Forbes Georgia 2025 წლის ქალთა კონფერენცია – გაიცანით მთავარი პანელის მონაწილეები • Forbes Georgia

29 მარტს Forbes Georgia – 2025 წლის ქალთა კონფერენციას უმასპინძლებს. Forbes Women Conference 2025 ლიდერი ქალების გაძლიერებასა და მათი მიღწევების წარმოჩენას მიეძღვნება. ღონისძიება ერთ სივრცეში მოუყრის თავს წარმატებულ ქალებს, რომლებიც საქართველოს მომავალს ქმნიან.

კონფერენციის მიზანი იმ ქალების წარმოჩენაა, რომლებიც სხვადასხვა სფეროში ტრანსფორმაციული ცვლილებების სათავეში დგანან. ისინი საკუთარ გამოცდილებასა და ცოდნას, შთამაგონებელ ისტორიებთან ერთად, დამსწრე საზოგადოებას გაუზიარებენ.

ღონისძიების ფორმატი

ღონისძიება Publica-ს საკონფერენციო სივრცეში ჩატარდება და 19:00 საათზე გაიხსნება. უშუალოდ კონფერენცია ორ სცენას მოიცავს: PechaKucha Night Stage და Forbes Women Stage.

PechaKucha პრეზენტაციის ცნობილი ფორმატია, რომელიც უმეტესად სურათებზე ორიენტირებულ, დინამიკურ თხრობას გულისხმობს. PechaKucha-ს ფარგლებში ექვსი ანტრეპრენიორი ქალი ისაუბრებს საკუთარი ბიზნესისა და პროფესიული გამოცდილების შესახებ.

მეორე სცენა Forbes Women-ის პანელურ დისკუსიას დაეთმობა, რომელშიც მონაწილეობას საქართველოს ყველაზე გავლენიანი ლიდერი ქალები მიიღებენ. დისკუსიის მთავარი თემები ლიდერობა, ინოვაციები და თვითგანვითარება იქნება. პანელი მოიცავს ინტერაქციულ სესიასა და აუდიტორიის ჩართულობას კითხვა-პასუხის ფორმატში.

პანელური დისკუსიის შემდეგ საღამო ნეთვორქინგით გაგრძელდება Publica-ს სივრცეში.

ვის იხილავთ პანელურ დისკუსიაზე?

ნანა ბერძენიშვილი — Caucasus Clean Energy Holding | მმართველი პარტნიორი

ნანა ბერძენიშვილი გამოცდილი ლიდერია, რომელსაც საერთაშორისო დონის უმაღლესი რგოლის მენეჯმენტის გამოცდილება აქვს. მას 20-წელზე მეტი გამოცდილება აქვს ორგანიზაციებისათვის ბიზნესის განვითარების ეფექტური სტრატეგიების შემუშავებაში. მისი ექსპერტიზა მოიცავს გარემოსდაცვითი, სოციალური და მმართველობითი (ESG) პრინციპების ინტეგრირებას ბიზნეს სექტორში, რაც საბოლოოდ უზრუნველყოფს ბიზნესის ოპერირების შესაბამისობას გლობალურ ESG სტანდარტებთან.
ნანა ბერძენიშვილი წარმატებით ახდენს საერთაშორისო ფინანსური ინსტიტუტების (IFI) და სხვადასხვა ინვესტორების სტანდარტების ბიზნესის მართვაში ინტეგრირებას. მისი ჩართულობა ენერგეტიკის სექტორში მოიცავს ისეთ მნიშვნელოვან პროექტებს, როგორებიცაა BP-ის მიერ განხორციელებული სამხრეთ კავკასიის გაზსადენის გაფართოების პროექტი, WREP SRP და კავკასიის განახლებადი ენერგიის ჰოლდინგის ჰიდროენერგეტიკული პროექტები. გარდა ამისა, კარიერის სხვადასხვა ეტაპზე ხელმძღვანელობდა კომპლექსურ პროექტებს ისეთ ორგანიზაციებში, როგორებიცაა USAID, UNDP, CHF International და World Vision International. ნანა ბერძენიშვილი სპეციალიზდება ESG-ის სტრატეგიების შემუშავებასა და დანერგვაში, რომლებიც შეესაბამება ისეთ ინსტიტუტების სტანდარტებს, როგორიცაა IFC, EBRD, ADB და EIB. ნანა ბერძენიშვილმა დაამთავრა ივანე ჯავახიშვილის სახელობის სახელმწიფო უნივერსიტეტის ბიზნეს სამართლის სკოლა და მიიღო მაგისტრის ხარისხი ბიზნეს სამართალში.

ნინო ენუქიძე — ბიზნესისა და ტექნოლოგიების უნივერსიტეტის (BTU) | რექტორი, პროფესორი

ნინო ენუქიძის ინიციატივით საქართველოში დაფუძნდა კოდინგის სკოლა ქალებისთვის, გლობალური განათლების პლატფორმა – AI4Globe, და iamtheCODE Foundation-ის საქართველოს წარმომადგენლობა, რომლის ფარგლებშიც 250,000 ქალსა და გოგოს 60,000-ზე მეტი სასერტიფიკატო კურსზე უფასო წვდომა ექნება. ის არის გაეროს გლობალური შეთანხმების საქართველოს საბჭოს არჩეული წევრი, გაეროს ბავშვთა ფონდის ბიზნესმრჩეველთა საბჭოს წევრი, ევროპის მარკეტინგისა და მენეჯმენტის ასოციაციის აკადემიური კონსორციუმის პრეზიდენტი და საპატიო საბჭოს წევრი. მისი ლიდერობით ბიზნესისა და ტექნოლოგიების უნივერსიტეტი გახდა ტექნოლოგიური პროგრესის ერთ-ერთი მნიშვნელოვანი ცენტრი საქართველოში. ნინო ენუქიძე არის World Economic Forum-ის Young Global Leaders 2024-ის წევრი.

თინათინ რუხაძე — ACT Global | თანადამფუძნებელი და მმართველი პარტნიორი

თინათინ რუხაძე ACT Global-ის თანადამფუძნებელი და მმართველი პარტნიორია. მისი ხელმძღვანელობით ACT პატარა ქართული საკონსულტაციო ფირმიდან გლობალურ მოთამაშედ გადაიქცა, რომელიც დღეს 3 კონტინენტზე, 35 ქვეყანაში ოპერირებს. თინათინი დღემდე აქტიურად ხელმძღვანელობს კომპანიის სტრატეგიულ განვითარებას და მონაწილეობს მის უმნიშვნელოვანეს პროექტებში, როგორც ბიზნეს-სტრატეგიისა და ორგანიზაციული ტრანსფორმაციის მენეჯმენტ-კონსულტანტი. თინათინს აქვს თსუ-ს ფსიქოლოგიის მაგისტრის ხარისხი და გრენობლის ბიზნეს სკოლის MBA მენეჯმენტ კონსალტინგის სპეციალიზაციით. აკადემიური განათლება, საკუთარი ბიზნესის მართვის გამოცდილება, ადგილობრივ და საერთაშორისო საკონსულტაციო პროექტებში 22 წლის მანძილზე დაგროვილი ექსპერტიზა თინათინის განსაკუთრებული აქტივია, რომელსაც იგი ეფექტიანად იყენებს ეისითის კლიენტების განვითარებისა და წარმატების მხარდასაჭერად. პარალელურად, თინათინი აქტიურად არის ჩართული საზოგადოებრივ საქმიანობაში: მენტორობს ახალგაზრდა და ქალ მეწარმეებს, მონაწილეობს ანგელოზ-ინვესტორობის პროექტებში; საჯარო გამოსვლებით ხელს უწყობს ბიზნესსა და ლიდერობასთან დაკავშირებული ცოდნის გავრცელებას. 2014 წელს მან თანამოაზრეებთან ერთად დააფუძნა ქალთა ბიზნეს-ფედერაცია “Women for Tomorrow”, სადაც 2014-2016 წლებში თავმჯდომარის პოზიცია ეკავა, ხოლო 2017-2023 წლებში მმართველი ბორდის წევრი იყო. ფედერაცია დღესაც წარმატებით აგრძელებს ქალი მეწარმეების მხარდაჭერასა და გაძლიერებას. მისი მიღწევები საერთაშორისო მასშტაბით აღიარებულია. 2018 წელს თინათინი Clicquot Business Woman Award-ის გამარჯვებული გახდა. ეს ჯილდო მსოფლიოს სხვადასხვა ქვეყანაში გადაეცემათ იმ ქალ ლიდერებს, რომლებმაც მნიშვნელოვანი წვლილი შეიტანეს გლობალური ეკონომიკისა და ბიზნესის განვითარებაში.

ეკა ქავთარაძე — Tegeta Holding | მთავარი აღმასრულებელი ოფიცერი

ჰოსპიტალური ქსელი მედალფა, დაავადებათა კონტროლის ეროვნული ცენტრი, ევექსის ჰოსპიტლები და ვიანი – თეგეტა ჰოლდინგამდე ეკატერინე ქავთარაძე ჯანდაცვის ინდუსტრიაში სხვადასხვა ხელმძღვანელ თანამდებობაზე მუშაობდა. კერძო და საჯარო სექტორში, საერთო ჯამში, 20-წლიანი გამოცდილება დააგროვა. დამთავრებული აქვს თბილისის სახელმწიფო სამედიცინო უნივერსიტეტი მედიცინის სპეციალობით და აქვს მაგისტრის ხარისხი ფარმაკოლოგიაში. ასევე ფლობს მაგისტრის მეორე ხარისხს ბიზნესის ადმინისტრირებაში. დაამთავრა კავკასიის ბიზნეს სკოლა და გრენობლის მენეჯმენტის სკოლა. ეკა ქავთარაძეს აქვს საერთაშორისო სამთავრობო და არასამთავრობო ორგანიზაციებთან მუშაობის მრავალწლიანი გამოცდილება.