცხვებში, საძიებო ქსელის ამერიკული გიგანტის, Google-ის მიერ, AI-მოდელის ბოლო განახლების, Gemini 3-ის გაშვებამ Alphabet-ის საბაზრო კაპიტალიზაცია $4-ტრილიონიან ნიშნულს მიუახლოვა. შედეგად, კომპანიის დამფუძნებელი ლარი პეიჯი მსოფლიოს მეორე უმდიდრესი ადამიანი პირველად გახდა. ბიზნესმენის ქონებამ პირველი დეკემბრის მონაცემებით $262 მილიარდი შეადგინა, რაც ნოემბრის დასაწყისთან შედარებით, $30 მილიარდით მეტია.

რაც შეეხება Google-ის თანადამფუძნებელს, სერგეი ბრინს, მისი ქონება $27 მილიარდით გაიზარდა და $242 მილიარდს მიაღწია. შედეგად ბრინი, ამერიკული Forbes-ის რეიტინგში, ერთი პოზიციით მეხუთე ადგილამდე დაწინაურდა. პარალელურად კი, Berkshire Hathaway-ის თავმჯდომარე უორენ ბაფეტი, რომლის კონგლომერატმაც Alphabet-ში $5 მილიარდის ღირებულების აქციები შეისყიდა, $152 მილიარდით კვლავ ათეულში დაბრუნდა. სიაში მან Microsoft-ის აღმასრულებელი დირექტორი სტივ ბალმერი ჩაანაცვლა, რომელმაც რეიტინგში $149 მილიარდით მე-11 პოზიციაზე გადაინაცვლა.

პეიჯმა, რომელიც პირველი ნოემბრის მონაცემებით მე-4 ადგილზე იყო, Oracle-ის დამფუძნებელ ლარი ელისონსა და Amazon-ის დამფუძნებელ ჯეფ ბეზოსს გადაუსწრო. Forbes-ის დეკემბრის განახლებულ რეიტინგში თითო პოზიციით დაქვეითებულმა ორივე მილიარდერმა მე-3 და მე-4 ადგილზე გადაინაცვლა. გასულ ერთ თვეში ყველაზე დიდი დანაკარგი სწორედ ელისონმა განიცადა, რომელმაც $67 მილიარდი დაკარგა. მისი ქონების კლება Oracle-ს აქციების ღირებულების 23%-იან ვარდნას მოჰყვა. დანაკარგებით მეორე ადგილზეა Nvidia-ს დამფუძნებელი ჯენსენ ჰუანგი. თუმცა მან, Nvidia-ს აქციების ფასის 13%-ით ვარდნის მიუხედავად, $154 მილიარდით მერვე ადგილის შენარჩუნება მოახერხა.

Tesla-სა და SpaceX-ის აღმასრულებელი დირექტორი ილონ მასკი კვლავ მსოფლიოს უმდიდრეს ადამიანად რჩება. მიუხედავად იმისა, რომ ელექტრომობილების მწარმოებლის აქციების ღირებულება 13%-ით დაეცა და ამას მასკის ქონების $15 მილიარდით შემცირება მოჰყვა, ის კვლავ Forbes-ის უმდიდრესთა რეიტინგის სათავეშია.

ცნობისთვის, ილონ მასკი მსოფლიოს უმდიდრესი ადამიანის სტატუსს 2024 წლის მაისიდან ინარჩუნებს. ათეულის ერთადერთი არაამერიკელი წევრი კვლავ LVMH-ის თავმჯდომარე, ფრანგი ბერნარ არნოა. საერთო ჯამში მსოფლიოს მილიარდერთა ტოპ-10-ის კოლექტიური ქონება $2.4 ტრილიონია, რაც გასული თვის ანალოგიურია. პირველი დეკემბრის მდგომარეობით, Forbes-ის ათეულში კვლავ ყველა მამაკაცია. თითოეული მათგანის ქონება $152 მილიარდს აღემატება.

მსოფლიოს 10 უმდიდრესი ადამიანი 2025 წლის 1-ელი დეკემბრის მდგომარეობით

#1 ილონ მასკი
ქონება: $483 მლრდ
წყარო: Tesla, SpaceX, xAI, X
ასაკი: 54
საცხოვრებელი ადგილი: ოსტინი, ტეხასი
მოქალაქეობა: აშშ

#2 ლარი პეიჯი
ქონება: $262 მლრდ
წყარო: Google
ასაკი: 52
საცხოვრებელი ადგილი: პალო-ალტო, კალიფორნია
მოქალაქეობა: აშშ

#3 ლარი ელისონი
ქონება: $253 მლრდ
წყარო: Oracle
ასაკი: 81
საცხოვრებელი ადგილი: ვუდსაიდი, კალიფორნია
მოქალაქეობა: აშშ

#4 ჯეფ ბეზოსი
ქონება: $245 მლრდ
წყარო: Amazon
ასაკი: 61
საცხოვრებელი ადგილი: მაიამი, ფლორიდა
მოქალაქეობა: აშშ

#5 სერგეი ბრინი
ქონება: $242 მლრდ
წყარო: Google
ასაკი: 52
საცხოვრებელი ადგილი: ლოს-ალტოსი, კალიფორნია
მოქალაქეობა: აშშ

#6 მარკ ცუკერბერგი
ქონება: $222 მლრდ
წყარო: Meta (Facebook)
ასაკი: 41
საცხოვრებელი ადგილი: პალო-ალტო, კალიფორნია
მოქალაქეობა: აშშ

#7 ბერნარ არნო
ქონება: $190 მლრდ
წყარო: LVMH
ასაკი: 76
საცხოვრებელი ადგილი: პარიზი
მოქალაქეობა: საფრანგეთი

#8 ჯენსენ ჰუანგი 
ქონება: $154 მლრდ
წყარო: Nvidia
ასაკი: 62
საცხოვრებელი ადგილი: ლოს-ალტოსი, კალიფორნია
მოქალაქეობა: აშშ

#9 მაიკლ დელი
ქონება: $151 მლრდ
წყარო: Dell Technologies
ასაკი: 60
საცხოვრებელი ადგილი: ოსტინი, ტეხასი
მოქალაქეობა: აშშ

#10 უორენ ბაფეტი
ქონება: $151.9 მლრდ
წყარო: Berkshire Hathaway
ასაკი: 95
საცხოვრებელი ადგილი: ომაჰა, ნებრასკა
მოქალაქეობა: აშშ