1930 წელს ფეხბურთში მსოფლიო ჩემპიონატის დაწყების შემდეგ მასში მონაწილეობის მიღების უფლება სულ რამდენიმე ქვეყნისთვის აუკრძალავთ. ხშირად ეს აკრძალვები კონკრეტულ ქვეყნებში შექმნილი პოლიტიკური მდგომარეობის, ზოგიერთ შემთხვევაში კი კონკრეტული საფეხბურთო სკანდალის „დამსახურება“ იყო.
სტატიაში წარმოდგენილი ქვეყნების სია TIME-ის მასალაზე დაყრდნობითაა შექმნილი და ითვალისწინებს როგორც ჩემპიონატზე, ისე საკვალიფიკაციო ეტაპზე მონაწილეობის მიღების აკრძალვის შემთხვევებს.
მსოფლიო ჩემპიონატზე მონაწილეობის მიღების აკრძალვის ყველაზე ადრეული შემთხვევებით მეორე მსოფლიო ომს მოჰყვა. 1950 წლის მსოფლიო ჩემპიონატზე მონაწილეობის უფლება პოსტ-საომარი სანქციების მიზეზით გერმანიასა და იაპონიას ჩამოართვეს. ათეულობით წლების შემდეგ კი გაეროს მიერ იუგოსლავიის ომების გამო იუგოსლავიაზე დაწესებული საქნციების პირობებში, 1994 წლის მსოფლიო ჩემპიონატზე მონაწილეობის მიღება იუგოსლავიასაც აეკრძალა.
გეოპოლიტიკური და კონფლიქტური მიზეზით აკრძალვის უკანასკნელი შემთხვევა რუსეთია. 2022 და 2026 წლის მსოფლიო ჩემპიონატებზე რუსეთის ეროვნულ ნაკრებს თამაშის უფლება უკრაინაში ომის დაწყების გამო აეკრძალა. საინტერესოა, რომ FIFA-მ აღნიშნული გადაწყვეტილება მას შემდეგ მიიღო, რაც რამდენიმე ქვეყნის საფეხბურთო ფედერაციამ რუსეთის წინააღმდეგ თამაშზე უარი განაცხადა.
ამ კატეგორიით უფლების ჩამორთმევაში უნიკალური შემთხვევაა სამხრეთ აფრიკა. აპარტეიდის გამო ქვეყანას მსოფლიო ჩემპიონატზე მონაწილეობა 1970-დან 1990 წლამდე ჰქონდა აკრძალული. 1992 წელს კი რასობრივი სეგრეგაციის დასრულების შემდეგ ქვეყანას ჩემპიონატზე მონაწილეობის მიღების უფლება აღუდგა.
მონაწილეობის უფლების აკრძალვის ყველაზე გავრცელებული მიზეზი ქვეყნის ეროვნულ საფეხბურთო ასოციაციებში მთავრობის ჩარევის შემთხვევებია. წევრ საფეხბურთო ფედერაციებთან FIFA-ს მთავარი მოთხოვნა პოლიტიკური ხელმძღვანელობისგან დამოუკიდებლად ოპერირებაა. FIFA-ს მოთხოვნების დარღვევით მთავრობების მიერ საფეხბურთო ფედერაციების დაშლის ან არჩევნებში ჩარევის მიზეზით სხვადასხვა დროს მსოფლიო ჩემპიონატზე მონაწილეობის უფლება ინდონეზიის, ქუვეითის, კენიის, ზიმბაბვის, პაკისტანისა და ბრუნეის ნაკრებებს აუკრძალეს.
პოლიტიკური მიზეზების გარდა, აკრძალვის ხშირი მიზეზი საფეხბურთო გადაცდომებიც გამხდარა. მაგალითად, 1990 წლის მსოფლიო ჩემპიონატზე მონაწილეობის მიღების უფლება, ახალგაზრდულ ჩემპიონატზე ზღვარს გადაცილებული მოთამაშეების ასაკის დამალვის გამო, მექსიკას აეკრძალა. 1994 წლის მსოფლიო ჩემპიონატიდან კი მეკარე რობერტო როხასის მიერ ტრავმის მომიზეზების გამო FIFA-მ ჩილეს ნაკრები ჩახსნა.
| ქვეყანა | მსოფლიო ჩემპიონატი | მიზეზი |
| გერმანია | 1950 | მეორე მსოფლიო ომის შემდგომი აკრძალვა |
| იაპონია | 1950 | მეორე მსოფლიო ომის შემდგომი აკრძალვა |
| სამხრეთი აფრიკა | 1970–1990 | აპარტეიდის პოლიტიკის გამო აკრძალვა |
| მექსიკა | 1990 | ასაკის გაყალბების სკანდალი |
| იუგოსლავია | 1994 | იუგოსლავიის ომის გამო გაეროს მიერ დაწესებული სანქცია |
| ლიბია | 1994 | გაეროს მიერ დაწესებული სანქცია |
| ჩილე | 1994 | მეკარის მიერ ტრავმის მომიზეზება |
| მიანმარი | 2006 | მსოფლიო ჩემპიონატის საკვალიფიკაციო ეტაპზე მონაწილეობაზე უარის თქმა |
| ბრუნეი | 2014 | ფეხბურთის ფედერაციაში მთავრობის ჩარევა |
| ზიმბაბვე | 2018 | ყოფილი მწვრთნელისთვის გასამრჯელოს გადაუხდელობა |
| ინდონეზია | 2018 | ფეხბურთის ფედერაციაში მთავრობის ჩარევა |
| ქუვეითი | 2018 | ფეხბურთის ფედერაციაში მთავრობის ჩარევა |
| რუსეთი | 2022, 2026 | აკრძალვა უკრაინაში შეჭრის გამო |
