რომელი ქვეყნების მოსახლეობა გამდიდრდა ყველაზე მეტად 2017 წელს

ქვეყნის მოსახლეობის გამდიდრებას წლის განმავლობაში ერთი მოსახლის მიერ მიღებული საშუალო შემოსავლის ზრდა განაპირობებს. ერთ მოსახლეზე შემოსავალს სხვადასხვა ინდიკატორით ზომავენ და ყველა ამ ინდიკატორს თავისი გამოყენების არეალი აქვს. როდესაც ერთ მოსახლეზე შემოსავალს ვზომავთ იმ მიზნით, რომ შემდეგ სხვადასხვა ქვეყნის მაჩვენებლები ერთმანეთს შევადაროთ, ამ დროს მსყიდველობითი უნარის პარიტეტით (PPP) დათვლილი ერთ მოსახლეზე შემოსავლის გამოყენება ყველაზე გამართლებულია.

წარმოგიდგენთ ქვეყნების ტოპ-10-ეულს, სადაც 2017 წელს მოსახლეობის შემოსავალი ყველაზე მეტად გაიზარდა. იშვიათი გამონაკლისის გარდა, ყველაზე მეტად მდიდარი ქვეყნების მოსახლეობის შემოსავლები იზრდება. გამოდის, მიუხედავად იმისა, რომ მაღალშემოსავლიანი ქვეყნების ეკონომიკა პროცენტულად სწრაფად აღარ იზრდება, უკვე დაფიქსირებული მაღალი შემოსავლების საბაზისო ეფექტისა და მოსახლეობის კლების (ან დაბალი ტემპით ზრდის) გამო, ერთ მოსახლეზე რეალური შემოსავალი ამ ქვეყნებში უფრო მეტად იზრდება, ვიდრე განვითარებად ქვეყნებში.

10: ამერიკის შეერთებული შტატები

2017 წელს აშშ-ში ერთ მოსახლეზე საშუალო წლიური შემოსავალი 1,888 PPP დოლარით გაიზარდა, რაც ეკონომიკის 2.5%-იანმა ზრდამ და დაბალმა ინფლაციამ (1.8%) განაპირობა. 2016 წელს აშშ-ის ეკონომიკა 1.5%-ით გაიზარდა.

9: ლიტვა

2017 წელს ლიტვის ეკონომიკა 3.8%-ით გაიზარდა, რაც განვითარებული ქვეყნისთვის საკმაოდ მაღალი მაჩვენებელია. ინფლაციამ დაახლოებით 3% შეადგინა. ერთ მოსახლეზე შემოსავალი 1,963 PPP დოლარით გაიზარდა და ამ მაჩვენებლით მსოფლიოში მხოლოდ 8 ქვეყანას ჩამორჩა.

8: ნიდერლანდები

2017 წელს ნიდერლანდებში ერთ მოსახლეზე საშუალო წლიური შემოსავალი 2,333 PPP დოლარით გაიზარდა, რაც ეკონომიკის 3.2%-იანმა ზრდამ და დაბალმა ინფლაციამ (1.4%) განაპირობა. ეკონომიკის ზრდის ტემპის ამაღლებას ძირითადად ევროკავშირში ეკონომიკური სიტუაციის გაუმჯობესებამ შეუწყო ხელი.

7: ჰონკონგი

2017 წელს ჰონკონგის ეკონომიკა 3.6%-ით გაიზარდა. ინფლაციამ დაახლოებით 2% შეადგინა. ერთ მოსახლეზე შემოსავალი 2,639 PPP დოლარით გაიზარდა. ჰონკონგის ეკონომიკის ზრდის ტემპის ამაღლება მსოფლიო ეკონომიკის ზრდის ტემპის ამაღლებამ განაპირობა, რადგან ჰონკონგი მსოფლიოს ერთ-ერთი ფინანსური ცენტრია და მასზე გლობალური მოვლენები პირდაპირ აისახება.

6: მალტა

2017 წელს მალტაში ერთ მოსახლეზე საშუალო წლიური შემოსავალი 2,653 PPP დოლარით გაიზარდა, რაც ეკონომიკის 5.6%-იანმა ზრდამ და დაბალმა ინფლაციამ (1.5%) განაპირობა. 2017 წელს განვითარებულ ქვეყნებს შორის მალტის ეკონომიკა ყველაზე მაღალი პროცენტული მაჩვენებლით გაიზარდა.

5: სინგაპური

2017 წელს სინგაპურის ეკონომიკა 3.3%-ით გაიზარდა. ინფლაციამ დაახლოებით 1.4% შეადგინა. ერთ მოსახლეზე შემოსავალი 2,699 PPP დოლარით გაიზარდა. ჰონკონგის მსგავსად, სინგაპურის ეკონომიკის ზრდის ტემპის ამაღლებაც მსოფლიო ეკონომიკის ზრდის ტემპის ამაღლებამ განაპირობა, რადგან სინგაპურიც მსოფლიოს ერთი-ერთი უმსხვილესი ფინანსური და სავაჭრო ცენტრია.

4: ისლანდია

2017 წელს ისლანდიაში ერთ მოსახლეზე საშუალო წლიური შემოსავალი 3,027 PPP დოლარით გაიზარდა, რაც ეკონომიკის 5.1%-იანმა ზრდამ და დაბალმა ინფლაციამ (1.5%) განაპირობა. განვითარებულ ქვეყნებს შორის, მალტის შემდეგ ისლანდიის ეკონომიკა ყველაზე მაღალი პროცენტული მაჩვენებლით გაიზარდა.

3: ირლანდია

2017 წელს ირლანდიის ეკონომიკა 4.8%-ით გაიზარდა. ინფლაციამ დაახლოებით 1% შეადგინა. ერთ მოსახლეზე შემოსავალი 3,357 PPP დოლარით გაიზარდა. ირლანდია ბიზნესისთვის მიმზიდველი ქვეყანაა დაბალი მოგების გადასახადისა და კვალიფიციური მუშახელის გამო. უმუშევრობა 1.5% პუნქტით შემცირდა.

2: ლუქსემბურგი

2017 წელს ლუქსემბურგში ერთ მოსახლეზე საშუალო წლიური შემოსავალი 3,450 PPP დოლარით გაიზარდა, რაც ეკონომიკის 4%-იანმა ზრდამ და დაბალმა ინფლაციამ (1.5%) განაპირობა. ეკონომიკის ზრდის ტემპის ამაღლებას ძირითადად ევროკავშირში და ზოგადად მსოფლიოში ეკონომიკური სიტუაციის გაუმჯობესებამ შეუწყო ხელი. ლუქსემბურგი მსოფლიოს მნიშვნელოვანი ფინანსური ცენტრია.

1: ლიბია

სამოქალაქო ომისა და ნავთობზე ფასების დაცემის გამო 2010 წლიდან 2016 წლამდე ლიბიის მოსახლეობის შემოსავლები განახევრდა. 2017 წლიდან ლიბიაში წინა წლებთან შედარებით მშვიდობა დამყარდა და ეკონომიკა 26%-ით გაიზარდა, ფაქტობრივად, ეკონომიკამ აღდგენა დაიწყო. ერთ მოსახლეზე შემოსავალი 3,524 PPP დოლარით გაიზარდა.ინფლაციამ 35% შეადგინა.