თურქეთის დელეგაცია F-16-ების შესყიდვასთან დაკავშირებით მოლაპარაკებებისთვის აშშ-ში გაემგზავრა

თურქეთის დელეგაცია F-16-ების შესყიდვასთან დაკავშირებით მოლაპარაკებებისთვის აშშ-ში გაემგზავრა

თურქეთის სამხედრო დელეგაცია F-16-ების შეძენასთან დაკავშირებით მოლაპარაკებების გასამართად აშშ-ში გაემგზავრა. გავრცელებული ინფორმაციით, თურქეთის ეროვნული თავდაცვის სამინისტროს ტექნიკური დელეგაცია აშშ-ში აღნიშნული პროცესის დაჩქარებას ეცდება და დეტალებს შეათანხმებს.

ცნობისათვის, აქამდე თურქეთისათვის F-16-ების მიყიდვასთან დაკავშირებით სულ სამი შეხვედრაა გამართული, 2021 წლის დეკემბერში, 2022 წლის თებერვალში და რამდენიმე თვის წინ, მარტში.

F-16-ების შეძენის შესახებ მოთხოვნა თურქეთის მთავრობამ ოფიციალურად 2021 წლის ოქტომბერში წარადგინა. მოლაპარაკებების წარმატებით დასრულების შემთხვევაში, თურქეთი 6 მილიარდი აშშ დოლარის სანაცვლოდ 40 ერთეულ ამერიკულ გამანადგურებელ F-16-ს მიიღებს. გარდა ამისა, შეთანხმება თურქეთის სამხედრო-საჰაერო ძალების 79 საფრენი აპარატის მოდერნიზაციისთვის ინვენტარის მიწოდებასაც ითვალისწინებს.

F-16-ების თურქეთისათვის მიყიდვის შესახებ თანხმობა და მზაობა აშშ-ის პრეზიდენტმა, ჯო ბაიდენმა რამდენიმე კვირის წინ კიდევ ერთხელ გამოთქვა. ივნისში, ნატოს სამიტზე თურქეთის პრეზიდენტის, რეჯეფ თაიფ ერდოღანისა და ბაიდენის შეხვედრისას, აშშ-ის პრეზიდენტმა საკუთარი პოზიცია ღიად დააფიქსირა. „ჩვენ თურქეთს F-16-ები უნდა მივყიდოთ. ასე ვფიქრობდი დეკემბერში და აზრი არც ახლა შემიცვლია“, – განაცხადა აშშ-ის პრეზიდენტმა.

თუმცა, ივლისში აშშ-ის წარმომადგენლობითმა პალატამ ჯო ბაიდენს თურქეთისათვის F-16-ების მიყიდვა პროცედურულად გაურთულა. ახალი დადგენილების თანახმად, პრეზიდენტმა ბაიდენმა უნდა დაამტკიცოს, რომ F-16-ებისა და მოდერნიზაციისთვის განკუთვნილი ინვენტარის ანკარასთვის გადაცემა ამერიკის ეროვნულ ინტერესებშია. გარდა ამისა, ბაიდენმა კონგრესს უნდა წარუდგინოს გარანტია, რომ გამანადგურებლების გადაცემიდან 120 დღის განმავლობაში თურქეთი საბერძნეთის სუვერენიტეტს არ დაარღვევს.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო.