ფოტო: thetimes.com
სამშაბათს გავრცელებულ მიმართვაში, უკრაინის გადაყენებულმა თავდაცვის მინისტრმა, მიხაილ ფედოროვმა, უკრაინაში არჩევნების ჩატარება მოითხოვა და განაცხადა, რომ ქვეყანა მმართველობის კრიზისის წინაშე დგას, რაც რუსეთის შემოჭრის შემდეგ პრეზიდენტ ვოლოდიმირ ზელენსკისთვის ყველაზე დიდი შიდა გამოწვევაა.
ფედოროვის მოწოდება, რომელიც YouTube-ზე გამოქვეყნებული ვიდეორგოლით გავრცელდა, უკრაინელი პოლიტიკური ფიგურის მიერ გაკეთებული პირველი ასეთი მოთხოვნაა მას შემდეგ, რაც რუსეთი 2022 წელს უკრაინაში შეიჭრა. ცნობისათვის, უკრაინის კანონი საომარი პერიოდის დროს არჩევნების ჩატარებას კრძალავს.
„დემოკრატია არ შეიძლება რუსეთის მძევლად იქცეს, – თქვა ფედოროვმა. – ჩვენ უნდა ვიპოვოთ კანონიერი, უსაფრთხო და რეალისტური მექანიზმი, რომელიც უკრაინას საშუალებას მისცემს, განაახლოს სრული დემოკრატიული პროცესი ხანგრძლივი ომის პირობებშიც კი“.
35 წლის ფედოროვი ზელენსკის დიდი ხნის მოკავშირე იყო. თანამდებობიდან გათავისუფლებიდან მალევე, ტექნოლოგიების მცოდნე ფედოროვმა საჯაროდ გააკრიტიკა შეიარაღებული ძალების მთავარსარდალი, ოლექსანდრ სირსკი, რითაც გამოავლინა მწვავე უთანხმოება მათსა და ომის შესახებ მათ განსხვავებულ ხედვებს შორის.
სირსკის გათავისუფლებისა და ფედოროვის თანამდებობაზე აღდგენის მოთხოვნით ქუჩებში ათასობით უკრაინელი გამოვიდა.
ზელენსკის მიმართ ღია გამოწვევად ქცეულმა ფედოროვმა განაცხადა, რომ უკრაინა „მმართველობის სისტემურ კრიზისს“ აწყდება.
„ძველი სისტემა ძალიან ხშირად საკუთარი წესებით ცხოვრობს. ის თავს იცავს. ცვლილებების ეშინია“, – აღნიშნა მან.
პიროვნებების დასახელების გარეშე, ფედოროვმა დაგმო სისტემური კორუფცია, რომელიც, მისი თქმით, უკრაინის საომარ ძალისხმევას აზიანებს.
ყოფილმა მინისტრმა ცოტა ხნის წინ განაცხადა, რომ, მისი აზრით, მის გათავისუფლებას ხელი თავდაცვის სამინისტროს შესყიდვების პროცესების რეფორმამ შეუწყო, რომელიც მილიარდობით დოლარის ღირებულების აღჭურვილობის შეძენას ეხებოდა.
ფედოროვი უკრაინის ისტორიაში ყველაზე ახალგაზრდა მინისტრია. ის 28 წლის ასაკში უკრაინის დიგიტალიზაციას ხელმძღვანელობდა და მან ამ თანამდებობაზე ექვსი წელი გაატარა. ციფრული ტრანსფორმაციის სამინისტროს ხელმძღვანელობისას, მან დრონების ომში გამოყენების დაჩქარება შეძლო, რამაც 2022 წლიდან უკრაინაში საბრძოლო მოქმედებებში გარდატეხა შეიტანა.
მისი ეროვნული რეიტინგი მნიშვნელოვნად გაიზარდა მას შემდეგ, რაც იანვარში თავდაცვის სამინისტროს ხელმძღვანელად დაინიშნა და მაშინვე მონაცემებზე დაფუძნებული რეფორმა დააანონსა. წინამორბედებისგან განსხვავებით, ფედოროვმა საჯაროდ წარადგინა რუსეთის დამარცხების სტრატეგია კადრების შემცირებისა და ტექნოლოგიური უპირატესობის გზით.
